Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 46 Bible Online

ትንቢት ሕዝቅኤል 46 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 46

¹እግዚኣብሄር ኣምላኽ ከምዚ ይብል ኣሎ፡ እታ ንምብራቕ እትርኢ ደገ እታ ውሽጣዊት ኣጸድ በተን ሹድሽተ መዓልቲ ዕዮ ኽትዕጾ ብመዓልቲ ሰንበት ግና ክትክፈት፡ ብመዓልቲ ሰርቂ ወርሒውን ክትክፈት እያ።

²እቲ መስፍን ከኣ በቲ ገበላ እታ ደገ ኣቢሉ ኻብ ወጻኢ ኺኣቱ፡ ኣብ ልዳት እታ ደገውን ኪቐውም እዩ። ካህናት ከኣ መስዋእቲ ምህራሩን መስዋእቲ ምስጋናኡን ኬቕርቡ እዮም፡ ንሱ ድማ ኣብ መድረኽ እታ ደገ ኺሰግድ፡ ድሕርዚውን ኪወጽእ እዩ። እታ ደገ ግና ክሳዕ ምሸት ኣይክትዕጾን እያ።

³ህዝቢ እታ ሃገር ከኣ ብሰናብትን ብሰርቂ ኣዋርሕን፡ ኣብ መእተዊ እዛ ደገ እዚኣ ዀይኖም፡ ኣብ ቅድሚ እግዚኣብሄር ኪሰግዱ እዮም።

⁴እቲ መስፍን ብመዓልቲ ሰንበት ንእግዚኣብሀር ዜቕርበሉ መስዋእቲ ምሕራርሲ ጒድለት ዜብሎም ሹድሽተ ገንልን፡ ጒድለት ዜብሉ ሓደ ድዑልን እዩ።

⁵መስዋእቲ ብልዒ ኸኣ ነቲ ድዑል ሓንቲ ኤፋ፡ መስዋእቲ ብልዒ ነቶም ገንሸላት ድማ ከም ርካቡ ኪኸውን፡ ንነፍሲ ወከፍ ኤፋውን ሓደ ሂን ዘይቲ ኺህልዎ እዩ።

⁶ብመዓልቲ ሰርቂ ወርሒ ኸኣ ጒድለት ዜብሉ ዝራብዕን ጒድለት ዜብሎም ሹድሽተ ገንልን ሓደ ድዑልን ኬቕርብ እዩ።

⁷ንሱ ኸኣ መስዋእቲ ብልዒ ነቲ ዝራብዕ ሓደ ኤፋ፡ ነቲ ዱዑል ድማ ሓደ ኤፋ፡ ነቶም ገናሽልውን ከም ርካቡ፡ ንነፍሲ ወከፍ ኤፋ ኸኣ ሓደ ሂን ዘይቲ ኼቕርብ እዩ።

⁸እቲ መስፍን ኪኣቱ ኸሎ፡ ብገበላ እታ ደገ ኺኣቱ፡ ብእኣ ኣቢሉውን ኪወጽእ እዩ።

⁹ህዝቢ እታ ሃገር በቲ ዓበይቲ በዓላት ኣብ ቅድሚ እግዚኣብሄር ምስ መጹ፡ እቲ ኺሰግድ ኢሉ ብደገ ሰሜን ዝኣተወ ብደገ ደቡብ ኪወጽእ፡ በታ ደገ ደቡብ ዝኣተወ ድማ ብደገ ሰሜን ኪወጽእ እዩ። በታ ኣንጻራ ደኣ ኺወጽእ እምበር፡ ሓደ እኳ በታ ዝኣተወላ ደገ ኣይኪምለስን እዩ።

¹⁰እቲ መስፍን ከኣ፡ እቶም ህዝቢ ኪኣትዉ ኸለዉ፡ ኣብ ማእከሎም ኰይኑ ኺኣቱ፡ ንሳቶም ኪወጹ ኸለዉ ድማ፡ ምስኦም ኪወጽእ እዩ።

¹¹ብበዓላትን ብበዓላት ዓመትን እቲ መስዋእቲ ብልዒ ነቲ ዝራብዕ ሓደ ኤፋ፡ ነቲ ድዑል ድማ ሓደ ኤፋ፡ ነቶም ገናሽልውን ከም ርካቡ፡ ነንሓደ ኤፋ ኸኣ ሓደ ሂን ዘይቲ ኬቕርብ እዩ።

¹²እቲ መስፍን ከኣ ናይ ፍቓዱ መስዋእቲ፡ መስዋእቲ ምሕራር ወይስ መስዋእቲ ምስጋና ኸም ፍቓዱ ንእግዚኣብሄር ኬቕርብ ከሎ፡ እታ ንምብራቕ እትርኢ ደገ ይኽፈተሉ እሞ፡ ነቲ መስዋእቲ ምህራሩን መስዋእቲ ምስጋናኡን ከምቲ ናይ ሰንበት ገይሩ ኬቕርብ እዩ። ድሕርዚ ኺወጽእ፡ ምስ ወጸ ድማ፡ እታ ደገ ትተዐጾ።

