Read መ/ቅዱስ ትግርኛ, Tigrigna Bible, 1997 ትንቢት ዳንኤል 11 Bible Online

ትንቢት ዳንኤል 11 - መ/ቅዱስ ትግርኛ, Tigrigna Bible, 1997 bible

ትንቢት ዳንኤል 11

¹ኣነ ኸአ በታ ቐዳመይቲ ዓመት ዳርዮስ ሜዶናዊ ኽሕግዞን ከጽንዖን ቆይመ ነበርኩ።

²ሕጂ ኸአ ነቲ ሓቂ ኸፍልጠካ እየ። እንሆ እንድሕርዚውን ኣብ ፋርስ ሰለስተ ነገስታት ኪትንስኡ እዮም። እቲ ራብዓይ ድማ ካብ ኩላቶም ዝበለጸ ኺህብትም እዩ። በቲ ሃብቱ ምስ በርትዔ ድማ፡ ንኹላቶም ኣብ ልዕሊ መንግስቲ ዮናኒ ኺተንስኦም እዩ።

³ሽዑ ዓብዩ ግዝኣት ዚገዝእን ዝደለየ ዚገብርን ብርቱዕ ንጉስ ኪትንስእ እዩ።

⁴ንሱ ምስ ተንስኤ ኸአ፡ መንግስቱ ክትስበር፡ ክሳዕ ኣርባዕቲኡ ንፋሳት ሰማይ ድማ ኽትመቓቐል እያ። መንግስቱ ኽትፈርስ፡ ካብቶም ናብ ካልኦት ክትሓለፍ እያ እሞ፡ ንዘርኡ ኣይክትከውንን እያ፡ ከምቲ ኺገዝእ ከሎ ዝነበሮ ስልጣን ከአ ኣይኪህልዋን እዩ።

⁵እቲ ንጉስ ደቡብ ኪብርትዕ፡ ሓደ ኻብ መሳፍንቱ ኸአ ኻብኡ ኽብርትዕን ኪገዝእን እዩ፡ ግዝኣቱውን ዓብዩ ግዝእት ኪኸውን እዩ።

⁶ድሕሪ ቕሩብ ዓመታት ከአ ኪሐብሩ እዮም። እታ ጓል ንጉስ ደቡብ ድማ ከተሳማምዕ ኢላ ናብ ንጉስ ሰሜን ክትመጽእ፡ ግናኸ ሓይሊ ቕልጽማስ ኣይከተጽንዕን እያ። ንሱን ቅልጽሙን ከአ ኣይኪቐውምን እዩ። ንሳ እቶም ዜምጽእዋን እቲ ዝወለዳን እቲ በቲ ግዝያት ዝደገፋን ሓሊፎም ኪውሀቡ እዮም።

⁷ካብ ሱራ ዝወጸ ውልዶ ግና ኣብታ ቦታኡ ኺትንስእ እዩ፡ ንሱ ናብ ሰራዊት ኪመጽእ፡ ናብ ዕርዲ ንጉስ ሰሜን ኪአቱ፡ ከም ዝደለየ ኺገብሮምን ኪስዕሮምን እዩ።

⁸ኣማልኽቶም፡ ምስናይ እቲ ፍሱስ ምስልታቶም፡ ምስቲ ክቡር ናይ ብሩርን ወርቅን ኣቓሑኦም ናብ ግብጺ ኺማርኾም እዩ። ንሓያሎ ዓመታት ከአ ምስ ንጉስ ሰሜን ከይተዋግኤ ኪቕመጥ እዩ።

⁹ንሱ ድማ ናብ መንግስቲ ንጉስ ደቡብ ኪመጽእ፡ ግናኸ ናብ ሃገሩ ኺምለስ እዩ።

¹⁰ደቁ ኸአ ንውግእ ኪዳለው፡ ኣብዚሖም ዓብዩ ሰራዊት ኪእክቡ እዮም። እቲ ሓደ ድማ ቀልጢፉ ኺመጽእ፡ ከም ውሒዝ ውሒዙ ኺሐልፍ፡ ኪምለስ ድማ እዩ፡ ክሳዕ ዕርዱውን ኪዋጋእ እዩ።

