Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 43 Bible Online

ትንቢት ሕዝቅኤል 43 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 43

¹ድሕርዚ ናብታ ደገ፡ ናብታ ንምብራቕ እትርኢ ደገ ኣውጽኣኒ።

²እንሆ ኸኣ፡ ክብሪ ኣምላኽ እስራኤል ካብ ምብራቕ ኣቢሉ መጸ። ድምጹ ድማ ከም ህማም ብርቱዕ ማያት ነበረ፡ ምድሪውን ብኽብሩ በርሄት።

³እቲ ኣነ ዝርኤኽዎ ራእይ ድማ ከምቲ ነታ ኸተማ ኸጥፍእ ምስ መጻእኩ ዝርኤኽዎ ራእይ እዩ። እዚ ራእያት እዚ ኸኣ ከምቲ ኣብ ርባ ኬባር ዝርኤኽዎ ራእይ እዩ። ኣነውን ብገጸይ ፍግም ኢለ ወደቕኩ።

⁴ክብሪ እግዚኣብሄር ድማ በታ ናብ ምብራቕ እተርኢ ደገ ናብታ ቤት ኣተወ።

⁵መንፈስ ሓፍ ኣበለኒ፡ ናብታ ውሽጣዊት ኣጸድ ከኣ ኣእተወኒ፡ እንሆውን፡ ክብሪ እግዚኣብሄር ነታ ቤት መልኣ።

⁶ኣነ ኸኣ ካብታ ቤት ሓደ ኺዛረበኒ ኸሎ ሰማዕኩ፡ ኣብ ጥቓይ ድማ ሰብኣይ ደው ኢሉ ነበረ።

⁷በለኒውን፡ ኣታ ወዲ ሰብ፡ እታ ኣብ ማእከል ደቂ እስራኤል ንሓዋሩ ዝነብረላ ቦት ዝፋነይን እግረይ ዚረግጻ ቦታን እዚኣ እያ። ቤት እስራኤል፡ ንሳቶምን ነገስታቶምን ነቲ ቅዱስ ስመይ ብምንዝርናኦምን ብሬሳ ነገስታቶምን ኣብቲ በረኽቲ ቦታኦም ድሕርዚ ኣይኬርክስዎን እዮም።

⁸መንደቕ ጥራይ ኣብ መንጎይን መንጎኦምን ክሳዕ ዚኸውን፡ መድረኾም ኣብ ጥቓ መድረኸይ፡ ልዳቶም ኣብ ጥቓ ልዳተይ ገበሩ። በዚ ዝገበርዎ ጽያፍ ነቲ ቅዱስ ስመይ ኣርከስዎ፡ ስለዚ ድማ ብቚጥዓይ ኣጥፋእክዎም።

⁹ሕጂ ንምንዝርናኦምን ንሬሳ ነገስታቶምን ካባይ ኬርሕቑ እዮም፡ ኣነውን ንሓዋሩ ኣብ ማእከሎም ክነብር እየ።

¹⁰ኣታ ወዲ ሰብ፡ ብኣበሳኦም ኪሐፍሩስ ንቤት እስራኤል እዛ ቤት እዚኣ ኣርእዮም፡ ኣተሃናንጻኣ ኸኣ ኣለክዓዮም።

¹¹በቲ ዝገበርዎ ዂሉ እንተ ሐፈሩስ፡ ምስላን ስርዓታን ዘበለ ዂሉ ምእንቲ ኺሕልውዎን ኪገብርዎን፡ ምስሊ እታ ቤትን ኣሰራርዕኣን ነቲ መውጽኢኣን መእተዊኣን ኲሉ ምስላን ኲሉ ስርዓታን፡ ኲሉ ምስላን ኲሉ ሕጋጋታን ኣፍልጦም፡ ኣብ ቅድሚ ኣዒንቶም ከኣ ጽሐፎ።

¹²ሕጊ እታ ቤት ድማ እዚ እዩ፡ እቲ ኣብ ዝባን እቲ ከረን ኣብ ኲሉ ዙርያኡ ዘሎ ቦታ ኣዝዩ ቅዱስ እዩ፡ እንሆ፡ ሕጊ እታ ቤት እዚ እዩ።

¹³ልክዕ እታ መሰውኢ ድማ ብእመትሲ እዚ እዩ፡ እታ እመት ከኣ እመትን ስድርን እያ፡ እግሩ ሓደ እመት ወርዱ ኸኣ ሓደ እመት እዩ። ብዘሎ ዙርያ ኸንፈራውን ገንዙ ሓደ ስድሪ እዩ። እዚ መሰረት እቲ መሰውኢ እዩ።

¹⁴ካብ ምድሪ ጀሚሩ ኽሳዕ እቲ ታሕታይ ሕዳግ ክልተ እመት፡ ወርዱ ኸኣ ሓደ እመት እዩ። ካብቲ ታሕታይ ሕዳግ ጀሚሩ ኽሳዕ እቲ መወዳእታ ሕዳግ ድማ ኣርባዕተ እመት፡ ወርዱስን ሓደ እመት እዩ።

