Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 3 Bible Online

ትንቢት ሕዝቅኤል 3 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 3

¹ንሱ ኸኣ፡ ኣታ ወዲ ሰብ፡ ዝረኸብካዮ ብላዕ። ነታ ጥቕልልቲ መጽሓፍ ብልዓያ፡ ኬድካ ድማ ንቤት እስራኤል ተዛረቦም፡ በለኒ።

²ሽዑ ኣፈይ ከፈትኩ፡ ንሱውን ነታ ጥቕላል ኣብለዓኒ።

³ንሱ ኸኣ፡ ኣታ ወዲ ሰብ፡ ከብድኻ ኣጽግብ፡ ንውሽጢ ኸብድኻውን በዛ ኣነ ዝህበካ ጥቕላል ምልኣዮ፡ በለኒ። ሽዑ በላዕክዋ፡ ኣብ ኣፈይውን ጥዕምቲ ኸም መዓር ጠዐመት።

⁴በለኒ ኸኣ፡ ኣታ ወዲ ሰብ፡ ናብ ቤት እስራኤል ኪድ ብቓላተይ ከኣ ተዛረቦም።

⁵ናብ ቤት እስራኤል እምበር፡ ናብ ሓደ ቛንቋኡ ዘይስትውዐል፡ ዘረባኡ ዝኸቢድ ህዝቢ፡ ቃላቶም ዘይተስተውዕሎ ብዙሓት ህዝብታት ኣይተለኣኽካን። ብርግጽ ናባታቶም ሰዲደካ እንተ ዝኸውንሲ፡ ምሰምዑኻ ነይሮም።

⁶ናብ ቤት እስራኤል እምበር፡ ናብ ሓደ ቛንቋኡ ዘይስትውዐል፡ ዘረባኡ ዝኸቢድ ህዝቢ፡ ቃላቶም ዘይተስተውዕሎ ብዙሓት ህዝብታት ኣይተለኣኽካን። ብርግጽ ናባታቶም ሰዲደካ እንተ ዝኸውንሲ፡ ምሰምዑኻ ነይሮም።

⁷ግናኸ ኲሉ ቤት እስራኤል፡ ግምባሮም ተሪር፡ ልቦም ሓራን እዩ እሞ፡ ቤት እስራኤልሲ ኺሰምዑኒ ዘይፈትዉ ስለ ዝዀኑ፡ ንኣኻ ኣይኪሰምዑኻን እዮም።

⁸እንሆ፡ ንገጽካ ኣንጻር ገጾም ኣትሪረዮ፡ ንግምባርካውን ኣንጻር ግምባሮም ኣትሪረዮ እየ።

⁹ግምባርካ ኸም ኣልማዝ፡ ካብ ብላድ ዚብርትዕ ገይረዮ እየ። ዓላዊት ቤት እዮም እሞ፡ ኣይትፍርሃዮም፡ ኣብ ቅድሚኦም ከኣ ኣይትሰምብድ።

¹⁰መሊሱውን በለኒ፡ ኣታ ወዲ ሰብ፡ ንዂሉ እቲ ዝነግረካ ቓላት ኣብ ልብኻ ዕቘሮ፡ በእዛንካ ድማ ስምዓዮ።

¹¹ናብቶም ምሩኻት፡ ናብ ደቂ ህዝብኻ ኺድ እሞ፡ እንተ ኺሰምዑኻ፡ እንተ ኺኣብዩኻ፡ እግዚኣብሄር ኣምላኽ ከምዚ ይብል፡ ኣልካ ንገሮምን በሎምን።

¹²እቲ መንፈስ ከኣ ኣልዐለኒ፡ ብድሕረይ ድማ፡ ክብሪ እግዚኣብሄር ኣብቲ ቦታኡ ይባረኽ፡ ዚብል ብርቱዕ ደሃይ ምንቅጥቃጥ ሰማዕኩ።

¹³ኣነ ኸኣ ህማም እቲ ነንሓድሕዱ ዚጋጮ ዝነበረ ኣኽናፍ እቶም እንስሳን ደሃይ እቲ ኣብ ጥቓኦም ዝነበረ መንኰራዂርን ደሃይ ዓብዪ ምንቅጥቃጥን ሰማዕኩ።

¹⁴እቲ መንፈስ ከኣ ኣልዐለኒ ወሰደኒውን። ብዂራ መንፈሰይ መሪሩኒ ኸድኩ፡ ኢድ እግዚኣብሄር ድማ በርቲዓ ኣብ ልዕለይ ነበረት።

¹⁵ናብቶም ኣብ ጥቓ ርባ ኬባር ኣብ ቴል ኣቢብ ዝነበሩ ምሩኻት፡ ናብቲ ዚነብሩሉ ዘለዉ ኸኣ መጻእኩ። ኣብኡውን እናኣስቈርቈርኩ፡ ሾብዓተ መዓልቲ ኣብ ማእከሎም ተቐመጥኩ።

