Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 40 Bible Online

ትንቢት ሕዝቅኤል 40 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 40

¹ካብ እንማረኽ ኣብ መበል ዕስራን ሓሙሽተን ዓመት፡ ኣብ መጀመርታ እታ ዓመት፡ ኣብ ዓስረይቲ መዓልቲ እታ ወርሒ፡ እታ ኸተማ ኻብ እትተሓዝ ኣብ መበል ዓሰርተው ኣርባዕተ ዓመታ፡ ልክዕ በታ መዓልቲ እቲኣ ኢድ እግዚኣብሄር ኣብ ልዕለይ መጸት፡ ንሱውን ናብ ንየው ወሰደኒ።

²ብራእይ ኣምላኽ ናብታ ሃገር እስራኤል ወሰደኒ፡ ኣብ ነዊሕ ከረን ከኣ ኣንበረኒ። ኣብኡውን ብወገን ደቡብ ከም ህኑጽ ከተማ ነበረ።

³ንብኣ ኸኣ ወሰደኒ፡ እንሆ ድማ፡ ከም ኣስራዚ ዝትርኢቱ ሰብኣይ፡ ናይ ልሕጺ እንጣጢዕ ገመድን ዚእምተሉ ዘንግን ኣብ ኢዱ ሒዙ፡ ኣብታ ደገውን ደው ኢሉ ነበረ።

⁴እዚ ሰብኣይ እዚ ኸኣ፡ ኣታ ወዲ ሰብ፡ ምእንቲ ኸርእየካ፡ ናብዚ ተመሪሕካ ኢኻ እሞ፡ ነቲ ኣብ ዝርእየካ ዘበለ ዂሉ በዒንትኻ ጠምቶ፡ በእዛንካ ድማ ስምዓዮ፡ ብልብኻ ኸኣ ኣቕልበሉ። እቲ ዝርኤኻዮ ዂሉውን ንቤት እስራኤል ንገሮም፡ በለኒ።

⁵እንሆ ኸኣ፡ ነታ ቤት ብወጻኢ መንደቕ ከቢብዋ ነበረ። እቲ ሰብኣይ ኣብ ኢዱ ሒዝዋ ዝነበረ መኣመቲት ሻምብቆ ኸኣ ምንዋሓ ሹድሽተ እመት እያ። እተን እመት ድማ ኤእመትን ስድርን እየን። ንሱ ወርዲ እቲ መንደቕ ኣመተ፡ ሓንቲ ሻምብቆ ዀነ፡ ቊመቱውን ሓንቲ ሻምብቆ።

⁶ድሕርዚ ናብታ ኣብ ወገን ምብራቕ ዘላ ደገ መጸ፡ ብደረጃታታ ኸኣ ደየበ። ነታ መድረኽ እታ ደገ ድማ ኣመታ፡ ወርዳ ሓንቲ ሻምብቆ ዀነት፡ እታ ኻልኣይቲውን ወርዳ ሓንቲ ሻምብቆ።

⁷ነፍሲ ወከፍ እቃቤት ከኣ ምንዋሓ ሓንቲ ሻምብቆ፡ ወርዳ ድማ ሓንቲ ሻምብቆ እያ። ምርሕሓቕ እተን እቃቤታት ከኣ ሐሓሙሽተ እመት እዩ። እታ ኣብታ ናይ ደገ ገበላ ዘላ መድረኽ እታ ደገ ብወገን ውሽጢውን ሓንቲ ሻምብቆ ዀነት።

⁸ነቲ ብወገን ውሽጢ ዘሎ ገበላ እታ ደገ ኣመተ፡ ሓንቲ ሻምብቆውን ኰነ።

⁹ንገበላ እታ ደገ ኣመቶ፡ ሾሞንተ እመት ከኣ ዀነ። ኣዕኑድ ሰቕሰቓ ድማ ከክልተ እመት ኰነ፡ ገበላ እታ ደገውን ብወገን ውሽጢ እዩ።

¹⁰እተን ናይቲ ናብ ምብራቕ ዜብል ደገ እቃቤታ ሰለስተ በዚ ሰለስተ ድማ በቲ እየን። ሰለስቲኤን ልክዕ ሓደ ስፍሪ እየን፡ እተን ኣዕኑድ ከኣ በዝን በትን ልክዕ ሓደ ስፍሪ እየን።

