Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 41 Bible Online

ትንቢት ሕዝቅኤል 41 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 41

¹ናብታ መቕደስ ድማ ኣእተወኒ። ነቲ ዓንዲ ሰቕሰቕውን ኣመቶ፡ እቲ ወርዱ ኸም ወርዲ እታ ድንኳን፡ ሹድሽተ እመት በዚ፡ ሹድሽተ እመት ከኣ በቲ ዀነ።

²ወርዲ እታ ኣፍ ደገ ኸኣ ዓሰርተ እመት እዩ፡ ገንዚ እታ ኣፍ ደገ ድማ ሓሙሽተ እመት በዚ፡ ሓሙሽተ እመት ከኣ በቲ እዩ። ምንዋሓ ኣርብዓ እመት፡ ወርዳውን ዕስራ እመት ኣመተ።

³ድሕርዚ ናብ ውሽጢ ኣተወ እሞ ንሰቕሰቕ እታ ኣፍ ደገ ኽልተ እመት፡ ነታ ኣፍ ደገ ኸኣ ሹድሽተ እመት፡ ወርዲ እታ ኣፍ ደገውን ሾብዓተ እመት ኣመቶ።

⁴ነቲ ቕድሚ መቕደስ ምንዋሑ ዕስራ እመት፡ ወርዱ ኸኣ ዕስራ እመት ኣመቶ። እዚኣ እታ ቅድስተ ቅዱሳን እያ። ከኣ በለኒ።

⁵ድሕርዚ መንደቕ እታ ቤት ሹድሽተ እመት ኣመተ። ኣብ ዙርያ እታ ቤት ብዂሉ ወገና ዘለዋ ኽፍልታት ኣባይቲ ኸኣ ወርደን ኣኣርባዕተ እመት ኣመተ።

⁶እተን ብጎቦታታ ዝነበራ ኽፍሊ ኣባይቲ ሓደ ኣብ ልዕሊ እቲ ሓደ ሰለስተ ደርቢ ዘለወን ሰላሳ እየን። ኣብ መንደቕ እታ ቤት ከይተጸግዓስ፡ ኣብቲ ኣብ ዙርያ ኽፍልታት ኣባይቲ ዘሎ መንደቕ እታ ቤት ኪጽግዓ፡ ኣብኡ ተጋጢመን እየን።

⁷ኣብ ዙርያ እታ ቤት ካብ ደርቢ ናብ ደርቢ ዚዘውር መደያይቦ ነበረ እሞ፡ እቲ ኽፍልታት ኣባይቲ ብዙርያ ንላዕሊ ኣቢሉ ብዝወጸሉ መጠን እናገፍሔ እዩ ዚኸይድ። ስለዚ ምግፋሕ እታ ቤት ናብ ላዕሊ ኣቢሉ እዩ። ከምኡውን ካብ ታሕትስ ንላዕሊ ብማእከላይ ኣቢሉ መደየቢ ኣለዋ።

⁸ኣነ ኸኣ ነታ ቤት ብዙርያኣ ልዕል ዝበለ መሰረት ከም ዘለዋ ርኤኹ። እቲ መሰረታ እተን ብጎቦ ዝነበራ ኽፍልታት ኣባይቲ ድማ በታ ወምብቆ ሹድሽተ እመት ልክዕ እዩ።

⁹እተን ብጎቦ ዘለዋ ኽፍልታት ኣባይቲ እተሀንጸሉ መንደቕ፡ ወርዱ ብወጻኢ ሓሙሽተ እመት እዩ። ኣብ መንጎ እተን ብጎቦ ዝነበራ ኽፍልታት ኣባይቲ ኸኣ ንኣምፉ ዚነብር ቦታታት ኣሎ።

¹⁰ኣብ መንጎ እተን ክፍልታት ኣባይቲ ድማ ብዙርያ እታ ቤት ዔዕስራ እመት እዩ።

¹¹ደጌታት እተን ብጎቦ ዘለዋ ኽፍልታት ኣባይቲ ኸኣ ናብቲ ንኣምፉ ዚነብር ቦታታት፡ ሓንቲ ደገ ንሰሜን፡ ሓንቲ ኸኣ ንደቡብ ኣቢለን እየን። እቲ ንኣምፉ ዘሎ ቦታ ኸኣ ብዙርያኡ ወርዱ ሐሓሙሽተ እመት እዩ።

¹²እቲ ኣብ ቅድሚ እቲ ንኣምፉ ዘሎ ሕዳግ እተሀንጸ ንምዕራብ ወገኑ ወርዱ ሰብዓ እመት እዩ። ናይቲ እተሀንጸ ገንዚ መንደቕ ብዙርያኡ ሓሙሽተ እመት እዩ፡ ምንዋሑ ኸኣ ተስዓ እመት እዩ።

