Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 44 Bible Online

ትንቢት ሕዝቅኤል 44 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 44

¹ድሕርዚ ናብ መገዲ እታ ናብ ምብራቕ እትርኢ ወጻኢት ደገ መቕደስ መለሰኒ፡ ዕጽውቲ ኸኣ እያ።

²እግዚኣብሄር ድማ በለኒ፡ እዛ ደገ እዚኣ ዕጽውቲ ትኹን፡ ኣይትከፈት፡ ሰብውን ኣይእተዋ። እግዚኣብሄር ኣምላኽ እስራኤል ኣትዩላ እዩ እሞ፡ ስለዚ ብዕጽውታ ትንበር።

³እቲ መስፍንሲ፡ መስፍን ስለ ዝዀነ፡ ኣብ ቅድሚ እግዚኣብሄር እንጌራ ኺበልዕ፡ ኣብኣ ኪቕመጥ እዩ። ንሱ ብመገዲ ገበላ እታ ደገ ኺኣቱ ብእኣ ኣቢሉውን ኪወጽእ እዩ።

⁴ድሕርዚ ድማ ብመገዲ እታ ደገ ሰሜን ኣቢሉ፡ ናብ ቅድሚ እታ ቤት ኣምጽኣኒ። ጠመትኩ፡ እንሆ ኸኣ፡ ክብሪ እግዚኣብሄር ነታ ቤት እግዚኣብሄር መሊእዋ ነበረ። ኣነውን ብገጸይ ፍግም ኢለ ወደቕኩ።

⁵እግዚኣብሄር ድማ በለኒ፡ ኣታ ወዲ ሰብ፡ ነዚ ኣነ ብዛዕባ ዂሉ ስርዓት ቤት እግዚኣብሄርን ኲሉ ሕጋጋታን ዝነግረካ ዘሎኹ፡ ልብኻ ኣውድቐሉ፡ በዒንትኻ ተመልከቶ፡ በእዛንካ ስምዓዮ። ንመእተዊ እታ ቤትን ንዂሉ መውጽኢ እታ ቤት መቕደስን ኣጸቢቕካ ኣስተብህለሉ።

⁶ነዞም ዓለውቲ ቤት እስራኤል፡ እግዚኣብሄር ኣምላኽ ከምዚ ይብል ኣሎ፡ በሎም፡ ኣቱም ቤት እስራኤል፡ ርኽሰትኩም ዘበለ ዂሉ ይእከልኩም።

⁷እንጌራይን ስብሕን ደምን ከተቕርቡ ኸሎኹም፡ ንቤተይ ኬርክስዋስ ነቶም ልቦም ዘይተገዝረ፡ ስጋኦምውን ዘይተገዝረ ጓኖት ናብ መቕደሰይ ኣእቲኹምዎም ኢኹም እሞ፡ ንሳቶም ኣብ ልዕሊ ዂሉ ጽያፍኩም ኪዳነይ ኣፍረሱ።

⁸ኣብታ መቕደሰይ ንእኦም ኣብ ክንዳኹም ንኣገልግሎተይ መዘዝኩምዎም እምበር፡ ነቲ ቅዱስ ነገረይ ባዕልኻትኩም ኣየገልገልኩምዎን።

⁹እግዚኣብሄር ኣምላኽ ከምዚ ይብል ኣሎ፡ ካብቶም ኣብ ማእከል ደቂ እስራኤል ዘለዉ ጓኖት፡ ልቡ ዘይተገዝረ፡ ስጋኡውን ዘይተገዝረ ሓደ ወዲ ጓና እኳ ናብ መቕደሰይ ኣይእቶ።

¹⁰እቶም ብስሕተት እስራኤል ካባይ ዝረሐቑ፡ ንጣኦታቶም ኪስዕቡስ ካባይ ዝረሐቑ ሌዋውያን ግና ኣበሳኦም ኪጾሩ እዮም።

¹¹ኣብ ደጌታት እታ ቤት ከኣ ሓለውቲ ኪዀኑ፡ ኣብታ ቤት ኬገልግሉስ፡ ኣብ መቕደሰይ ኣገልገልቲ ኪዀኑ እዮም። ንሳቶም ንመስዋእቲ ምሕራርን ንመስዋእቲ እቲ ህዝብን ኪሐርዱ፡ ምእንቲ ኼገልግልዎም ከኣ ኣብ ቅድሚኦም ኪቘሙ እዮም።

¹²ኣብ ቅድሚ ጣኦቶም ኣገልጊሎምዎም፡ ንቤት እስራኤል ከኣ ናብ ኣበሳ ኣዐንቂፎምዎም እዮም እሞ፡ ስለዚ ንሳቶም ኣበሳኦም ኪጾሩ እዮም ኢለ ኢደይ ኣልዐልኩሎም፡ ይብል እግዚኣብሄር ኣምላኽ።

¹³ንሳቶም ድማ ነውሮምን ነቲ ዝገበርዎ ጽያፎምን ደኣ ኺጾሩ እዮም እምበር፡ ብመዓርግ ክህነት ኬገልግሉኒ፡ ኣብቲ እተቐደሰ ነገረይ ኣብቲ ኣዝዩ ቅዱስ ነገር ኪቐርቡስ ናባይ ኣይኪቐርቡን እዮም።