¹¹ወርዲ እታ ኣፍ ደገ ኣመቶ፡ ዓሰርተ እመት ከኣ ዀነ። ምንዋሕ እታ ደገ ድማ ዓሰርተው ሰለስተ እመት ኰነ።

¹²ኣብ ቅድሚ እተን እቃቤታት ዘሎ ሕዳጋት ድማ ሓንቲ እመት በዚ ሓንቲ እመትውን በቲ እዩ። እተን እቃቤታት ከኣ በዚ ወገን እዝን በቲ ወገን እትን ሸሹድሽተ እመት እዩ።

¹³ነታ ደገ ኻብ ናሕሲ እታ ሓንቲ እቃቤት ክሳዕ ናሕሲ እታ ኻልኣይቲ ኣመተ፡ ወርዱ ኸኣ፡ ካብ ደገ ንደገ ዕስራን ሓሙሽተን እመት ኰነ።

¹⁴ነቲ ኣዕኑድ ሰቕሰቕ ድማ ብዙርያኡ ኽሳዕ እቲ ዓንዲ ኣጸድ ደገ ስሳ እመት ገበሮ።

¹⁵ካብ ግምባር እታ ኣፍ ደገ ኽሳዕ ግምባር ገበላ እታ ውሽጣዊት ደገ ድማ ሓምሳ እመት እዩ።

¹⁶ኣብተን እቃቤታትን ኣብተን ኣብ ውሽጢ ደገ ዘለዋ ኣዕኑድን ብዂሉ ዙርያኤን ዓይነ ርግቢ ዘለዎ መሳዂቲ ነበረን። ከምኡውን ኣብተን ገበላታት ብወገን ውሽጢን ብዂሉ ዙርያኤን መሳዂቲ ነበረን። ኣብ ልዕሊ እተን ኣዕኑድ ከኣ ስየታት ነበረ።

¹⁷ናብቲ ወጻኢ ኣጸድ ድማ ወሰደኒ፡ እንሆ ኸኣ፡ ኣብኡ ኽፍልታት ኣባይቲ ነበረ፡ ዙርያ እቲ ኣጸድውን ብእምኒ ተነጺፉ ነበረ። ኣብቲ እምኒ እተነጽፎ ድማ ሰላሳ ኽፍሊ ቤት ነበረ።

¹⁸እቲ ብእምኒ እተነጽፈ ምድሪ ኣብ ጥቓ ደጌታት እዩ፡ ልክዑ ኸኣ ከም ምንዋሕ እቲ ደጌታት እዩ። እዚ እቲ ታሕታይ ብእምኒ እተነጽፈ ምድሪ እዩ።

¹⁹ካብ ቅድሚ እታ ታሕተይቲ ደገ ሒዙ ኽሳዕ እታ ውሽጣዊት ኣጸድ ብወጻኢ ነቲ ወርዳ ኣመቶ፡ ብወገን ምብራቕን ሰሜንን ከኣ መሚእቲ እመት እዩ።

²⁰ነቲ ንሰሜን ገጹ ዘሎ ናይ ወጻኢ ኣጸድ ደገ ምንዋሑን ወርዱን ኣመተ።

²¹እቃቤታቱ ሰለስተ በዚ፡ ሰለስተ ኸኣ በቲ ስፍሪ እታ ቐዳመይቲ ደገ፡ ምንዋሑ ሓምሳ እመት፡ ወርዱውን ዕስራን ሓሙሽተን እመት እዩ።

²²መሳዂታን ገበላኣን ስየታታን ብልክዕ እታ ናብ ምብራቕ እተብል ደገ እዩ። መደያይቦኣ ኸኣ ሾብዓተ ደረጃ እዩ፡ ገበላታታ ድማ ኣብ ቅድሚኡ ነበረ።

²³ደገ እታ ውሽጣዊት ኣጸድ ድማ በንጻር እተን ንምብራቕን ንሰሜንን ዚርእያ ደጌታት እያ። ካብታ ሓንቲ ደገስ ክሳዕ እታ ሓንቲ ደገ ኣመተ፡ ሚእቲ እመት ከኣ ዀነ።

²⁴ድሕርዚ ናብ ደቡብ ኣቢሉ መርሓኒ፡ እንሆ ኸኣ፡ ናብ ደቡብ እትርኢ ደገ እያ። ነዕኑዳን ገበላታታን ከኣ ክንዲ እተን መስፈሪ ኣመተን።