¹³ነታ ቤት ድማ ኣመታ፡ ምንዋሓ ሚእቲ እመት ኰነት። እቲ ንኣምፉ ዘሎ ቦታን እቲ ህኑጽን መንደቑን ከኣ ምንዋሑ ሚእቲ እመት ኰነ።

¹⁴ቅድሚት እታ ቤት ምስ ናይ እቲ ናብ ምብራቕ ኣቢሉ ንኣምፊ ዘሎ ቦታ፡ ወርዱ ሚእቲ እመት እዩ።

¹⁵ንሱ ኸኣ ነቲ ኣብ ቅድሚት እቲ ንኣምፉ ዝዀነ ቦታ ኽሳዕ እቲ ብወገን ድሕሪት ዘሎ ህንጻን፡ ነቲ በዝን በትን ዘሎ መተሓላለፊኡን ኣመቶ፡ ምንዋሑ ድማ ሚእቲ እመት ኰነ። እታ ውሽጣዊት መቕደስን እቲ ገበላታት እቲ ኣጸድን፡

¹⁶መድረኻትን እቲ ብሽቦ እተገብረ መሳዂትን እቲ ኣብ ዙርያ እተን ሰለስተ ደርብታት ዘሎ መተሓላለፍን ኣንጻር እቲ ልዳት፡ ካብ ምድሪ ጀሚሩ ኽሳዕ እቲ መሳዂቲ ብዙርያኡ ብሉሕ ተኸዲኑ እዩ፡ እቲ መሳዂቲ ድማ ክዱን እዩ።

¹⁷ካብ ልዕሊ እታ ደገ ኽሳዕ እታ ውሽጣዊት ቤት፡ ብወጻእን ብዙርያ ዂሉ እቲ መንደቕን፡ ብኣታዊኡን ብወጻኢኡን ብልክዕ እዩ።

¹⁸ኪሩቤልን ስየን ተቐሪጽዎ ኣሎ። ኣብ መንጎ ኪሩቤልን ኪሩቤልን ከኣ ሓንቲ ስየ ኣላ። ነፍሲ ወከፍ ኪሩቤል ከኣ ከክልተ ገጽ ኣለዎ።

¹⁹ነታ ስየስ ናብዚ ወገና ገጽ ሰብ፡ ነታ ስየስ ናብቲ ወገና ኸኣ ገጽ ኣንበሳ ኣለዋ። ንብዘላ እታ ቤት ብዂሉ ዙርያአ ኸምኡ ተገይርዋ እዩ።

²⁰ካብ ምድሪ ሒዙ ኽሳዕ እቲ ልዕሊ ደጊኣ ኪሩቤልን ስየን ተቐጽዎ ኣሎ። እቲ መንደቕ እታ ቤተ መቕደስውን ከምኡ እዩ።

²¹ልዳውቲ እታ መቕደስ ኣርባዕተ ዝመኣዝኑ እዩ። ገጽ እታ ቅድስቲ ቦታ ድማ ትርኢቱ ኸምኡ እዩ።

²²እቲ መሰውኢ ድማ ካብ ሉሕ እተገብረ እዩ። ቊመቱ ሰለስተ እመት፡ ምንዋሑ ኽልተ እመት እዩ። መኣዝን ከኣ ኣለዎ፡ ግድጊዳኡ ኸኣ ሊሕ እዩ። ንሱውን፡ እዚኣስ እታ ኣብ ቅድሚ እግዚኣብሄር ዘላ መኣዲ እያ፡ በለኒ።

²³ነታ መቕደስን ቅድስቲ ቦታን ክልተ ማዕጾ ኣለዋኤን።

²⁴ነፍሲ ወከፍ ማዕጾ ድማ ክልተ መቃን፡ ኣብ ከክልተ ዚዕጸፍ መቃን፡ ነታ ሓንቲ ማዕጾ ኽልተ መቃን፡ ነታ ኻልኣይቲ ኸኣ ክልተ መቃን ኣለዋኤን።

²⁵ከምቲ ኣብ መንደቕ ዘሎ፡ ኣብተን ደጌታት መቕደስ ከኣ ኪሩቤልን ስየን ተቐሪጽወን ኣሎ። ኣብ ወጻኢ እቲ ገጽ ገበላ ኸኣ ካብ ረጒድ ኦም እተገብረ ናሕሲ ኣሎ።

²⁶ኣብ ጎቦታት እታ ገበላ ኸኣ በዝን በትን ዓይኒ ርግቢ ዘለወን መሳዂትን ስየን ኣለዋ። እተን ብጎቦ ዝነበራ ኽፍልታት ኣባይቲ እቲ ህንጻን እቲ ናሕሲ ዕጨይትን ከኣ ከምኡ እዩ።