Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 30 Bible Online

ትንቢት ሕዝቅኤል 30 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 30

¹ከምዚ ዚብል ቃል እግዚኣብሄር ከኣ መጸኒ፡

²ኣታ ወዲ ሰብ፡ እግዚኣብሄር ኣምላኽ ከምዚ ይብል ኣሎ፡ ኢልካ ተነበ በልውን፡ መዓልቲ ቐሪባ፡ እወ፡ መዓልቲ እግዚኣብሄር ቀሪባ ኣላ፡ መዓልቲ ደበና፡ ጊዜ ኣህዛብ ኪኸውን እዩ እሞ፡ ኣየ፡ ተካሊት መዓልቲ፡ ኢልኩም ዋይዋይ በሉ።

³ኣታ ወዲ ሰብ፡ እግዚኣብሄር ኣምላኽ ከምዚ ይብል ኣሎ፡ ኢልካ ተነበ በልውን፡ መዓልቲ ቐሪባ፡ እወ፡ መዓልቲ እግዚኣብሄር ቀሪባ ኣላ፡ መዓልቲ ደበና፡ ጊዜ ኣህዛብ ኪኸውን እዩ እሞ፡ ኣየ፡ ተካሊት መዓልቲ፡ ኢልኩም ዋይዋይ በሉ።

⁴ሰይፊ ኣብ ግብጺ ኺመጽእ እዩ፡ እቶም ውጉኣት ኣብ ግብጺ ምስ ወደቑ፡ ሃብታ ምስ ተወስደ፡ መሰረታውን ምስ ፈረሰ፡ ኣብ ኢትዮጵያ ብርቱዕ ፍርሃት ኪኸውን እዩ።

⁵ኢትዮጵያን ፋጥን ሉድን ኲሎም ሕውስዋስ ህዝብን፡ ኩብን ደቂ እታ ኺዳን ዝኣተወት ሃገርን ምሳታቶም ብሰይፊ ኺወድቁ እዮም።

⁶እግዚኣብሄር ከምዚ ይብል ኣሎ፡ እቶም ንግብጺ ዚድግፉ ኺወድቁ እዮም፡ እቲ ዕቡይ ሓይላ ኸኣ ኪዋረድ እዩ። ካብ ሚግዶል ጀሚሩ ኽሳዕ ሴኔ ኣብኣ ብሰይፊ ኺወድቁ እዮም፡ ይብል እግዚኣብሄር ኣምላኽ፡

⁷ኣብ ማእከል እተን ዝባደማ ሃገራት ከኣ ኪባድሙ እዮም፡ ከተማታቶም ድማ ኣብ ማእከል እተን ዝፈረሳ ኸተማታት ኪዀና እየን።

⁸ኣብ ግብጺ ሓዊ ምስ ኣጐድኩ፡ ደገፍታ ዘበሉ ዂሎም ከኣ ምስ ተሰባበሩ፡ ኣነ እግዚኣብሄር ምዃነይ ኪፈልጡ እዮም።

⁹በታ መዓልቲ እቲኣ፡ ነታ ደሓን ኣሎኹ እትብል ኢትዮጵያ ኼሰምብድዋስ፡ ልኡኻት ብመርከብ ካብ ቅድሚ ገጸይ ኪወጹ እዮም። እንሆ፡ ይመጽእ ኣሎ እሞ፡ ከምቲ ብመዓልቲ ግብጺ ዝዀነ ፍርሃት ኪዀኖም እዩ።

¹⁰እግዚኣብሄር ኣምላኽ ከምዚ ይብል ኣሎ፡ ብኢድ ነቡካድነጻር ንጉስ ባቢሎን ነቲ ብዙሕ ህዝቢ ግብጺ ኸጥፍኦ እየ።

¹¹ንሱን ህዝቡ ኸኣ ምስኡን፡ ካብቶም ህዝብታት ኣዝዮም ዚጭክኑ፡ ነታ ሃገር ኬጥፍእዋ ኺወጹ እዮም። ሰይፎም ንግብጺ ኺመልሑላ፡ ነታ ሃገርውን ብቕቱላት ኪመልእዋ እዮም።

¹²ነቲ ርባታት ከንጽፎ፡ ነታ ሃገር ድማ ናብ ኢድ ሕሱማት ሰብ ክሸጣ እየ። ነታ ሃገርን ኣብኣ ዘሎ ዂሉን ብኢድ ጓኖት ገይረ ኸባድሞ እየ። ኣነ እግዚኣብሄር እየ እተዛረብኩ።