²⁵ከምተን መሳዂቲ ኸኣ ኣብኣን ኣብ ዙርያ ገበላታታን መሳዂቲ ነበራ። ምንዋሓ ሓምሳ እመት፡ ወርዳውን ዕስራን ሓሙሽተን እመት እዩ።

²⁶መደያይቦኣ ኸኣ ሾብዓተ ደረጃ እዩ፡ ገበላታታ ድማ ኣብ ቅድሚኡ እዩ። ኣብ ርእሲ ኣዕኑዱ ኸኣ ስየታት፡ ሓደ በዚ፡ ሓደ በቲ ነበረ።

²⁷እታ ውሽጣዊት ኣጸድ ብወገን ደቡብ ደገ ኣለዋ። ካብታ ሓንቲ ደገስ ናብታ ሓንቲ ኣብ ወገን ደቡብ ዘላ ደገ ኣመተ፡ ሚእቲ እመት ከኣ ዀነ።

²⁸በታ ደገ ደቡብ ኣቢሉ ድማ ናብታ ውሽጣዊት ኣጸድ ኣእተወኒ። ነታ ደገ ድቡብ ከኣ ክንዲ እተን መስፈሪ ኣመታ።

²⁹እቃቤታታን ኣዕኑዳን ገበላታታን ከኣ ክንዲ እቲ መስፈሪ እዩ። ኣብኣን ኣብ ዙርያ ገበላታታን ድማ መሳዂቲ ኣለዋ። ምንዋሓ ሓምሳ እመት፡ ወርዳውን ዕስራን ሓሙሽተን እመት እዩ።

³⁰ዕስራን ሓሙሽተን እመት ዝምንዋሑ፡ ሓሙሽተ እመት ከኣ ዝወርዱ ገበላታት ብዙርያኣ ኣሎ።

³¹ገበላታቱ ናብቲ ኣብ ወጻኢ ዘሎ ኣጸድ ኣቢሉ እዩ። ኣብ ርእሲ ኣዕኑድ ሰቕሰቑ ኸኣ ስየታት ኣሎ፡ መደያይቦኡ ሾሞንተ ደረጃ እዩ።

³²ናብታ ኣብ ምብራቕ ዘላ ውሽጣዊት ኣጸድ ወሰደኒ እሞ ነታ ደገ ክንዲ እቲ መስፈሪ ኣመታ።

³³እቃቤታታን ኣዕኑድ ሰቕሰቓን ገበላታታን ክንዲ እቲ መስፈሪ እዩ፡ ኣብአን ኣብ ዙርያ ገበላታታን መሳዂቲ ኣሎ። ምንዋሓ ሓምሳ እመት፡ ወርዳ ኸኣ ዕስራን ሓሙሽተን እመት እያ።

³⁴ገበላታታ ናብቲ ኣብ ወጻኢ ዘሎ ኣጸድ ኣቢሉ እዩ። ኣብ ርእሲ ኣዕኑዳ ድማ ስየታት በዝን በትን ኣሎ። መደያይቦኣውን ሾሞንተ ደረጃ እዩ።

³⁵ናብ ሰሜናዊት ደገ ወሰደኒ፡ ክንዲ እቲ መስፈሪ ኸኣ ኣመቶ፡

³⁶እቃቤታታን ኣዕኑድ ሰቕሰቓን ገበላታታን ከኣ ከምኡ፡ መሳዂቲውን ብዙርያኣ ኣሎ። ምንዋሓ ሓምሳ እመት፡ ወርዳ ድማ ዕስራን ሓሙሽተን እመት እዩ።

³⁷ኣዕኑድ ሰቕሰቓ ናብቲ ኣብ ወጻኢ ዘሎ ኣጸድ ኣቢሉ እዩ፡ ኣብ ርእሲ ኣዕኑዳ ኸኣ በዝን በትን ስየታት ኣሎ፡ መደያይቦኣውን ሾሞንተ ደረጃ እዩ።

