Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 48 Bible Online

ትንቢት ሕዝቅኤል 48 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 48

¹ስማት እቶም ነገድ እዚ እዩ፡ ካብ ወገን ሰሜን ሒዙ፡ ብጥቓ መገዲ ሃትሎን፡ ክሳዕ ሃማትን ክሳዕ ሓጻርዕናንን፡ ወሰን ደማስቆ፡ ናብ ሰሜን ኣብ ጥቓ ሃማት ኣቢሉ፡ ካብ ምብራቕ ክሳዕ ምዕራብ ንዳን ሓደ ኽፍሊ ይኹን።

²ኣብ ወሰን ዳን ድማ ካብ ወገን ምብራቕ ክሳዕ ወገን ምዕራብ ንኣሴር ሓደ ኽፍሊ ይኹን።

³ኣብ ወሰን ኣሴር ከኣ ካብ ወገን ምብራቕ ክሳዕ ወገን ምዕራብ ንንፍታሌም ሓደ ኽፍሊ ይኹን።

⁴ኣብ ወሰን ንፍታሌም ድማ ካብ ወገን ምብራቕ ናብ ወገን ምዕራብ ንምናሴ ሓደ ኽፍሊ ይኹን።

⁵ኣብ ወሰን ምናሴ ኸኣ ካብ ወገን ምብራቕ ናብ ወገን ምዕራብ ንኤፍሬም ሓደ ኽፍሊ ይኹን።

⁶ኣብ ወሰን ኤፍሬም ድማ ካብ ወገን ምብራቕ ናብ ወገን ምዕራብ ንሮቤል ሓደ ኽፍሊ ይኹን።

⁷ኣብ ወሰን ሮቤል ከኣ ካብ ወገን ምብራቕ ናብ ወገን ምዕራብ ንይሁዳ ሓደ ኽፍሊ ይኹን።

⁸ኣብ ወሰን ይሁዳ ድማ ካብ ወገን ምብራቕ ናብ ወገን ምዕራብ እቲ እተቕርብዎ መባእ ይኹን። ወርዱ ዕስራን ሓሙሽተን እመት፡ ምንዋሑ ኸኣ ኻብ ወገን ምብራቕ ናብ ወገን ምዕራብ ክንዲ ሓደ ኽፍሊ ይኹን። እታ መቕደስ ድማ ኣብ ማእከሉ ትኹን።

⁹እዛ ንእግዚኣብሄር እተቕርቡሉ መባእ ምንዋሓ ዕስራን ሓሙሽተን ሽሕ፡ ወርዳውን ዓሰርተ ሽሕ ትኹን።

¹⁰እዛ ቅድስቲ መባእ እዚኣ ንኻህናት ትኹን። ንሰሜን ምንዋሓ ዕስራን ሓሙሽተን ሽሕ፡ ንምዕራብ ከኣ ወርዳ ዓሰርተ ሽሕ፡ ንምብራቕ ድማ ወርዳ ዓሰርተ ሽሕ፡ ንደቡብ ከኣ ምንዋሓ ዕስራን ሓሙሽተን ሽሕ እዩ። እታ መቕደስ እግዚኣብሄርውን ኣብ ማእከላ ትኹን።

¹¹እዚኣ ነቶም፡ እቶም ደቂ እስራኤል ኪስሕቱ ኸለዉ ኸምቶም ዚስሕቱ ሌዋውያን ዘይሰሐቱ፡ እተቐደሱ ንኣገልግሎተይውን እተመዘዙ ኻህናት፡ ደቂ ጻዶቅ፡ ትኹን።

¹²እዚኣ ኻብታ ኣብ ወሰን ሌዋውያን ዘላ፡ ኣዝያ ቅድስቲ ዝዀነት መባእ ምድሪ ንኣታቶም መባእ ትኹነሎም።

¹³ኣብ ወሰን እታ ናይ ካህናት ከኣ ምንዋሓ ዕስራን ሓሙሽተን ሽሕ፡ ወርዳውን ዓሰርተ ሽሕ ንሌዋውያን ትኹን። ምንዋሓ ዂላዂላ ዕሽራን ሓሙሽተን ሽሕ፡ ወርዳውን ዓሰርተ ሽሕ እያ።

¹⁴እዚኣ ንእግዚኣብሄር እተቐደሰት እያ እሞ፡ ካብኣ ኣይሽጡ፡ ኣይለውጡ፡ እዛ በዂራት ምድሪ እዚኣ ኣብ ካልእ ኣይትሕለፍ።

¹⁵እታ ኣብ ኣንጻር እቲ ዕስራን ሓሙሽተን ሽሕ ዘላ ኻብቲ ወርዲ ዝተረፈ ሓሙሽተ ሽሕ ግና ዘይተቐደሰ ቦታን ሰብ ዚነብረላ ኸተማን ንኸባቢኣን ትኹን። እታ ኸተማ ድማ ኣብ ማእከላ ትኹን።

¹⁶ልክዓ ኸኣ ብወገን ሰሜን ኣርባዕተ ሽሕን ሓሙሽተ ሚእትን እመት፡ ብወገን ደቡብ ኣርባዕተ ሽሕን ሓሙሽተ ሚእትን፡ ብወገን ምብራቕ ኣርባዕተ ሽሕን ሓሙሽተ ሚእትን፡ ብወገን ምዕራብውን ኣርባዕተ ሽሕን ሓሙሽተ ሚእትን እዩ።

¹⁷እቲ ኣብ ከባቢ እታ ኸተማ ዘሎ ቦታ ድማ ብሰሜን ክልተ ሚእትን ሓምሳን፡ ብደቡብ ክልተ ሚእትን ሓምሳን፡ ብምብራቕ ክልተ ሚእትን ሓምሳን ይኹን።