¹¹እቲ ንጉስ ደቡብ ከአ ኪምረር፡ ምስኡ፡ ምስቲ ንጉስ ሰሜን፡ ኪዋጋእ ኢሉውን ኪመጽእ እዩ። ንሱ ንብዙሓት ኬኽትት፡ እቶም ብዙሓት ግና ኣብ ኢዱ ኺውሀቡ እዮም።

¹²ነቶም ብዙሓት ኪወስዶም፡ ልቡ ኸአ ኪዕበ፡ ኣእላፋትውን ኬውድቕ እዩ። ግናኸ በዝስ ኣይኪብርትዕን እዩ።

¹³እቲ ንጉስ ሰሜን ኪምለስ፡ ካብቲ ናይ ቅድም ዚበዝሑ ብዙሓት ከአ ኬኽተት እዩ። ኣብ መወዳእታ ዘመናትን ዓመታትን ብዙሕ ሰራዊትን ገንዘብን ሒዙ ኽመጽእ እዩ።

¹⁴በቲ ዘመን እቲ ንንጉስ ደቡብ ብዙሓት ኪትንስእዎ እዮም። ካብ ማእከል ህዝብኻ ዓመጸኣታት ነቲ ራእይ ኪፍጽሙስ ልዕል ኪብሉ ግናኸ ኪወድቁ እዮም።

¹⁵እቲ ንጉስ ሰሜን ኪመጽእ፡ ክቢ ኺሰርሕ፡ ነታ ዕርድቲ ኸተማ ኸአ ኪሕዛ እዪ። ቀላጽም ደቡብ ኣይኪጸንዕን፡ እቶም ሕሩያት ህዝቡ ኸአ ንምቅዋም ዚኸውን ሓይሊ የብሎምን።

¹⁶እቲ ዚመጾ ግና ከም ዝደለዮ ኺገብር እዩ፡ ዚቃወሞ ኸአ ሓደ የልቦን። ንሱ ኣብታ ኽብርቲ ሃገር ኪቐውም፡ ኣብ ኢዱውን ጥፍኣት ኪኸውን እዩ።

¹⁷ምስ ሓይሊ ኹሉ መንግስቱ ኺመጽእ፡ ኪሰማማዕ ኢሉ ኸአ ገጹ ኽመልስ እዩ። ምእንቲ ኼጥፍኣ፡ ጓል ኣንስተይቲ ኽህቦ እዩ። ንሳ ኣይክትቀውምን፡ ንእኡውን ኣይክትከውንን እያ።

¹⁸ድሕርዚ ገጹ ናብ ደሴታት ኪመልስ፡ ካብኣተን ከአ ብዙሓት ኪወስድ እዩ። ሓደ መስፍን ግና ነቲ ጸርፉ ኼትርፎ፡ ኤረ ናብ ርእሱ ኺመልሰሉ እዩ።

¹⁹ገጹ ናብ እምባ ሃገሩ ኺመልስ፡ ኪሕንኮልን ኪወድቕን እዩ፡ ኣይኪርከብን ከአ እዩ።

²⁰ሽዑ ካብ ክንዳኡ ሓደ ኻልእ ኪትንስእ፡ ኣብታ ኽብርቲ መንግስቲ ከአ ንመጨነቒ ኣሕሊፉ ኺሰዶ እዩ። ድሕሪ ቕሩብ መዓልትታት ግና ኪጠፍእ፡ ብቑጥዓ ኣይኮነን፡ ብኹናትውን ኣይኮነን።

²¹ኣብ ክንዳኡ ኸአ ክብሪ መንግስቲ ዘይህብዎ ሓደ ንዑቕ ሰብ ኪትንስእ እዩ፡ ቀስ ኢሉ ኺመጽእ፡ ነታ መንግስቲ ድማ እናቃባጠረ ኽሕዛ እዩ።