¹³እግዚኣብሄር ኣምላኽ ከምዚ ይብል ኣሎ፡ ንጣኦታት ከጥፍኦም፡ ንጣኦታት ከንቱ ኻብ ኖፍ ክጥርሶም እየ። ድሕርዚ ኻብ ሃገር ግብጺ መስፍን ኣይኪኸውንን እዩ፡ ናብ ሃገር ግብጺ ኸኣ ፍርሃት ከምጽእ እየ።

¹⁴ንጳጥሮስ ከባድማ፡ ኣብ ጾዓን ሓዊ ኽኣጒድ፡ ኣብ ኖ ኸኣ ፍርዲ ኽገብር እየ።

¹⁵ነድረይ ከኣ ናብ ሲን፡ እታ ዕርዲ ግብጺ፡ ክኽዑ፡ ንህዝቢ ኖ ድማ ከጽንቶ እየ።

¹⁶ኣብ ግብጺ ሓዊ ኽኣጒድ እየ፡ ሲን ክትጭነቕ እያ፡ ኖ ኽትጠፍእ እያ፡ ንኖፍ ከኣ ጻላእቲ ብመዓልቲ ኺሕዝዋ እዮም።

¹⁷ኣጒባዝ ኣቤንን ፊቤሴትን ብሰይፊ ኺወድቁ እዮም፡ ንሳተን ከኣ ኪማረኻ እየን።

¹⁸ኣርዑት ግብጺ ኣብኣ ምስ ሰበርኩ፡ ሓበን ሓይላውን ምስ ተጠረሰ፡ ኣብ ታህፋኔስ መዓልቲ ኽትጽልምት እያ። ደበና ኼጐልብባ እየ። ኣዋልዳ ድማ ኪማረኻ እየን።

¹⁹ከምዚ ገይረ ኣብ ግብጺ ፍርዲ ኽፈርድ እየ፡ ንሳቶምውን እግዚኣብሄር ምዃነይ ኪፈልጡ እዮም።

²⁰ኣብ መበል ዓሰርተው ሓደ ዓመት፡ ኣብታ ቐዳመይቲ ወርሒ፡ ካብታ ወርሒውን ኣብ ሳብዐይቲ መዓልቲ ኸምዚ ዚብል ቃል እግዚኣብሄር መጸኒ፡

²¹ኣታ ወዲ ሰብ፡ ንቕልጽም ፈርኦን ንጉስ ግብጺ ሰበርክዋ፡ እንሆ ድማ፡ ሰይፊ ንምሓዝ ምእንቲ ኽትድልድል፡ ዚሰፋ፡ ፈውሲ ገይሩ ኸኣ ብዓለባ ዚዝንና የልቦን።

²²ስለዚ እግዚኣብሄር ኣምላኽ ከምዚ ይብል ኣሎ፡ ንፈርኦን ንጉስ ግብጺ ኣብ ርእሱ ኣሎኹ፡ ነተን ቀላጽሙ፡ ነታ ብርትዕትን ነታ ስብርትን፡ ክሰብረን፡ ነቲ ሰይፊ ኸኣ ካብ ኢዱ ኸውድቖ እየ።

²³ነቶም ግብጻውያን ኣብ ማእከል ህዝብታት ክዘርዎም፡ ኣብ ኲለን ሃገራት ከኣ ፋሕ ከብሎም እየ።

²⁴ንቐላጽም ንጉስ ባቢሎን ከበርትዔን፡ ሰይፈይ ድማ ኣብ ኢዱ ኸትሕዞ እየ፡ ንቐላጽም ፈርኦን ግና ክሰብረን እየ፡ ንሱ ድማ ከምቲ ንሞት እተወግኤ ሰብኣይ ዚቚንዞ፡ ኣብ ቅድሚኡ ኪቚንዞ እዩ።

²⁵ንቐላጽም ንጉስ ባቢሎን ከበርትዔን እየ፡ ቀላጽም ፈርኦን ግና ዘርጋሕ ኢለን ኪወድቃ እየን። ንሰይፈይ ኣብ ኢድ ንጉስ ባቢሎን ምስ ኣትሐዝክዎ፡ ንሱውን ኣብ ሃገር ግብጺ ማሕማሕ ምስ ኣበሎ፡ ኣነ እግዚኣብሄር ምዃነይ ኪፈልጡ እዮም።

²⁶ነቶም ግብጻውያን ኣብ ማእከል ህዝብታት ክዘርዎም፡ ኣብ ኲለን ሃገራት ከኣ ፋሕ ከብሎም እየ። ኣነ እግዚኣብሄር ምዃነይ ከኣ ኪፈልጡ እዮም።