Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 35 Bible Online

ትንቢት ሕዝቅኤል 35 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 35

¹ከምዚ ዚብል ቃል እግዚኣብሄር ከኣ መጸኒ፡

²ኣታ ወዲ ሰብ፡ ገጽካ ናብ ከረን ሳዒር ኣብል ተነበየሉ ኸኣ፡

³እግዚኣብሄር ኣምላኽ ከምዚ ይብል ኣሎ፡ ኢልካውን ንገሮ፡ ኣታ ኸረን ሳዒር፡ እኔኩ እጥልቐልካ ኣሎኹ፡ ኢደይ ኣባኻ ኽዝርግሕ እየ እሞ ባዶን በረኻን ክገብረካ እየ።

⁴ንኸተማታትካ ኸዕንወን እየ፡ ንስኻ ድማ ክትባድም ኢኻ፡ ኣነ እግዚኣብሄር ምዃነይውን ክትፈልጥ ኢኻ።

⁵ናይ ሓዋሩ ጽልኢ ስለ ዝነበረካ፡ ንደቂ እስራኤል በቲ ጊዜ ጸበባኦምን በቲ ኣበሳኦም እተፈጸመሉ ጊዜን ንኣደዳ ሰይፊ ስለ ዝወፌኻዮም፡

⁶ስለዚ፡ ኣነ ህያው እየ፡ ይብል እግዚኣብሄር ኣምላኽ፡ ንደም ክውፍየካ እየ፡ ደም ከኣ ኪሰጐካ፡ ደም ኣይጸላእካን እሞ፡ ደም ኪሰጐካ እዩ።

⁷ንኸረን ሳዒር ባዶን በረኻን ክገብሮ፡ ነቲ ብእኡ ዚኸይድን ዚምለስን ድማ ከጽንቶ እየ።

⁸ነኽራኑ ብቕቱላቱ ኽመልኦ እየ። ኣብቲ በረኽትኻን ኣብ ሽንጭሮታትካን ኣብ ኲሉ ርባርባታትካን ብሰይፊ እተቐትሉ ኺወድቁ እዮም።

⁹ንሓዋሩ ምድረ በዳ ኽገብረካ እየ፡ ከተማታትካ ድማ ሰብ ዘይነብረለን ኪዀና እየን። ኣነ እግዚኣብሄር ምዃነይ ከኣ ክትፈልጡ ኢኹም።

¹⁰እግዚኣብሄር ኣብኣ ኸሎስ፡ ንስኻ፡ እዞም ክልተ ህዝብን እዘን ክልተ ሃገርን ናተይ ኪዀኑ፡ ንሕና ኽንወርሶም ኢና፡ ኢልካ ኢኻ እሞ፡

¹¹ስለዚ፡ ኣነ ህያው እየ፡ ይብል እግዚኣብሄር ኣምላኽ፡ ኣነ ኸምቲ ዂራኻን፡ ከምቲ ጸሊእካ ዝገበርካዮም ቅንኣትካን ክገብር እየ። ምስ ፈረድኩኻ ኸኣ፡ ኣብ ማእከሎም ርእሰይ ከፍልጥ እየ።

¹²እቲ ነኽራን እስራኤል፡ በረኻ ዀይኑ፡ ብልዒ ኪኸውን ድማ ንኣና ተወፍዩ እዩ፡ ኢልካ እተዛረብካዮ ዂሉ ጸርፍኻ ኣነ እግዚኣብሄር ከም ዝሰማዕክዎ ኽትፈልጥ ኢኻ።

¹³ንስኻትኩም ብኣፍኩም ከም እተዐቤኹምለይን ዘረባ ኸም ዘብዛሕኩምለይን፡ ሰሚዔዮ ኣሎኹ።

¹⁴እግዚኣብሄር ኣምላኽ ድማ፡ ኲላ ምድሪ ኽትሕጐስ ከላ፡ ኣነ ኸባድመካ እየ፡ ከምቲ ብምብዳም ርስቲ ቤት እስራኤል እተሐጐስካዮ፡ ከምኡ ኸውርደልካ እየ። ኣታ ኸረን ሳዒር፡ ክትባድም ኢኻ፡ ኲላ ኤዶም ብዘላውን ከምኡ፡ ኣነ እግዚኣብሄር ምዃነይ ከኣ ኪፈልጡ እዮም፡ ይብል ኣሎ።

¹⁵እግዚኣብሄር ኣምላኽ ድማ፡ ኲላ ምድሪ ኽትሕጐስ ከላ፡ ኣነ ኸባድመካ እየ፡ ከምቲ ብምብዳም ርስቲ ቤት እስራኤል እተሐጐስካዮ፡ ከምኡ ኸውርደልካ እየ። ኣታ ኸረን ሳዒር፡ ክትባድም ኢኻ፡ ኲላ ኤዶም ብዘላውን ከምኡ፡ ኣነ እግዚኣብሄር ምዃነይ ከኣ ኪፈልጡ እዮም፡ ይብል ኣሎ።