²²ብቐላጽም ውሒዝ ካብ ቅድሚኡ ኺድምሰሱን ኪስበሩን እዮም፡ ኤረ እቲ መስፍን ቃል ኪዳን እኳ ኸይተረፈ።

²³ኪዳን ምስኡ ምስ ተኣታተወ ኸአ፡ ብተንኮል ኪገብር እዩ፡ ኪወጽእን ብሒደት ጭፍራ ኺስዕርን እዩ።

²⁴ቀስ ኢሉ ናብተን ልምሉማት ቦታታት እታ ኣውራጃ ኺአቱ እዩ፡ እቶም ኣቦታቱ፡ ኤረ እቶም ኣቦታት ኣቦታቱ እኳ ከቶ ዘይገብርዎ ኺገብር እዩ። ብዝበዛን ምርኮን ገንዘብን ኬማቕሎም፡ ነተን ጽኑዓት ከተማታት ኪህቅነለን እዩ፡ እዚውን ንቕሩብ ጊዜ እዩ።

²⁵ዕብዩ ሰራዊት ሒዙ ሓይሉን ትብዓቱን ኣብ ልዕሊ ንጉስ ደቡብ ኬተንስእ እዩ። ንጉስ ደቡብ ከአ ዓብይን ኣዝዩ ብርቱዕን ሰራዊት ሒዚ ንውግእ ኪትንስእ፡ ግናኸ ምኽሪ ኺጣበቡሉ እዮም እሞ፡ ኣይኪቐውምን እዩ።

²⁶እቶም ኣብ መኣዱ ዚበልዑ ኸአ ኪጭፍልቕዎ እዮም፡ ሰራዊቱ ኺውሕዝ እዩ፡ ብዙሓትውን ተወጊኦም ኪወድቁ እዮም።

²⁷ክልቲኦም ነገስታት በብልቦም እከይ ኪሐስቡ፡ ኣብ ሓንቲ መአዲ ተቐሚጦም ከአ ሓሶት ኪዛረቡ እዮም። ግናኸ መወዳእትኡ ኣብታ ምድብቲ ዘመን እዩ ዚኸውን እሞ ኣይኪሰልጥን እዩ።

²⁸ብዙሕ ገንዘብ ሒዙ ናብ ሃገሩ ኺምለስ፡ ልቡ ነቲ ቅዱስ ኪዳን ኪህቅነሉ፡ ኪገብር ከአ እዩ እሞ ናብ ሃገሩ ኺምለስ እዩ።

²⁹በታ ምድብቲ ዝመን ተመሊሱ ናብ ደቡብ ኪኸይድ፡ ግናኸ እቲ ዳሕራይ ጊዜስ ከምቲ ቐዳማይ ኣይኪኸውንን ኣዩ።

³⁰መራኽብ ካብ ኪቲም ኪመጻኦ እየን እሞ፡ ኪሽበርን ኪምለስን እዩ። ኣብ ልዕሊ እታ ቅድስቲ ኺዳን ኪኾሪ ኺገብርውን እዩ። ኪምለስ፡ ነቶም ነታ ቅድስቲ ኺዳን ዝሐደግዋ ድማ ኪሰምዖም እዩ።

³¹ቀላጽሙ ኣብኡ ኪቖሙ፡ ነታ መቕደስን ነቲ ዕርድን ኬርክሱ፡ ነቲ ናይ ኩሉ መዓልቲ መስዋእቲ ኼውግዱ፡ ነቲ ዜጥፍእ ፍንፉን ነገር ከአ ኬቕሙ እዮም።

³²ነቶም ነታ ኺዳን ብረሲእነት ዝበደሉስ እናቃባጠረ ኼስሕቶም እዩ፡ ነቲ ንኣምላኹ ዚፈልጥ ህዝቢ ግና ኪብርትዕን ኪገብርን እዩ።

³³እቶም ጠቢባን ህዝቢ ኽአ ንብዙሓት ኪምህሩ እዮም፡ ግናኸ ንቕሩብ ጊዜ ብሰይፍን ብሃልሃልታን ብምርኮን ብበዝባዝን ኪወድቁ እዮም።