³⁸ኣብ ጥቓ እተን ኣዕኑድ ሰቕሰቕ ደጌታት ድማ ሓንቲ ኽፍሊ ቤት ምስ መእተዊኣ ኣላ። ኣብኣውን መስዋእቲ ምሕራር ይሐጽቡ ነበሩ።

³⁹ኣብታ ገበላ ደገ ኸኣ፡ መስዋእቲ ምሕራርን መስዋእቲ ሓጢኣትን መስዋእቲ ዕዳን ዚሐርዱሉ ኽልተ ሰደቓ በዚ፡ ክልተ ሰደቓ ድማ በቲ ኣሎ።

⁴⁰ኣብ ጥቓ እቲ ብወጻኢ ዘሎ ናብ ደገ ሰሜን ዜደይብ መደያይቦ ኸኣ ክልተ ሰደቓ ኣሎ፡ ኣብቲ ኻልእ ወገን እታ ገበላ ደገ ድማ ክልተ ሰደቓ ኣሎ።

⁴¹እምበኣርስ ኣብ ጥቓ እታ ደገ ኣርባዕተ ሰደቓ በዚ፡ ኣርባዕተ ሰደቓ ኸኣ በቲ ኣሎ። እዚ መስዋእቲ ዚሐርዱሉ ሾሞንተ ሰደቓ እዩ።

⁴²ንመስዋእቲ ምሕራር ዚኸውን ካብ ውቑር እምኒ እተገብረ ኣርባዕተ ሰደቓ ኣሎ። ምንዋሑ እመትን ስድርን፡ ወርዱ እመትን ስድርን፡ ምብራኹ ሓደ እመት እዩ። ኣብኡውን ነቲ ንመስዋእቲ ምሕራርን ንመስዋእትን ዚሐርዱሉ መሳርያ ዚንበሮ እዩ።

⁴³ሰስድሪ ዝምንዋሑ ኲላባት ብውሽጢ ኣብ ዙርያኡ ተጋጢሙ ኣሎ። እዚ ሰደቓታት እዚ እቲ ስጋ መስዋእቲ ዚንበሮ እዩ።

⁴⁴ኣብ ውሽጣዊ ኣጸድ ኣብ ውጻኢ እታ ውሽጣዊት ደገ ኸኣ ንመዘምራን እተገብረ ኽፍልታት ኣባይቲ ኣሎ። ሓንቲ ኣብ ጥቓ እታ ሰሜናዊት ደገ ኣላ፡ ገጻ ድማ ናብ ደቡብ ኣቢላ እያ። እታ ሓንቲውን ኣብ ጥቓ እታ ምብራቓዊት ደገ ኣላ፡ ገጻ ኸኣ ናብ ሰሜን ኣቢላ እያ።

⁴⁵ንሱውን በለኒ፡ እዛ ንደቡብ ኣቢላ ዘላ ኽፍሊ ቤት ነቶም ነታ ቤት ኬገልግሉ እተመዘዙ ኻህናት እያ።

⁴⁶እዛ ንሰሜን ኣቢላ ዘላ ኽፍሊ ቤት ድማ ነቶም ኣብታ መሰውኢ ኼገልግሉ ዚነቕሑ ኻህናት እያ። ንሳቶም ኬገልግልዎ ናብ እግዚኣብሄር ዚቐርቡ ኻብ ደቂ ሌስ ደቂ ጻዶቅ እዮም።

⁴⁷ነቲ ኣርባዕተ ዝመኣዝኑ ኣጸድ ኣመቶ፡ ምንዋሑ ሚእቲ እመት፡ ወርዱውን ሚእቲ እመት እዩ። እቲ መሰውኢ ኸኣ ኣብ ቅድሚ እታ ቤት እዩ ዘሎ።

⁴⁸ናብ ገበላ እታ ቤት ከኣ ወሰደኒ፡ ነቲ ኣዕኑድ ሰቕሰቕ እታ ገበላ ድማ ኣመቶ፡ ሓሙሽተ እመት በዚ፡ ሓሙሽተ እመትውን በቲ እዩ። ወርዲ እታ ደገ ኸኣ ሰለስተ እመት በዚ፡ ሰለስተ እመት በቲ እዩ።

⁴⁹ምንዋሕ እታ ገበላ ዕስራ እመት፡ ወርዲ ኸኣ ዓሰርተው ሓደ እመት እዩ፡ በቲ ደረጃታት ድማ ይድይብዋ ነበሩ። ኣብ ጥቓ እቲ ኣዕኑድ ሰቕሰቕ ከኣ ሓደ በዚ፡ ሓደውን በቲ ኣዕኑድ ኣሎ።