¹⁸እታ ትራፍ ናይቲ ምንዋሕሲ ብኣንጻር እታ ቅድስቲ መባእ ኣብ ምብራቕ ኣቢላ ዓሰርተ ሽሕ፡ ኣብ ምዕራብ ኣቢሉ ኸኣ ዓሰርተ ሽሕ ትኹን፡ እዚኣ ኣንጻር እታ ቅድስቲ መባእ እያ። እቶታውን ምግቢ እቶም ዓየይቲ እታ ኸተማ ይኹን።

¹⁹እቶም ካብ ኲሎም ነገድ እስራኤል ዝዀኑ ኣብታ ኸተማ ዚዐዩ ኸኣ ነታ ምድሪ ይሕረርስዋ።

²⁰እታ መባእ ኲላዂላ ምንዋሓ ዕስራን ሓሙሽተን ሽሕ፡ ወርዳ ዕስራን ሓሙሽተን ሽሕ ትኹን። ንርስቲ እታ ኸተማ ዚኸውን ራብዓይ ክፍሊ እታ ቅድስቲ መባእ ኣልዕሉ።

²¹እቲ ዝተረፈ ንመስፍን ይኹን፡ በዝን በትን እታ ቅድስቲ መባእ ርስቲ እታ ኸተማ፡ ኣብ ኣንጻር እቲ ዕስራን ሓሙሽተን ሽሕ እመት እታ መባእ ክሳዕ ወሰን ምብራቕ፡ ኣብ ምዕራብ ከኣ ኣብ ኣንጻር እቲ ዕስራን ሓሙሽተን ሽሕ ናብ ወሰን ምዕራብ ዜብል፡ ማዕረ ማዕረ እቲ ኽፍልታት ዘሎ፡ ነቲ መስፍን ይኹን። እታ ቅድስቲ መባእን መቕደስ እታ ቤትን ከኣ ኣብ ማእከል ይኹና።

²²ካብቲ ኣብ ማእከል ናይ መስፍን ዘሎ ርስቲ ሌዋውያንን ርስቲ እታ ኸተማን፡ ኣብ መንጎ ወሰን ይሁዳን ወሰን ብንያምን ዘሎ ነቲ መስፍን ይኹን።

²³ነቶም ዝተረፉ ነገድ ድማ እዚ እዩ፡ ካብ ወገን ምብራቕ ናብ ወገን ምዕራብ ሓደ ኽፍሊ ንብንያም ይኹን።

²⁴ኣብ ወሰን ብንያም ድማ ካብ ወገን ምብራቕ ናብ ወገን ምዕራብ ሓድ ኽፍሊ ንስምኦን ይኹን።

²⁵ኣብ ወሰን ስምኦን ከኣ ካብ ወገን ምብራቕ ናብ ወገን ምዕራብ ሓደ ኽፍሊ ንኢሳኮር ይኹን።

²⁶ኣብ ወሰን ይሳኮር ድማ ካብ ወገን ምብራቕ ናብ ወገን ምዕራብ ሓደ ኽፍሊ ንዛብሎን ይኹን።

²⁷ኣብ ወሰን ዛብሎን ከኣ ካብ ወገን ምብራቕ ናብ ወገን ምዕራብ ሓደ ኽፍሊ ንጋድ ይኹን።

²⁸ኣብ ወሰን ጋድ ድማ ካብ ወገን ደቡብ ናብ ደቡብ ኣቢሉ ወሰኑ ኻብ ታማር ሒዙ ኽሳዕ እቲ ዓብዪ ባሕሪ ይኹን።

²⁹እታ ንነገዳት እስራኤል ዕጭ ኣውዲቕኩም ርስቲ እተማቕልዎም ምድሪ እዚኣ እያ። እተን ግዴታት ከኣ እዚኤን እየን፡ ይብል እግዚኣብሄር ኣምላኽ።

³⁰መውጽኢታት እታ ኸተማ ድማ እዚ እዩ፡ ብወገን ሰሜን ኣርባዕተ ሽሕን ሓሙሽተ ሚእትን እመት እዩ ልክዑ።

³¹ደጌታት እታ ኸተማ ኸኣ ብስም ነገዳት እስራኤል ይሰመያ። ናብ ሰሜን ኣቢሉ ሰለስተ ደገ፡ ደገ ሮቤል ሓንቲ፡ ደገ ይሁዳ ሓንቲ፡ ደገ ሌዊ ሓንቲ።

³²ብወገን ምብራቕ ድማ ኣርባዕተ ሽሕን ሓሙሽተ ሚእትን እመት፡ ደጌታትውን ሰለስተ፡ ደገ ዮሴፍ ሓንቲ፡ ደገ ብንያም ሓንቲ፡ ደገ ዳን ሓንቲ።

³³ብወገን ደቡብ ከኣ ኣርባዕተ ሽሕን ሓሙሽተ ሚእትን እመት እዩ ልክዑ፡ ደጌታትውን ሰለስተ፡ ደገ ስምኦን ሓንቲ፡ ደገ ይሳኮር ሓንቲ፡ ደገ ዛብሎን ሓንቲ።

³⁴ብወገን ምዕራብ ድማ ኣርባዕተ ሽሕን ሓሙሽተ ሚእትን እመት፡ ደጌታትውን ሰለሰ፡ ደገ ጋድ ሓንቲ፡ ደገ ኣሴር ሓንቲ፡ ደገ ንፍታሌም ሓንቲ።

³⁵ዙርያኣ ዓሰርተው ሾሞንተ ሽሕ እመት እዩ። ድሕሪ እዛ መዓልቲ እዚኣ ኸኣ ስም እታ ከተማ፡ እግዚኣብሄር ኣብኣ እዩ፡ ክትስመ እያ።