Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 36 Bible Online

ትንቢት ሕዝቅኤል 36 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 36

¹ኣታ ወዲ ሰብ፡ ነኽራን እስራኤል ተነበየሎም፡ ኣቱም ኣኽራን እስራኤል፡ ቃል እግዚኣብሄር ስምዑ፡ ከኣ በሎም።

²እግዚኣብሄር ኣምላኽ ከምዚ ይብል ኣሎ፡ እቲ ጸላኢ፡ ኣሰይ፡ እቲ ናይ ጥንቲ በረኽቲ ርስትና ዀነ፡ ኢሉ ብዛዕባኹም ተዛሪቡ እዩ እሞ፡

³ስለዚ ተነበ፡ እግዚኣብሄር ኣምላኽ ከምዚ ይብል ኣሎ፡ ኢልካውን ንገር፡ ነቶም ዝተረፉ ህዝብታት ርስቶም ምእንቲ ኽትኰኑስ፡ ንሳቶም ብዂሉ ወገን ኣባዲሞምኹምን ወሒጦምኹምን፡ መዛረብ ልሳንን መሕመዪ ህዝብን ከኣ ኴንኩም ኢኹም እሞ፡

⁴ስለዚ፡ ኣቱም ኣኽራን እስራኤል፡ ቃል እግዚኣብሄር ስምዑ፡ እግዚኣብሄር ኣምላኽ ነኽራንን ንዂድዂዶታትን ንርባታትን ንሽንጭሮታትን ንዝባደመ ዑናታትን ነተን እተሀድጋ እሞ ነቶም ኣብ ዙርያኤን ዝተረፈ ህዝብታትሲ ንዘመተን ልግጫን ኰይነን እተወፈያ ኸተማታትን ከምዚ ይብል ኣሎ፡

⁵ስለዚ እግዚኣብሄር ኣምላኽ ከምዚ ይብል ኣሎ፡ ነቶም ብምሉእ ልቦም ተሐጒሶም፡ ብነፍሶም ንዒቖም፡ ዘመተ ኽትከውንሲ፡ ነታ ሃገረይ እተረስተይዋ ተረፍ ህዝብታትን፡ ብዘሎ ኤዶምን ብሓዊ ቕንኣተይ ተዛረብኩ።

⁶እምበኣርሲ ነኽራንን ንዂድዂዶታትን ንርባታትን ንሽንጭሮታትን፡ እግዚኣብሄር ኣምላኽ፡ እንሆ፡ ንስኻትኩም ነውሪ ህዝብታት ስለ እተሰከምኩም፡ ኣነ ብቕንኣተይን ብነድረይን ተዛረብኩ፡ ይብል ኣሎ ኢልካ ብዛዕባ ሃገር እስራኤል ተነበ።

⁷ስለዚ እግዚኣብሄር ኣምላኽ ከምዚ ይብል ኣሎ፡ ኣነ ኢደይ ኣልዒለ እየ፡ እዞም ኣብ ከባቢኹም ዘለዉ ህዝብታት ንሳቶም ነውሮም ኪስከሙ እዮም።

⁸ግናኸ፡ ኣቱም ኣኽራን እስራኤል፡ እኔኹ ናባኻትኩም ክመጽእ፡ ናባኻትኩምውን ክብል እየ። ንስኻትኩም ከኣ ክትሕረሱን ክትዝርኡን ኢኹም እሞ፡ ምምላሶም ስለ ዝቐረበ፡ ንህዝበይ እስራኤል ጨናፍርኩም ኪጭብጭብ፡ ፍሬኹም ከኣ ኪፈሪ እዩ።

⁹ግናኸ፡ ኣቱም ኣኽራን እስራኤል፡ እኔኹ ናባኻትኩም ክመጽእ፡ ናባኻትኩምውን ክብል እየ። ንስኻትኩም ከኣ ክትሕረሱን ክትዝርኡን ኢኹም እሞ፡ ምምላሶም ስለ ዝቐረበ፡ ንህዝበይ እስራኤል ጨናፍርኩም ኪጭብጭብ፡ ፍሬኹም ከኣ ኪፈሪ እዩ።