¹³ጒድለት ዜብሉ ናይ ዓመት ገንሸል ከም መስዋእቲ ምሕራር ኣብ ጸጽባሕ ንእግዚኣብሄር ከተቕርበሉ ኢኻ። ንግሆ ንግሆ ኽትስውኦ ኢኻ።

¹⁴ምስናይዚ መስዋእቲ ብልዒ ሳድሳይ ኣፍ ኤፋ፡ መለስለሲ እቲ ሓርጭ ከኣ ሳልሳይ ኣፍ ሂን ዘይቲ ንግሆ ንግሆ ኸተቕርብ ኢኻ። እዚ ንእግዚኣብሄር ዚቕረብ መስዋእቲ ብልዒ እዚ ናይ ሓዋሩ ስርዓት ንዂሉ ጊዜ ኪኸውን እዩ።

¹⁵ገንሸልን መስዋእቲ ብልዕን ዘይትን ንግሆ ንግሆ ኸም ናይ ኲሉ ጊዜ መስዋእቲ ምሕራር ክትስውኡ ኢኹም።

¹⁶እግዚኣብሄር ኣምላኽ ከምዚ ይብል ኣሎ፡ እቲ መስፍን ንሓደ ኻብቶም ደቁ ውህበት እንተ ሀቦ፡ ርስቱ እዩ፡ እዚ ንደቁ ይኹን፡ ደቁ ዝወረስዎ ርስቶም እዩ።

¹⁷ንሓደ ኻብ ገላዉኡ ኻብቲ ርስቱ መቒሉስ ውህበት እንተ ሀቦ ግና፡ እዚኣ ክሳዕ ዓመት ሓራ ናቱ ትኹን። ድሕርዚ ኸኣ ናብቲ መስፍን ትመለስ። ርስትነቱ ድማ ንደቁ ኪኸውን እዩ።

¹⁸እቲ መስፍን ከኣ ነቶም ህዝቢ ኻብ ርስቶም ነቒሉ ርስቲ ኣይውሰደሎም። ካብቶም ህዝበይ ሓደ እኳ ኻብ ርስቱ ኸይንቀልስ፡ ነቶም ደቁ ኻብ ርስቱ ኼረስትዮም እዩ።

¹⁹ድሕርዚ ንሱ ናብተን ናብ ወገን ሰሜን ዚርእያ ናይ ካህናት ቅዱሳት ክፍሊ ኣባይቲ በታ ኣብ ጥቓ እታ ደገ ዘላ መእተዊት ኣቢሉ ኣእተወኒ። እንሆ ድማ፡ ኣብቲ ወሰኑ ንምዕራብ ኣቢሉ ዚርኢ ቦታ ኣሎ።

²⁰ንሱ ኸኣ፡ ናብ ወጻኢ ኣጸድ ከየውጽእዎ እሞ እቲ ህዝቢ ኸይቅደስሲ፡ እቲ እቶም ካህናት ነቲ መስዋእቲ ዕዳን ነቲ መስዋእቲ ሓጢኣትን ዚቕቅልሉ፡ ነቲ መስዋእቲ ብልዒውን ዚስንክትሉ ቦታ እዚ እዩ፡ በለኒ።

²¹ናብ ወጻኢ ኣጸድ ድማ ኣውጽኣኒ፡ ኣብ ኣርባዕቲኤን መኣዝን እታ ኣጸድ ከኣ ኣሕለፈኒ፡ እንሆውን፡ ኣብ ነፍሲ ወከፍ መኣዝን እታ ኣጻድሲ ኣጸድ ኣሎ።

²²ኣብተን ኣርባዕተ መኣዝን እታ ኣጸድ ድማ እተቐጽራ ኣጸዳት ኣለዋ፡ ምንዋሔን ኣርብዓ እመት፡ ወርደን ከኣ ሰላሳ እዩ። እዘን ኣርባዕተ ብመኣዝንሲ ልክዔን ሓደ እዩ።

²³ኣብ ዙርያኤን ኣብ ዙርያ ኣርባዕቲኤን ከኣ መንደቕ ኣሎ። ኣብ እግሪ እቲ መንደቕ ብዙርያ ድማ መሰኻተቲ ተሰሪሕዎ ኣሎ።

²⁴ንሱ ኸኣ፡ እዚኣ እታ ዜብስሉላ ቤት እያ፡ እዚኣተን ከኣ እቶም ኣገልገልቲ እዛ ቤት ናይ ህዝቢ መስዋእቲ ዜብስሉለን እየን፡ በለኒ።