¹⁴ንዂሉ ዕዮኣን ነቲ ኣብኣ ዚግበር ዘበለ ዂሉን ሓለውቲ እታ ቤት ኪዀኑ ኽምዝዞም እየ።

¹⁵እቶም፡ ደቂ እስራኤል ካባይ ኪርሕቁ ኸለዉ፡ ንምሕላው መቕደሰይ እተጸምዱ ኻብ ወገን ሌዋውያን ዝዀኑ ኻህናት ደቂ ጻዶቅ፡ ኬገልግሉኒ ኢሎም ኪቐርቡኒ፡ ስብሕን ደምን ኪስውኡለይ ኣብ ቅድመይ ዚቘሙ እዚኣቶም እዮም፡ ይብል እግዚኣብሄር ኣምላኽ።

¹⁶ንሳቶም ናብ መቕደሰይ ኪኣትዉ፡ ኬገልግሉንስ ናብ መኣደይ ኪቐርቡ፡ ንኣገልግሎተይውን ኪምዘዙ እዮም።

¹⁷ብደጌታት እታ ውሽጣዊት ኣጸድ ኪኣትዉ ኸለዉ፡ ካብ ልሕጺ እንጣጢዕ እተገብረ ኣልባሳት ኪለብሱ እዮም። ኣብ ደጌታት እታ ውሽጣዊት ኣጸድን ኣብ ውሽጥን ኬገልግሉ ኸለዉ ገለ ናይ ጸጒሪ ኣይኪኽደኑን እዮም።

¹⁸ኣብ ኣራእሶም ናይ ልሕጺ እንጣጢዕ ወሽ ኪጥምጥሙ፡ ኣብ ሕቚኦምውን ናይ ልሕጺ እንጣጢዕ ስረ ኺዕጠቑ፡ ዜርህጽ ነገር ኣይኪዕጠቑን እዮም።

¹⁹ናብ ወጻኢ ኣጸድ፡ ናብቲ ኣብ ወጻኢ ኣጸድ ዘሎ ህዝቢ ኺወጹ ኸለዉ፡ ብኣልባሳቶም ነቲ ህዝቢ ኸይቅድስዎስ፡ እቲ ዘገልገሉሉ ኣልባሳት ኬውጽእዎ፡ ኣብ ቅዱስ ክፍልታት ቤት ከኣ ኬንብርዎ፡ ካልእ ክዳውንቲውን ኪኽደኑ እዮም።

²⁰ነቲ ጸጒሪ ርእሶምሲ በብሓጺሩ ደኣ ኪቘርጽዎ እዮም እምበር፡ ርእሶም ኣይኪላጽዩን፡ ጸጒሮም ድማ ኣይኬንውሑን እዮም።

²¹ካህን ዘበለ ዂሉ ናብቲ ውሽጥሕ ኣጸድ ኪኣቱ ኸሎ፡ ወይኒ ኣይኪሰትን እዩ።

²²ንሳቶም ንህዝበይ ነቲ ኣብ መንጎ ቅዱስን ዘይቅዱስን ዘሎ ምፍላይ ኪምህርዎ፡ ነቲ ኣብ መንጎ ርኹስን ንጹህን ዘሎ ምልላይ ከኣ ኬፍልጥዎ እዮም።

²³ንሳቶም ንህዝበይ ነቲ ኣብ መንጎ ቅዱስን ዘይቅዱስን ዘሎ ምፍላይ ኪምህርዎ፡ ነቲ ኣብ መንጎ ርኹስን ንጹህን ዘሎ ምልላይ ከኣ ኬፍልጥዎ እዮም።

²⁴ኣብ ምጒት ፈራዶ ዀይኖም ኪቘሙ፡ ከምቲ ፍርደይ ገይሮም ከኣ ኪፈርዱ እዮም። ብዂሉ ፍርደይ ገይሮም ከኣ ኪፈርዱ እዮም። ብዂሉ በዓላት ዓመተይ ንሕጋጋተይን ንስርዓተይን ኪሕልዉ፡ ሰናብተይውን ኪቕድሱ እዮም።

²⁵ከይረኽሱስ፡ ናብ ምዉት ሰብ ኣይቕረቡ፡ በቦን ኣደን፡ ብወድን ጓልን፡ ብሓውን ብዘይተኣትወት ሓብትን ጥራይ ይርከሱ።

²⁶ድሕሪ ምንጻሁ ድማ ሾብዓተ መዓልቲ ይቚጸሩሉ።

²⁷በታ ኣብታ ውሽጣዊት ኣጸድ ኣብ መቕደስ ኬገልግል፡ ኣብ መቕደስ ዚኣትወላ መዓልቲ ኸኣ፡ መስዋእቲ ሓጢኣቱ የቕርብ፡ ይብል እግዚኣብሄር ኣምላኽ።

²⁸ርስቲ ይኹኖም፡ ኣነ እየ ርስቶም። ኣብ እስራኤል ግደ ኣይትሀብዎም፡ ግዲኦምሲ ኣነ እየ።

²⁹ንሳቶም ነቲ መስዋእቲ ብልዕን ነቲ መስዋእቲ ሓጢኣትን መስዋእቲ ብልዕን ነቲ መስዋእቲ ሓጢኣትን መስዋእቲ ዕዳን ይብልዕዎ። እስራኤል ዝሐረምዎ ዘበለውን ንኣታቶም ይኹን።

³⁰በዂሪ ዂሉ ፍርያትኩምን፡ ኲሉ መባእኩም፡ ዝዀነ ይኹን መባእ ዘበለን ንኻህናት ይኹን። ንቤትኩም በረኸት ምእንቲ ኺሐድራስ፡ በዂሪ ሓሪጭኩም ንኻህን ሀቡ።

³¹እቶም ካህናት ካብ ኣዕዋፍ ወይስ ካብ ከብቲ ዝሐለቐን እተሰብረን ኣይብልዑ።