¹⁰ኣባኻትኩም ንዂላ ብዘላ ቤት እስራኤል ከኣ ሰብ ከብዝሓላ እየ። ከተማታት ኪስፈር፡ ዑናታት ድማ ኪሰራሕ እዩ።

¹¹ኣነ ኸኣ ኣባኻትኩም ሰብን እንስሳን ከብዝሕ እየ፡ ንሳቶም ድማ ኪባዝሑን ኪፋረዩን እዮም። ከምቲ ናይ ቀደምኩም መሓድር ክገብረኩም እየ፡ ካብቲ ናይ መጀመርታኹም ዝበለጸ ኸኣ ሰናይ ክገብረልኩም እየ። ኣነ እግዚኣብሄር ምዃነይውን ክትፈልጡ ኢኹም።

¹²ንሰብ፡ ህዝበይ እስራኤል፡ ኣባኻትኩም ከመላልሶም እየ። ኪወርሱኻ እዮም፡ ርስቶም ከኣ ክትከውን ኢኻ፡ ድሕርዚውን ውሉድ ዜብሎም ኣይክትገብሮምን ኢኻ።

¹³እግዚኣብሄር ኣምላኽ ከምዚ ይብል ኣሎ፡ ሰብ በሊዕኪ፡ ንህዝብኺ ኸኣ ውሉድ ዜብሉ ጌርክዮ ኢኺ፡ ይብሉኹም ኣለዉ እሞ፡

¹⁴ስለዚ ድሕርዚ ሰብ ኣይክትበልዕን፡ ንህዝብኺውን ውሉድ ዜብሉ ኣይክትገብርዮን ኢኺ፡ ይብል እግዚኣብሄር ኣምላኽ።

¹⁵ደጊምሲ ነውሪ ኣህዛብ ኣይከስምዓክን እየ፡ ልግጫ ህዝብታት ኣይክትጾርን፡ ድሕርዚውን ንህዝብኺ ኣይከተዐንቅፍዮምን ኢኺ፡ ይብል እግዚኣብሄር ኣምላኽ።

¹⁶ከምዚ ዚብል ቃል እግዚኣብሄር ከኣ መጸኒ፡

¹⁷ኣታ ወዲ ሰብ፡ ቤት እስራኤል ኣብ ሃገሮም ከለዉ፡ ብመገዶምን ግብሮምን የርክስዋ ነበሩ። መገዶም ኣብ ቅድመይ ከም ርኽሰት ጽግያት ሰበይቲ ነበረ።

¹⁸ሽዑ ብሰሪ እቲ ኣብታ ሃገር ዝኸዐውዎ ደምን ብጣኦታቶም ከኣ ስለ ዘርከስዋን ኲራይ ከዖኹሎም።

¹⁹ኣብ ማእከል ህዝብታት ዘሮኽዎም፡ ኣብ ሃገራት ከኣ ፋሕ በሉ፡ ኣነውን ከም መገዶምን ከም ግብሮምን ፈረድክዎም።

²⁰ብዛዕባኦም ከኣ፡ እዚኣቶም ይኣይ ህዝቢ እግዚኣብሄር እዮም፡ ካብ ሃገሩውን ወጺኦም፡ እናተባህለስ፡ ኣብ ዘዝኣተውዎም ኣህዛብ ምስ በጽሑ፡ ነቲ ቅዱስ ስመይ ኣርከስዎ።

²¹ኣነ ግና ነቲ ቤት እስራኤል ኣብ ዘዝኣተውዎም ህዝብታት ዘርከስዎ ቅዱስ ስመይ ነሐፍክዎ።

²²ስለዚ፡ እግዚኣብሄር ኣምላኽ ከምዚ ይብል ኣሎ፡ ኢልካ ንቤት እስራኤል ንገሮም፡ ኣቱም ቤት እስራኤል፡ እዚ ምእንቲ እቲ ኣብ ዘዝኣቶኹምዎም ህዝቢ ዘርከስኩምዎ ቅዱስ ስመይ እዩ እምበር፡ ምእንታኹም ኣይኰንኩን ዝገብሮ ዘሎኹ።

²³ነቲ ኣብ ህዝብታት ዝረኸሰ፡ ኣብ ማእከሎም ከኣ ዘርከስኩምዎ ዓብዪ ስመይ ክቕድሶ እየ። ኣብ ቅድሚ ኣዒንቶም ኣባኻትኩም ምስ ተቐደስኩ ኸኣ፡ እቶም ህዝብታት ኣነ እግዚኣብሄር ምዃነይ ኪፈልጡ እዮም፡ ይብል እግዚኣብሄር ኣምላኽ።

