Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 7 Bible Online

ትንቢት ሕዝቅኤል 7 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 7

¹ከምዚ ዚብል ቃል እግዚኣብሄር ድማ መጸኒ፡

²ኣታ ወዲ ሰብ፡ እግዚኣብሄር ኣምላኽ ንሃገር እስራኤል ከምዚ ይብላ ኣሎ፡ መወዳእታ፡ ናይ ኣርባዕተ መኣዝን እታ ሃገርሲ መወዳእታ ይመጽእ ኣሎ።

³ሕጂ መወዳእታ ኣባኺ መጸ፡ ቊጥዓይ ድማ ክሰደልኪ፡ ከም መገድኺ መጠን ክፈርደኪ፡ ኲሉ ጽያፍኪ ድማ ኣብ ልዕሌኺ ኸውርደልኪ እየ።

⁴ዓይነይ ኣይኪንሕፈክን ኣነውን ኣይክርሕርሓልክን፡ ኣነስ መገድኺ ደኣ ኣብ ልዕሌኺ ኸምጽኣልኪ እየ፡ ጽይፍኪ ድማ ኣብ ማእከልኪ ኪኸውን እዩ እሞ፡ ንስኻትኩም እግዚኣብሄር ምዃነይ ክትፈልጡ ኢኹም።

⁵እግዚኣብሄር ኣምላኽ ከምዚ ይብል ኣሎ፡ መዓት፡ በይኑ ዝዀነ እኳ ደኣ መዓት እንሆ፡ ይመጽእ ኣሎ።

⁶መወድእታ መጸ፡ እቲ መወዳእታ መጸ፡ ተላዕለኪ፡ እንሆ ይመጽእ ኣሎ።

⁷ኣታ ኣብ ሃገር እትነብር ዘሎኻ፡ ተራኻ መጸካ። እቲ ጊዜ በጽሔ፡ እልልታ ኣብ ኣኽራን ዘይስማዓላ መዓልቲ ዕግርግር ቀረበት።

⁸ሕጂ ብቕልጡፍ ነድረይ ክኽዕወልኪ፡ ሃና ቚጥዓይ ከኣ ክወጸልኪ፡ ከም መጠን መገድኺ ኽፈርደኪ፡ ንዂሉ ጽያፍኪ ኣብ ልዕሌኺ ኸውርድዕ እየ።

⁹ዓይነይ ኣይኪንሕፍን እዩ፡ ኣነውን ኣይክርሕርሕን፡ ኣነስ ከም መጠን መገድኺ ኸምጽኣልኪ እየ፡ ጽያፍኪ ድማ ኣብ ማእከልኪ ኪኸውን እዩ። ንስኻትኩምውን እቲ ዚወቅዕ ዘሎስ ኣነ እግዚኣብሄር ምዃነይ ክትፈልጡ ኢኹም።

¹⁰እንሃ እታ መዓልቲ፡ እንሃ መጸት። ተራኺ በጽሔ። እታ ሸቦጥ ዐምበበት፡ ትዕቢት ከኣ ጠጥዔ።

¹¹ዓመጻስ ሸቦጥ ረሲእነት ኰይና ተላዕለት። ካባታቶም ሓደ እኳ የልቦን፡ ካብቲ ብዙሕ ህዝቦምን ካብቲ ሃብቶምን ካብቲ ግርማኦምን ዚተርፍ ሓደ እኳ የሎን።

¹²ዘመን በጺሑ፡ መዓልቲ ቐሪቡ ኣሎ። ጒሁር ቊጥዓ ኣብ ልዕሊ ዂሉ እቲ ብዙሕ ህዝቦም እዩ እሞ፡ ዚወየጥ ኣይተሐጐሰ፡ ዚሸይጥውን ኣይጒሄ።

¹³እቲ ዚሸይጥ ብህይወቱ እኳ እንተሎ፡ ናብቲ ዝሸጦ ኣይኪምለስን እዩ። ብዛዕባ እቲ ብዙሕ ህዝቦም ዝዀነ ራእይ ንድሕሪት ኣይኪምለስን እዩ እሞ፡ ብዓመጽ ዚነብርሲ ንህይወቱ ዜጽንዓ ሓደ እኳ የልቦን።

