Read መ/ቅዱስ ትግርኛ, Tigrigna Bible, 1997 ትንቢት ሕዝቅኤል 8 Bible Online

ትንቢት ሕዝቅኤል 8 - መ/ቅዱስ ትግርኛ, Tigrigna Bible, 1997 bible

ትንቢት ሕዝቅኤል 8

¹ኰነ ድማ፡ ኣብ ሳድሰይቲ ዓመት፡ ኣብታ ሳድሰይቲ ወርሒ፡ ካብታ ወርሒውን ኣብ ሓምሰይቲ መዓልቲ፡ ኣብ ቤተይ ተቐሚጠ ኸሎኹ፡ እቶም ዓበይቲ ይሁዳውን ኣብ ቅድመይ ተቐሚጦም ከለዉ፡ ኣብኡ ኢድ እግዚኣብሄር ኣምላኽ ኣብ ልዕለይ ወረደት።

²ሽዑ ርኤኹ፡ እንሆ፡ ትርኢት ሓዊ ዚመስል ምስሊ፡ ካብቲ ምስሊ ሕቚኡ ንታሕቲ ሓዊ፡ ካብ ሕቚኡ ንላዕሊ ድማ ድሙቕ ብርሃንን ዜንጸባርቕ ኣስራዝን ዚመስል እዩ።

³ንሱ ኸኣ ኢድ እትመስል ዘርግሔ፡ ብጸጒሪ ርእሰይ ድማ ሐዘኒ፡ መንፈስውን ኣብ መንጎ ሰማይን ምድርን ኣልዐለኒ፡ ብራእይ ኣምላኽ ድማ ናብ የሩሳሌም ወሰደኒ፡ ናብቲ ውሽጣዊ ኣጸድ፡ በቲ ንሰሜን ኣቢሉ ዜርኢ ኣፍደገ፡ ናብቲ እቲ ንቕንኣት ዜለዓዕል ምስሊ ቕንኣት ዝነበሮ ኣምጽኣኒ።

⁴እንሆ ኸኣ፡ ከምቲ ኣብ ጐልጐል ዝርኤኽዎ ትርኢት፡ ክብሪ ኣምላኽ እስራኤል ኣብኡ ነበረ።

⁵ንሱ ኸኣ፡ ኣታ ወዲ ሰብ፡ ኣብ ወገን ሰሜን ኣቢልካ ኣዒንትኻ ኣልዕል፡ በለኒ። ኣነ ኸኣ ናብ ሰሜን ኣቢለ ኣዒንተይ ኣልዐልኩ። እንሆ ድማ፡ ኣብ ሰሜን እቲ ደገ መሰውኢ ኣብቲ መእተዊ፡ እቲ ምስሊ ቕንኣት ነበረ።

⁶ንሱ ኸኣ፡ ኣታ ወዲ ሰብ፡ እቲ ዚገብርዎ ዘለዉ ትርኢዶ ኣሎኻ ኣነ ኻብ ቤት መቕደሰይ ምእንቲ ኽርሕቕ ኢሎም እቲ ቤት እስራኤል ኣብዚ ዚገብርዎ ዘለዉ ዓብዪ ጽያፍዶ ትርኢ ኣሎኻ ኤረ ገና ኻብዚ ዚዐቢ ጽያፍውን ክትርኢ ኢኻ፡ በለኒ።

⁷ንሱ ኸኣ ናብ ደገ እቲ ኣጸድ ወሰደኒ፡ እንሆውን ኣብቲ መንደቕ ሓደ ነዃል ርኤኹ።

⁸ንሱ ኸኣ፡ ኣታ ወዲ ሰብ፡ ነቲ መንደቕ ኲዐቶ፡ በለኒ። ነቲ መንደቕ ምስ ኰዐትክዎ ድማ፡ እንሆ፡ ኣፍ ደገ ረኸብኩ።

⁹ንሱውን፡ እቶ እሞ ነቲ ኣብዚ ዚገብርዎ ዘለዉ ሕሱም ጽያፍ ርኣዮ፡ በለኒ።

¹⁰ኣቶኹን፡ እንሆ ኸኣ፡ ብዙሕ ምስሊ እቶም ዜጸይፉ ለመም ዚብሉን ርኹሳት እንስሳን ኲሎም ጣኦታት ቤት እስራኤልን ኣብ ወሰነወሰን እቲ መንደቕ ተስኢሉ ነበረ።

