Read መ/ቅዱስ ትግርኛ, Tigrigna Bible, 1997 ትንቢት ዳንኤል 10 Bible Online

ትንቢት ዳንኤል 10 - መ/ቅዱስ ትግርኛ, Tigrigna Bible, 1997 bible

ትንቢት ዳንኤል 10

¹ንቂሮስ ንጉስ ፋርስ ኣብታ ሳልሰይቲ ዓመቱ ነቲ ቤልጥሻጽር እተሰምየ ዳንኤል ነገር ተገልጸሉ፡ እቲ ነገር ከአ ሓቂ እዩ፡ ስለ ዓብዩ መከራ ድማ እዩ። ንሱ ነቲ ነገር ኣቕለበሉ፡ ነቲ ራእይውን ኣስተውዐሎ።

²በቲ ጊዜ እቲ ኣነ ዳንኤል ሰለስተ ሰሙን ምሉእ ሐዚነ ነበርኩ።

³እተን ሰለስተ ሰሙን ክሳዕ ዚፍጸማ፡ ጥዑም መባልዕ ኣይበላዕኩን፡ ስጋን ወይንን ናብ ኣፈይ ኣየእቶኹን፡ ዘይቲውን ኣይተሌኼኹን።

⁴ኣብታ መጀምርታ ወርሒ ኣብ መበል ዕስራን ኣርባዕተን መዓልቲ ኣብ ወሰን እቲ ዓብዩ ርባ ሂዴቄል ነበርኩ።

⁵ኣዒንተይ ቄላሕ አበልኩ እሞ ርኤኹ፡ እንሆ ኸአ፡ ካብ ልሕጺ እንጣጢዕ እተገብረ ዓለባ እተኸድነ ኣብ ሕቑኡ ድማ ጽሩይ ወርቂ ኡፋዝ እተቐነተ ሰብኣይ ነበረ።

⁶ስጋኡ ኸም በሪሎስ፡ ገጹ ኸም ትርኢት መብረቕ፡ ኣዒንቱ ኸም ዚነድድ ፋና፡ ቀላጽሙን ኣእጋሩን ከም ርእሱ ኣስራዚ፡ ድምጺ ቓላቱ ድማ ከም ድምጺ ብዙሕ ሕዝቢ ነበረ።

⁷ነቲ ራእይ ኣነ ዳንኤል በየነይ እየ ዝርኤኽዎ፡ እቶም ምሳይ ዝነበሩ ሰባት ነቲ ራእይ ኣይረአይዎን፡ ዓብዩ ስምባድ ግና ወደቖም፡ ኪሕብኡ ኽአ ሀደሙ።

⁸ሽዑ በይነይ ተረፍኩ፡ ነዚ ዓብዩ ራእይ እዚ ኸአ ርኤኹ፡ ሓይሊ ኣይተረፈንን፡ ሓብሪ ገጸይ ክሳዕ ዚበላሾ ተለወጠኒ፡ ሓይሊውን ኣይተረፈንን።

⁹ድምጺ ቓላቱ ስመኣዕኩ፡ ድምጺ ቓላቱ ምስ ሰማዕኩ ኸአ፡ ውኖይ ጠፊኡኒ፡ ብገጸይ ናብ ምድሪ ወደቕኩ።

¹⁰እንሆ ኸአ፡ ኢድ ተንከየትኒ፡ በብራኸይን ብግናዕ ኣእዳወይን ከአ ኣተንስኣትኒ።

¹¹ንሱውን፡ ኣታ ዳንኤል፡ ኣዚኻ እተፈቶኻ ሰብ፡ ኣነ ሕጂ ናባኻ ታላኢኸ እየ እሞ፡ ነቲ ኣነ ዝነግረካ ቓላት ኣስተውዕሎ፡ ቀጥ ኢልካ ድማ ደው በል በለኒ። እዚ ቓል እዚ ምስ ተዛረበኒ፡ እናንቀጥቀጥኩ ደው በልኩ።

