Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 42 Bible Online

ትንቢት ሕዝቅኤል 42 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 42

¹ድሕርዚ ንሱ ናብቲ ናብ ሰሜን ዜብል መገዲ ናብ ወጻኢ ኣጸድ ኣውጽኣኒ። ናብቲ ኣብ ቅድሚ እቲ ንኣምፊ ዘሎ ቦታን ኣብ ግምባር እቲ ናብ ሰሜን ዚርኢ ህንጻን ዘሎ ኽፍሊ ቤት ከኣ ኣእተወኒ።

²እታ ደጊኣ ናብ ሰሜን ኣቢላ እትርኢ፡ ምንዋሓ ሚእቲ እመት ወርዳ ኸኣ ሓምሳ እመት እዩ።

³ኣብ ኣንጻር እታ ዕስራ ዝእመታ ውሽጣዊት ኣጸድ፡ ኣብ መንጽር እቲ ኣብ ወጻኢ ኣጻድ ዘሎ ምድሪ ቤት እምኒ ኸኣ መተሓላለፊ ኣብቲ ሰለስተ ደርቢ ኣሎ።

⁴ኣብ ቅድሚ እተን ክፍልታት ኣባይቲ ድማ ዓሰርተ እመት ዝወርዱ መተሓላለፊ ኣሎ። ናብ ውሽጢ ኸኣ ሓደ ዝእመቱ መገዲ ኣሎ። ደጌታታውን ናብ ሰሜን ኣቢለን እየን።

⁵እቲ መተሓላለፊታት ቦታ ስለ ዝወሰደለን፡ እተን ላዕሎት ክፍልታት ኣባይቲ ካብተን ታሕቶትን ማእከሎትን ናይቲ ህንጻ ይጸባ እየን።

⁶ንሳተን ሰለስተ ደርቢ እየን እሞ፡ ኣዕኑድሲ ኸምተን ናይ ኣጸድ ኣዕኑድ የብለንን። ስለዚ ኻብ ምድሪ ቤት ሒዙ እተን ላዕሎት ክፍልታት ኣባይቲ ኻብተን ታሕቶትን ማእከሎትን ይጸባ እየ።

⁷እተን ኣብ ወጻኢ ዘለዋ ኽፍልታት ኣባይቲ ምንዋሔን ሓምሳ እመት እዩ። እቲ ኣብ ኣንጻር ቤት መቕደስ ዘሎውን ሚእቲ እመት እዩ እሞ፡ እቲ ኣብ ቅድሚ ኽፍልታት ኣባይቲ ናብቲ ወጻኢ ኣጸድ ዜብል፡ ኣብ ወጻኢ፡ ኣብ ኣንጻር እቲ ኽፍልታት ኣባይቲ ዘሎ መንደቕ ምንዋሑ ሓምሳ እመት እዩ።

⁸እተን ኣብ ወጻኢ ዘለዋ ኽፍልታት ኣባይቲ ምንዋሔን ሓምሳ እመት እዩ። እቲ ኣብ ኣንጻር ቤት መቕደስ ዘሎውን ሚእቲ እመት እዩ እሞ፡ እቲ ኣብ ቅድሚ ኽፍልታት ኣባይቲ ናብቲ ወጻኢ ኣጸድ ዜብል፡ ኣብ ወጻኢ፡ ኣብ ኣንጻር እቲ ኽፍልታት ኣባይቲ ዘሎ መንደቕ ምንዋሑ ሓምሳ እመት እዩ።

⁹ነቶም ካብ ወጻኢ ኣጻድ ዚኣትዉ፡ ኣብ ትሕቲ እዘን ክፍልታት ቤት እዚኤን ብወገን ምብራቕ መእተዊ ኣሎ።

¹⁰ኣብ ወገን ምብራቕ ኣብ ገንዚ እቲ መንደቕ ኣጸድ፡ ኣብ ቅድሚ እቲ ንኣምፉ ዘሎ ቦታን ኣብ ቅድሚ እቲ ህኑጽን ክፍልታት ኣባይቲ ኣለዋ።

¹¹ኣብ ቅድሚኤን ከኣ፡ ከምቲ ናብ ሰሜን ዜብል ክፍልታት ኣባይቲ መተሓላለፊ ኣሎ፡ ምንዋሔንን ወርደንን፡ መውጽኢኤንን ስርዓተንን ደጊኤንን ማዕረ ማዕረ እዩ።

¹²ከምተን ናብ ደቡብ ዜብላ ደጌታት ክፍልታት ኣባይቲ፡ ኣብ ርእሲ እታ መገዲ ደገ ኣሎ። ንሳውን ነቶም ካብ ምብራቕ ዚኣትዉ ኣብ ቅድሚ እቲ መንደቕ ዘላ እያ።

¹³በለኒውን፡ እዘን ኣብ ቅድሚ እቲ ንኣምፊ ዘሎ ቦታ ናይ ሰሜንን ደቡብን ክፍልታት ኣባይቲ ቅዱሳት ክፍልታት ኣባይቲ እየን። ኣብኤን እቶም ናብ እግዚኣብሄር ዚቐርቡ ኻህናት ነቲ ኣዝዩ ቅዱስ ነገር ኪበልዑ እዮም። ቅዱስ ቦታ እዩ እሞ፡ ኣብኡ ነቲ ኣዝዩ ቅዱስ ነገር መስዋእቲ እኽልን መስዋእቲ ሓጢኣትን መስዋእቲ ዕዳን ኬንብሩ እዮም።

¹⁴እቶም ካህናት ምስ ኣተዉ፡ እተን ዘገልገሉለን ኣልባሳት ቅዱሳት እየን እሞ፡ ኣብኡ ኸየንብርወን፡ ካብታ መቕደስ ናብ ወጻኢ ኣጸድ ኣይውጽኡ፡ ካልእ ክዳውንቲ ይከደኑ እሞ ናብቲ ንህዝቢ እተመደበ ቦታ ይውጽኡ።

¹⁵ነቲ ውሽጣዊት ቤት ኣሚቱ ምስ ወድኤ፡ በታ ናብ መገዲ ምብራቕ እተብል ደገ ኣውጽኣኒ፡ በዝን በትን ብዙርያኣ ኣመታ።

¹⁶ነቲ ወገን ምብራቕ በታ መኣመቲት ሻምብቆ ኣመቶ፡ በዛ መኣመቲት ሻምብቆ ኸኣ ብዙርያኡ ሓሙሽተ ሚእቲ ሻምብቆ ዀነ።

¹⁷ነቲ ወገን ሰሜን ከኣ ኣመቶ፡ በታ መኣመቲት ሻምብቆ ድማ ብዙርያኡ ሓሙሽተ ሚእቲ ሻምብቆ ዀነ።

¹⁸ነቲ ወገን ደቡብ ከኣ ኣመቶ፡ በታ መኣመቲት ሻምብቆ ሓሙሽተ ሚእቲ ሻምብቆ ዀነ።

¹⁹ናብቲ ወገን ምብራቕ ዞረ፡ በታ መኣመቲት ሻምብቆ ድማ ሓሙሽተ ሚእቲ ኣመቶ።

²⁰ነቲ ኣብ ዙርያኡ ዘሎ መንደቕ በርባዕቲኡ ወገን ኣመቶ፡ ምንዋሑ ሓሙሽተ ሚእቲ፡ ወርዱ ኸኣ ሓሙሽተ ሚእቲ ዀነ። እዚ ነቲ ቅዱስ ካብቲ ዘይቅዱስ ዚፈሊ እዩ።