¹¹ኣብ ቅድሚኦም ከኣ ሰብዓ ሰብኣይ ካብ ዓበይቲ ቤት እስራኤል፡ ኣብ ማእከሎም ድማ የኣዛንያ ወዲ ሻፋን ቈይሙ፡ ኣብ ኢድ ነፍሲ ወከፎም ድማ ጽንሃህ ሒዞም፡ ኣብኡ ደው ኢሎም ነበሩ። እቲ መኣዛ ዕጣንውን ዑብ ኢሉ ወጸ።

¹²ሽዑ ንሱ፡ ኣታ ወዲ ሰብ፡ እቶም ዓበይቲ ቤት እስራኤል፡ እግዚኣብሄር ኣይርእየናን፡ እግዚኣብሄር ነዛ ሃገር ሐዲግዋ እዩ፡ ኢሎምሲ፡ ነፍሲ ወከፎም ኣብ ጸልማት ኣብ ሸሽር ጓና ምስልታቶም ኰይኖም ዚገብርዎ ዘለዉዶ ርኢኻዮም ኣሎኻ፡ በለኒ።

¹³ንሱ ኸኣ፡ ኤረ ኻብዚ ዚገድድ ዚገብርዎ ዘለዉ ጽያፍውን ክትርኢ ኢኻ፡ በለኒ።

¹⁴ናብቲ ናብ ሰሜን ኣቢሉ ዘሎ ኣፍ ደገ ቤት እግዚኣብሄር ወሰደኒ፡ እንሆ ኸኣ፡ ኣብኡ ኣንስቲ ተቐሚጦን ንተሙዝ ይበኽያሉይ ነበራ።

¹⁵ሽዑ ድማ፡ ኣታ ወዲ ሰብ፡ ርኢኻዮዶ ገና ኻብዚ ዚገድድ ርኽሰትውን ክትርኢ ኢኻ፡ በለኒ።

¹⁶ናብቲ ውሽጣዊ ኣጸድ ቤት እግዚኣብሄር ወሰደኒ። እንሆ ኸኣ፡ ኣብቲ ደገ መቕደስ እግዚኣብሄር ኣብ መንጎ ገበላን መሰውእን ኣስታት ዕስራን ሓሙሽተን ሰብኣይ ዝባኖም ናብ መቕደስ እግዚኣብሄር፡ ገጾም ድማ ናብ ምብራቕ ኣቢሎም ነበሩ። ናብ ምብራቕ ኣቢሎም ንጸሓይ ይሰግዱ ነበሩ።

¹⁷ንሱ ኸኣ፡ ኣታ ወዲ ሰብ፡ ርኢኻዶ ነታ ሃገር ብዓመጽ መሊኦምዋ፡ መመሊሶም ድማ ኲራይ ዘለዓዕሉስ፡ ቤት ይሁዳ እዚ ኣብዚ ዚገብርዎ ዘለዉ ጽያፍዶ ውሒድዎም እዩ እንሆ፡ ንሳቶም ጨንፈር ኣብ ኣፍንጫኦም የቕርቡ ኣለዉ፡ በለኒ።

¹⁸ስለዚ ኣነ ድማ ብነድሪ ኽገብር እየ፡ ዓይነይ ኣይክትንሕፍን እያ፡ ኣይክርሕርሕን ከኣ እየ፡ ኣብ እዝነይ ዓው ኢሎም እንተ ጨርሑ እኳ ኣይክሰምዖምን እየ።