³⁴ምስ ወደቑ ኸአ፡ ብቕሩብ ረድኤት ኪርድኡ እዮም፡ ግናኸ ብዙሓት ብግብዝና ኺሐብርዎም እዮም።

³⁵እዝስ በቲ ምዱብ ግዜ እዩ ዚኸውን እሞ ካብቶም ጠቢባን ሓያሎ ኽሳዕ ዘመን መወዳእታ ምእንቲ ኪኾልዖምን ኬጽርዮምን ኬጻዕድዎምንሲ፡ ኪወድቁ እዮም።

³⁶እቲ ምዱብ ነገር ኪፍጸም እዩ እሞ፡ እቲ ንጉስ ከም ፍቓዱ ኺገብርን ርእሱ ኼልዕልን ኣብ ልዕሊ ኣምላኽ ኣማልኽቲ ድማ መስተንክር ኪዛረብን እዩ፡ እቲ ቖጥዓ ኽሳዕ ዚፍጽምሲ፡ ኪሰልጠሉ እዩ።

³⁷ኣብ ልዕሊ ኹሉ ኺዕበ እዩ እምበር፡ ንኣምላኽ ኣቦታቱ ኣይኬቕልበሉን፡ ነቲ ሃረርታ ኣንስትን ንኣምላኽ ዘበለን ኣይኬቕልበሎምን እዩ።

³⁸ካብ ክንዳኡስ ነቲ ኣምላኽ ዕርድታት ኬኽብር፡ ነቲ ኣቦታቱ ዘይፈለጥዎ ኣምላኽ ብወርቅን ብብሩርን ብኽቡር ኣእማንን ብዝኸበረ ኣቓሑን ኬኽብሮ እዩ።

³⁹ነቲ ጽኑዕ ዕርድታት ብጓና ምላኽ ተሓጊዙ ኸምዚ ኺገብሮ እዩ፡ ነቶም ዚቕበልዎ ኽብሪ ኼብዝሓሎም፡ ኣብ ልዕሊ ብዙሓት ኬግዝኦም፡ ከም ዓስቢ ኸኣአ ነታ ምድሪ ኪኽፋፍላ እዩ።

⁴⁰ኣብ ዘመን መወዳኣታ ግና እታ ንጉስ ደቡብ ኪገጥመሉ እዩ። እቲ ንጉስ ሰሜን ከአ ብሰረገላታትን ብፍራስን ብብዙሕን መራኸብን ከም ህቦብላ ንፋስ ኮይኑ ኺመጾ እዩ፡ ኣብተን ሃገራት ድማ ኪአቱን ኪውሕዝን ኪሐልፍን እዩ።

⁴¹ናብታ ኽብርቲ ሃገር ከአ ኪአቱ እዩ፡ ብዙሓት ሃገር ድማ ኪወድቁ እዮም። ግናኸ ኤዶምን ሞኣብን እቶም ኣውራታት ደቂ ዓሞንን ካብ ኢድ ኼምልጡ እዮም።

⁴²ኣብ ሃገራት ድማ ኢዱ ኺዝርግሕ እዩ፡ ሃገር ግብዚውን ኣይከተምልጥን እያ።

⁴³ንሱ ኣብቲ መዛግብ ወርቅን ብሩርን ኣብ ኩሉ እቲ ኽቡር ኣቓሑ ግብጽን ኪሰልጥን እዩ፡ ሊብያን ኢትዮጵያን ድማ ኪስዕብዎ እዮም።

⁴⁴ግናኸ ካብ ምብራቕን ካብ ሰሜንን ዚመጽእ ወረ ኼሸብሮ እዩ እሞ፡ ንብዙሓት ኬጥፍእን ኬጽንትን ኢሉ፡ ብዓብዩ ነድሪ ኺወጽእ እዩ።

⁴⁵ንሱ ኣብ መንጎ ባሕርን ኣብ መንጎ እታ ኽብርቲ ቅድስቲ ደብርን ድንኳናት ኣዳራሹ ኺተክል እዩ። ግናኸ ናብ መወዳእታኡ ኺበጽእ እዩ፡ ዚረድኦ ኽአ የብሉን።