¹⁶ኰነ ድማ፡ ኣብ መወዳእታ ሾብዓተ መዓልቲ ኸኣ ከምዚ ዚብል ቃል እግዚኣብሄር መጸኒ፡

¹⁷ኣታ ወዲ ሰብ፡ ኣብ ቤት እስራኤል ሓላዊ ገይረካ ኣሎኹ። ካብ ኣፈይ ቃል ስማዕ እሞ፡ ኣብ ክንዳይ ኴንካ ምዐዶም።

¹⁸ኣነ ነቲ ረሲእ፡ ሞት ክትመውት ኢኻ፡ ምስ በልክዎ፡ እንተ ዘይመዐድካዮ፡ ካብ መገዲ ረሲእነቱ ተመሊሱ ነፍሱ ኽትድሕን፡ እንተ ዘይተዛረብካዮን እንተ ዘይመዐድካዮንሲ፡ እቲ ረሲእ ብሓጢኣቱ ኺመውት እዩ፡ ደሙ ግና ካብ ኢድካ ኽደልዮ እየ።

¹⁹ግናኸ ነቲ ረሲእ እንተ መዐድካዮ፡ ንሱ ኸኣ ካብ ረሲእነቱን ካብ መገዲ ረሲእነቱን እንተ ዘይተመልሰ፡ ንሱ ብሓጢኣቱ ኺመውት እዩ፡ ንስኻ ግና ነፍስኻ ኣድሐንካ።

²⁰ጻድቕ ካብ ጽድቁ እንተ ተመልሰ፡ ሓጢኣት ከኣ እንተ ገበረ፡ መዓንቀፊ ኣብ ቅድሚኡ እንተ ኣንበርኩሉ፡ ኪመውት እዩ። ስለ ዘይመዐድካዮ፡ ብሓጢኣቱ ኪመውት፡ እቲ ዝገበሮ ጽድቂ ድማ ኣይኪዝከርን እዩ። ደሙ ግና ካብ ኢድካ ኽደልዮ እየ።

²¹ንስኻ ግና፡ እቲ ጻድቕ ሓጢኣት ከይገብር ነቲ ጻድቕ እንተ መዐድካዮ እሞ ንሱ ሓጢኣት እንተ ዘይገበረ፡ ምዕዶ ስለ እተቐበለ ብሓቂ ብህይወት ኪነብር እዩ፡ ንስኻውን ነፍስኻ ተድሕን።

²²ኢድ እግዚኣብሄር ከኣ ኣብኡ ኣብ ልዕለይ መጸት እሞ፡ ተንስእ፡ ናብ ጐልጐል ውጻእ፡ ኣብኡ ምሳኻ ኽዛረብ እየ፡ በለኒ።

²³ሽዑ ተንሲኤ ናብ ጐልጐል ወጻእኩ። እንሆ ኸኣ፡ ክብሪ እግዚኣብሄር፡ ከምቲ ኣብ ርባ ኬባር ዝርኤኽዎ ኽብሪ፡ ኣብኡ ቘይሙ ነበረ። ብገጸይውን ወደቕኩ።

²⁴እቲ መንፈስ ከኣ ኣተወኒ፡ ብእግረይ ድማ ደው ኣበለኒ እሞ፡ ኪድ ኣብ ቤትካ ተዐጾ፡ ኢሉ ተዛረበኒ።

²⁵ኣታ ወዲ ሰብ፡ እንሆ፡ መእሰሪ ኺገብሩልካን ኪኣስሩኻን እዮም፡ ኣብ ማእከሎም ድማ ኣይክትወጽእን ኢኻ።

²⁶ንሳቶም ዓላዊት ቤት እዮም እሞ፡ ምእንቲ ኽትዕበስን፡ ዘላፊኦም ከይትኸውን ንሲ፡ ልሳንካ ኣብ ትንሓግካ ኸጥብቕ እየ።

²⁷ምስ ዝዛረበካ ግና፡ ንኣፍካ እኸፍቶ፡ ንስኻውን፡ እግዚኣብሄር ኣምላኽ ከምዚ ይብል ኣሎ፡ ክትብሎም ኢኻ። ዓላዊት ቤት እዮም እሞ፡ ዚሰምዕ ይስማዕ፡ ዚኣቢውን ይእበ።