¹²በለኒ ድማ፡ ዳንኤለየ፡ ካብታ ልብኻ ናብ ምስትውዓል ዘቕናዕካላ ርእስኻውን ኣብ ቅድሚ ኣምላኽካ ዘትሐትካላ ቐዳመይቲ መዓልቲ ጀሚረን ቃላትካ ተሰሚዔን እየን እሞ፡ ኣይትሸበር፡ ምእንቲ እዘን ቃላትካ ኸአ መጺኤ እኔኹ።

¹³እቲ መስፍን መንግስቲ ፋርስ ግና ዕስራን ሓደን መዓልቲ ተቓወመኒ። እንሆ ኸአ፡ ሚካኤል፡ ካብቶም ኣውራታት መሳፍንትስ ሓደ፡ ንምሕጋዘይ መጸ፡ ኣነውን ኣብኡ ምስቶም ነገስታት ፋርስ ተረፍኩ።

¹⁴እዚ ራእይ ንዳሕራይ ዘበን ዚኺውን እዩ እሞ፡ ኣነ ንህዝብኻ ኣብ መወዳእታ ዘመብ ዚበጽሖም ከፍልጠካ መጺኤ እኔኹ።

¹⁵እዚ ቓላት እዚ ምስ ነገረኒ፡ ገጸይ ናብ ምድሪ ኣድነንኩ ዓባስውን ኮንኩ።

¹⁶እንሆ ኸአ፡ ወዲ ሰብ ዚመስል ከናፍረይ ተንከየኒ፡ ሽዑ ኣፈይ ከፊተ ተዛረብኩ፡ ነቲ ኣብ ቅድመይ ደው ኢሉ ዝነበረ ድማ፡ ጐይታየ በቲ ዝርኤኽዎ ራኣይሲ ሕማመይ ደጊሱኒ፡ ሓይሊ ኣይተረፈንን። ኣነስ ገለ ሓይሊ ኣይተረፈንን። ምስትንፋስ እኳ ስኢነ እየ እሞ፡ ባርያ እዚ ጐይታይስ ከምይ ኢሉ ምስ እዚ ጐይታይ ኪዛረብ ይከአሎ፡ በልክዎ።

¹⁷እንሆ ኸአ፡ ወዲ ሰብ ዚመስል ከናፍረይ ተንከየኒ፡ ሽዑ ኣፈይ ከፊተ ተዛረብኩ፡ ነቲ ኣብ ቅድመይ ደው ኢሉ ዝነበረ ድማ፡ ጐይታየ በቲ ዝርኤኽዎ ራኣይሲ ሕማመይ ደጊሱኒ፡ ሓይሊ ኣይተረፈንን። ኣነስ ገለ ሓይሊ ኣይተረፈንን። ምስትንፋስ እኳ ስኢነ እየ እሞ፡ ባርያ እዚ ጐይታይስ ከምይ ኢሉ ምስ እዚ ጐይታይ ኪዛረብ ይከአሎ፡ በልክዎ።

¹⁸ሽዑ እቲ ሰብ ዚመስል ከም ብሓድሽ ተንከየኒ ኣበርትዓኒውን።

¹⁹ንሱ ኸአ፡ ኣታ ኣዚኻ እተፈቶኻ ሰብ፡ ኣይትሸበር፡ ሰላም ንኣኻ ይኹን፡ በርትዕ፡ ኤረ በርትዕ፡ በለ። ምስ ተዛረበኒ፡ በርታዕኩ፡ ኣነውን ጐይታየ፡ ኣበርቲዕካኒ ኢኻ እሞ፡ ተዛርብ፡ በልኩ።

²⁰ንሱ ድማ በለ፡ ኣነ ስለምንታይ ኢለ ናባኻ ኸም ዝመጻእኩዶ ፈሊጥካ አሎኻ፡ ሕጂ ኸአ ምስ መስፍን ፋርስ ክዋጋእ ክምለስ እየ። ኣነ ኽወጽእ ከሎኹስ፡ እንሆ፡ እቲ መስፍን ዮናኒ ኽመጽእ እዩ።

²¹ግናኸ እቲ ኣብ መጽሃፍ ሓቂ እተጻሕፈ እነግረካ አሎኹ፡ ነዚኣቶም ንምቅዋም፡ በጀካ ሚካኤል፡ እቲ መስፍንኩም፡ ሓደ እኳ ዚሕግዘኒ የብለይን።