²⁴ካብ ህዝብታት ከምጽኣኩም፡ ካብ ኲሉ ሃገራት ከኣ ክኣኻኽበኩም፡ ናብ ሃገርኩምውን ክመልሰኩም እየ።

²⁵ጽሩይ ማይ ክነጽገልኩም እየ እሞ ክትጸርዩ ኢኹም። ካብ ኲሉ ርኽሰትኩምን ካብ ኲሎም ጣኦታትኩምን ከጽርዩአኩም እየ።

²⁶ሓድሽ ልቢ ድማ ክህበኩም፡ ሓድሽ መንፈስ ከኣ ከሕድረልኩም፡ ናይ እምኒ ልቢ ኻብ ስጋኹም ከውጽእ፡ ናይ ስጋ ልቢውን ክህበኩም እየ።

²⁷ንመንፈሰይ ኣብ ውሽጥኹም ከሕድሮ፡ ብትእዛዘይ ከመላልሰኩም፡ ፍርደይ ከሐልወኩምን ከግብረኩምን እየ።

²⁸ኣብታ ነቦታትኩም ዝሀብክዋ ሃገር ክትነብሩ፡ ህዝቢ ኸኣ ክትኰኑኒ ኢኹም፡ ኣነውን ኣምላኽ ክዀነኩም እየ።

²⁹ካብ ኲሉ ርኽሰትኩም ከኣ ከናግፈኩም፡ ንእኽሊ ኽጽውዖን ከብዝሖን እየ፡ ድሕርዚውን ጥሜት ኣይከምጽኣልኩምን እየ።

³⁰ድሕርዚ ኣብ ማእከል ህዝብታት ጸርፊ ጥሜት ከይትጾሩስ፡ ፍረ ኦምን ፍርያት ግራትን ከብዝሖ እየ።

³¹ሽዑ ነቲ እኩይ መገድታትኩምን ነቲ ዘይሰናይ ተግባርኩምን ክትዝክሩ፡ ብሰሩ ኣበሳኹምን ጽያፍኩምን ከኣ ንርእስኹም ክትፍንፍኑ ኢኹም።

³²እቱም ቤት እስራኤል፡ እዚ ምእንታኹም ኢለ ኸም ዘይገብሮ፡ ኣባኻትኩም ይፈለጥ፡ ብሰሪ መገድታትኩም ሕፈሩን ነውሩን፡ ይብል እግዚኣቢሄር ኣምላኽ።

³³እግዚኣብሄር ኣምላኽ ከምዚ ይብል ኣሎ፡ በታ ኣነ ንኣኻትኩም ካብ ኲሉ ኣበሳኹም ዘንጽሃላ መዓልቲ፡ ነተን ከተማታት ሰብ ከም ዚነብረን፡ እቲ ዑናታት ከኣ ከም ዚስራሕ ክገብር እየ።

³⁴እታ ዝባደመት ምድሪ፡ ኣብ ክንዲ እቲ ኣብ ቅድሚ ዓይኒ ዂሎም ሓለፍቲ መገዲ ባዲማቶ ዝነበረት፡ ክትሕረስ እያ።

³⁵ሽዑ ኸኣ፡ እዛ ባዲማ ዝነበረት ምድሪ ኸም ገነት ኤድን ኰነት፡ እተን ዝባደማን ዝዐነዋን ዝፈረሳን ከተማታት ድማ እተዐርዳን፡ ሰብ ዚነብሩለንን ኰና፡ ኪበሀል እዩ።

³⁶እቶም ኣብ ከባቢኹም ዝተረፉ ህዝብታት ከኣ ኣነ እግዚኣብሄር ነቲ ዝፈረሰ ኸም ዝሰራሕክዎ፡ ነቲ ዝበረሰውን ከም ዝተኸልክዎ ኺፈልጡ እዮም። ኣነ እግዚኣብሄር ተዛሪበ ኣሎኹ፡ ክገብሮ ድማ እየ።

³⁷እግዚኣብሄር ኣምላኽ ከኣ ከምዚ ይብል ኣሎ፡ ምስናይ እዚ፡ ንቤት እስራኤል እዚ ኽገብረሎምሲ ኽልመነሎም እየ። ነቶም ሰብ ከም መጓሴታት ኣባጊዕ ከብዝሖም እየ።

³⁸ከምተን እተቐደሳ መጓሰ፡ ከምተን መጓሰ የሩሳሌም ኣብቲ በዓላታ ኸምኡ እተን ዝባደማ ኸተማታት ብመጓሴታት ሰብ ኪመልኣ እየን። ኣነ እግዚኣብሄር ምዃነይ ከኣ ኪፈልጡ እዮም።