Read መ/ቅዱስ ትግርኛ, Tigrigna Bible, 1997 ትንቢት ዳንኤል 12 Bible Online

ትንቢት ዳንኤል 12 - መ/ቅዱስ ትግርኛ, Tigrigna Bible, 1997 bible

ትንቢት ዳንኤል 12

¹በቲ ዘመንቲ ሚካኤል፡ እቲ ምእንቲ ደቂ ህዝብኻ ዚቐውም ዓብዩ መስፍን፡ ኪትንስእ እዩ። ሽዑ ዘመን ጸበባ ኪኸውን እዩ፡ ከምኡስ ካብታ ህዝቢ ዝህለውላ ጀሚሩ ኽሳዕ እታ ጊዜ እቲኣ ከቶ ኾይኑ ኣይፈልጥን። በታ ጊዜ እቲኣስ ህዝብኻ፡ ኣብ መጽሓፉ እተረኽበ ዘበለ፡ ኪድሕን እዩ።

²ካብቶም ኣብ መሬት ምድሪ ደቂሶም ዘለውስ ብዙሓት፡ ገሊኦም ናብ ናይ ዘለአለም ህይወት፡ ገሊኦም ከአ ናብ ሕፍረትን ናብ ናይ ዘለአለም ነውርን ኪበራበሩ እዮም።

³እቶም ጠቢባን ከም ምንጽብራቕ ጠፈር፡ እቶም ንብዙሓት ናብ ጽድቂ ዚመርሑ ኸአ ከም ከዋኽብቲ ንዘለአለም ኣለም ኪበርሁ እዮም።

⁴ንስኻ ግና፡ ኣታ ዳንኤል፡ ክሳዕ ዘመን መወዳኣት ነዘን ቃላት እዚኤን ዕጸወን፡ ነዛ መጽሓፍ እዚኣ ኸኣአ ሕተማ። ብዙሓት ኪምርምርዋ እዮም፡ ምስትውዓል ድማ እናወሰኸ ኪኸይድ እዩ።

⁵ኣነ ዳንኤል ከአ ጠመትኩ፡ እንሆውን፡ ክልተ ኻልኦት፡ እቲ ሓደ ኣብ ክንጀው ገምገም ርባ፡ እቲ ኻልኣይ ድማ ኣብ ክንየው ገምገም ርባ ደው ኢሎም ነበሩ።

⁶ሓዲኦም ከአ ንቲ ኻብ ልሕጺ እንጣጢዕ እተገብረ ዓለባ እተኸድነ፡ ስብ ልዕሊ ማይ እቲ ርባውን ደው ዝበለ ሰብኣይ፡ እዚ ዜስተንክር ነገር እዝስ መወዳእትኡ፡ መኣዝ ኪኸውን እዩ፡ ኢሉ ጠየቖ።

⁷እቲ ኻብ ልሕጺ እንጣጢዕ እተገብረ ዓለባ እተከድነ፡ ኣብ ልዕሊ ማይ እቲ ርባውን ደው ዝበለ ሰብኣይ ንየማነይትን ጸጋመይትን ኣእዳው ናብ ሰማይ ኣቢሉ ኣልዐለ እሞ፡ ንዘመንን ዘመናትን ፈረቓ ዘመንን እዩ፡ ነቲ ሓይሊ እቲ ቅዱስ ህዝቢ ጠሪሶም ምስ ሰበርዎ፡ ኩሉ እዚ ነገር እዚ ኪፍጸም እዩ፡ ኢሉ በቲ ንዘለአለም ህያው ኮይኑ ዚነብር ኪምሕል ከሎ ሰማዕክዎ።

⁸ኣነ ድማ ሰማዕኩ፡ ግናኸ ኣየስተውዐልኩን እሞ፡ ጐይታየ መወዳእታ እዝስ እንታይ እዩ በልኩ።

⁹ንሱ ኸአ በለ፡ ዳንኤለየ፡ እዚ ቓላት እዚ ኽዳዕ ዘመን መወዳእታ ሕቡእን ሕቱምን እዩ እሞ፡ ኪድ ደአ።

¹⁰ብዙሓት ኪጸርዩ ኪጽዕድው ኪኹልዑውን እዮም፡ እቶም ረሲኣን ግና ረሲእነት ኪገብሩ እዮም። እቶም ጠቢባን እዮም ዜስተውዕልዎ እምበር፡ ካብቶም ረሲኣንሲ ሓደ እኳ ኣይኬስተውዕሎን እዩ።

¹¹ካብቲ ናይ ኩሉ መዓልቲ መስዋእቲ እተወገደሉን ዜጥፍእ ፍንፉን ነገር ዝቖመሉን ዘመን ጀሚሩ፡ ሽሕን ክልተ ሚእትን ተስዓን መዓልቲ እዩ።

¹²እቲ ዚጽበን፡ ኣብተን ሽሕን ሰለስተ ሚእትን ሰላሳን ሓሙሽተን መዓልቲ ዚበጽሕን ብጹእ እዩ።

¹³ንስኻ ግና ናብ መወዳእታ ኣቢልካ ኺድ። ክትዐርፍ፡ በቲ መወዳእታ መዓልትታት ከአ ናብ ግዴኻ ኽትትንስእ ኢኻ።