¹⁵እቲ ዝባን መሰውኢ ኣርባዕተ እመት እዩ፡ ካብቲ መእጐድ ሓዊ መሰውኢ ንላዕሊ ኣቢሉ ኸኣ ኣርባዕተ ቐርኒ ኣሎ።

¹⁶እቲ ናይ መሰውኢ መኣጐድ ሓዊ ምንዋሑ ዓሰርተው ክልተ እመት፡ ወርዱ ኸኣ ዓሰርትው ክልተ እመት እዩ። ኣርባዕቲኡ መኣዝኑውን ማዕረ ማዕረ እዩ።

¹⁷እቲ ሕዳግ ከኣ በርባዕተ ወገኑ ምንዋሑ ዓሰርተው ኣርባዕተ እመት፡ ወርዱውን ዓሰርተው ኣርባዕተ እመት ማዕረ ማዕረ እዩ። እቲ ኣብ ዙርያኡ ዘሎ ኸንፈር ድማ ፈረቓ እመት፡ እግሩ ኸኣ ብኽቡ ሓደ እመት እዩ። ደረጃታቱውን ናብ ምብራቕ ገጹ እዩ።

¹⁸በለኒ ድማ፡ ኣታ ወዲ ሰብ፡ እግዚኣብሄር ኣምላኽ ከምዚ ይብል ኣሎ፡ መስዋእቲ ምሕራር ኣብኡ ምእንቲ ኬቕርቡ፡ ደም ከኣ ኣብኡ ኺነጽጉስ። በቲ ዚስርሓሉ መዓልቲ፡ ስርዓት እቲ መሰውኢ እዚ እዩ፡

¹⁹እግዚኣብሄር ኣምላኽ ከምዚ ይብል ኣሎ፡ ነቶም ኬገልግሉኒ ኢሎም ዚቐርቡኒ፡ ካብ ዘርኢ ጻዶቅ ዝዀኑ ሌዋውያን ካህናት ንመስዋእቲ ሓጢኣት ዚኸውን ዝራብዕ ክትህቦም ኢኻ።

²⁰ንስኻ ድማ ካብቲ ደሙ ኽትወስድ፡ ኣብቲ ኣርባዕተ ቐርኑን ኣርብቲ ኣርባዕተ መኣዝን ሕዳጋትን ኣብቲ ኸንፈሩን ኣብ ዙርያኡ ኽትገብሮ ኢኻ፡ በዚ ኸምዚ ኸተጽርዮን ከተትዐርቖን ኢኻ።

²¹ነቲ ዝራብዕ መስዋእቲ ሓጢኣት ክትወስዶ ኢኻ፡ ኣብ ወጻኢ መቕደስ፡ ኣብቲ እተወሰነሉ ቦታ እታ ቤት ድማ ኪነድድ እዩ።

²²ብኻልኣይ መዓልቲ ኸኣ ጒድለት ዜብሉ ድቤላ ንመስዋእቲ ሓጢኣት ከተቕርብ ኢኻ። ከምቲ ብዝራብዕ ገይሮም ዘጽረይዎ፡ ነቲ መሰውኢ ኼጽርይዎ እዮም።

²³ምጽራዮም ምስ ፈጸምካ፡ ጒድለት ዜብሉ ዝራብዕ፡ ካብ ኣባጊዕውን ጒደሎ ዜብሉ ድዑል ከተቕርብ ኢኻ።

²⁴ኣብ ቅድሚ እግዚኣብሄር ከተቕርቦ ኢኻ፡ እቶም ካህናት ድማ ጨው ኪንስንሱሎም፡ መስዋእቲ ምሕራር ከኣ ንእግዚኣብሄር ኬቕርቡሉ እዮም።

²⁵ሾብዓተ መዓልቲ ዕለተ ዕለት መስዋእቲ ሓጢኣት ዚኸውን ድቤላ ኸተቕርብ ኢኻ። ጒድለት ዜብሎም ዝራብዕን ካብ ኣባጊዕ ድማ ድዑልን ኪስውኡ እዮም።

²⁶ሾብዓተ መዓልቲ ነቲ መሰውኢ ኼተዐርቕዎን ኬንጽህዎን ኪጽምብልዎን እዮም።

²⁷እዘን መዓልትታት እዚኤን ምስ ተፈጸማ፡ በታ ሳምነይቲ መዓልትን ብድሕሪኣን እቶም ካህናት ኣብቲ መሰውኢ ንመስዋእቲ ምሕራርኩምን ንመስዋእቲ ምስጋናኹምን ኬቕርቡ እዮም። ኣነውን ባህ ኢሉኒ ክቕበለኩም እየ፡ ይብል እግዚኣብሄር ኣምላኽ።