¹⁴መለኸት ተነፍሔ፡ ኲሉ ኸኣ ተዳለወ፡ ቊጥዓይ ግና ኣብ ልዕሊ ዂሉ እቲ ብዙሕ ህዝቦም ኣሎ እሞ፡ ኣብ ውግእ ዚኸይድ ሓደ እኳ የልቦን።

¹⁵ኣብ ወጻኢ ሰይፊ ኣብ ውሽጢ ኸኣ ፌራን ጥሜትን ኣሎ። እቲ ኣብ መሮር ዘሎ ብሰይፊ ኺመውት፡ እቲ ኣብ ከተማ ዘሎውን ፌራን ጥሜትን ኪውሕጦ እዩ።

¹⁶እቶም ካባታቶም ዘምለጡ ግና ኸምተን ርግብታት ሽንጭሮ፡ ነፍሲ ወከፍ ብኣበሳኦም እናቘዘሙ፡ ኣብ ኣኽራን ኪዀኑ እዮም።

¹⁷ኲለን ኣእዳው ኪሕለላ፡ ኲለን ኣብራኽ ድማ ከም ማይ ኪፈሳ እየን።

¹⁸ከሊ ኺዕጠቑ፡ ራዕዲ ኪኽደኑ፡ ኲሉ ገጽ ብሕንኪ ኺጒልበብ፡ ኲሉ ርእስታቶም ድማ ኪበርሕ እዩ።

¹⁹ብሩሮም ኣብ ኣደባባያት ኪድርብዩ፡ ወርቆም ከኣ ከም ርኹስ ነገር ኪኸውን እዩ። ብሩሮምን ወርቆምን ናይ ሓጢኣቶም እምኒ መዓንቀፊ ስለ ዝዀነ፡ በታ መዓልቲ ቚጥዓ እግዚኣብሄር ኬድሕኖም ኣይተኻእሎን፡ ንጥሜቶም ኣይኬጽግቦን፡ ንኸብዶምውን ኣይኪመልኣሎምን እዩ።

²⁰መልክዕ ስልማቶም ንትዕቢት ኰኖም፡ ምስሊ ርኽሰቶምን እቶም ዜፈንፍኑ ጣኦታቶምን ገበሩሉ። ስለዚ ኣነ ንኣታቶም ንርኽሰት ገበርክዎ።

²¹ዘመተ ኪኸውን ድማ ኣብ ኢድ ጓኖት፡ ምርኮ ኪኸውን ከኣ ንረሲኣን ምድሪ ኣሕሊፈ ኽህቦ እየ፡ ንሳቶም ድማ ኬርክስዎ እዮም።

²²ካባታቶም ገጸይ ከመልስ እየ፡ ንሳቶም ከኣ ንመዝገበይ ኬርክስዎ፡ ገፋዕቲ ኣትዮም ድማ ኬርክስዎ እዮም።

²³እዛ ሃገር እዚኣ ቅትለት ደመ ነፍሲ መሊኣ ኣላ፡ እዛ ኸተማ እዚኣውን ዓመጽ መሊእዋ እዩ እሞ፡ ሞቚሕ ኣዳሉ።

²⁴ነቶም ኣዝዮም ሕሱማት ካብ ህዝብታት ከምጽእ እየ እሞ፡ እዚኣቶም ኣባይቶም ኪወርሱ እዮም። ንትዕቢት እቶም ሓያላት ከጥፍኦ እየ፡ መቓድሶም ከኣ ኪረኽሳ እየን።

²⁵ጥፍኣት ይመጽእ ኣሎ፡ ንሳቶም ከኣ ሰላማ ኪደልዩ እዮም፡ ኣይርከብን ከኣ።

²⁶መዓት ኣብ ርእሲ መዓት ኪመጽእ፡ ወረውን ኣብ ርእሲ ወረ ኪኸውን እዩ። ካብ ነብዪ ራእይ ኪደልዩ፡ ግናኸ ሕጊ ኻብ ካህን፡ ምኽሪውን ካብ ኣረገውቲ ኺጠፍእ እዩ።

²⁷እቲ ንጉስ ኪትክዝ፡ እቲ መስፍን ድማ ሓዘን ኪኽደን፡ ኣእዳው እቶምህዝቢ እታ ሃገር ራዕራዕ ኪብል እዩ። ከም መጠን መገዶም ክፈድዮም፡ ከከም ዚግብኦም ካ ክፈርዶም እየ። ኣነ እግዚኣብሄር ምዃነይውን ኪፈልጡ እዮም።