Read መ/ቅዱስ ትግርኛ, Tigrigna Bible, 1997 ትንቢት ዳንኤል 5 Bible Online

ትንቢት ዳንኤል 5 - መ/ቅዱስ ትግርኛ, Tigrigna Bible, 1997 bible

ትንቢት ዳንኤል 5

¹ንጉስ ቤልሻጽር ንሽሕ መኳንንቲ ዓብዩ ምሳሕ ገበረሎም፡ ኣብ ቅድሚ እቶም ሽሕ ድማ ወይኒ ይሰቲ ነበረ።

²ቤልሻጽር ሰኺሩ፡ ንጉስን መኳንንቱን ኣንስቱን ዕቁባቱን ብእኡ ምእንቲ ኺሰትዩ፡ ነቲ ኣቦኡ ነቡካድነጸር ካብ መቕደስ ዮርሳሌም ዝወሰዶ ኣቓሑ ወርቅን ብሩርን ኬምጽእዎ አዘዘ።

³ሽዑ ነቲ ኻብቲ ኣብ ዮርሳሌም ዝነበረ መቕደስ ቤት ኣምላኽ ዝወሰድዎ ኣቓሑ ወርቂ ኣምጽእዎ። እቲ ንጉስን መኳንንቱን ኣንስቱን ዕቁባቱን ከአ ብእኡ ገይሮም ሰተዩ።

⁴ወይኒ እናሰተዩ፡ ነቶም ወርቅን ብሩርን በስራዝን ብሓጺንን ብዕጨይትን ብእምንን እተገብሩ ኣማልኽቶም ወሰዱ።

⁵በታ ሰዓት እቲኣ ኣብቲ ልቕሉቕ መንደቕ ኣዳራሽ ንጉስ፡ ኣብ መንጽር እቲ ቐዋሚ ቐንዴልሲ ኣጻብዕ ኢድ ሰብ ወጸን ጸሓፈን። እቲ ንጉስ ድማ ነታ እትጽሕፍ ኢድ ረአያ።

⁶ሽዑ እቲ ንጉስ ገጹ ተለወጠ፡ ሓሳብቱ ኸአ እጨነቖ፡ ጅማውቲ ሕቕኡ ድማ ላሕልሔ፡ ኣብራኹውን ንሓድሕዱ ተዋቕዔ።

⁷እቲ ንጉስ ነቶም ኣስማተኛታትን ከለዳውያንን ቆጸርቲ ኸዋኽብትን ኬእትውዎም፡ ዓው ኢሉ ጨደረ። እቲ ንጉስውን ነቶም ጠቢባን ባቢሎን፡ ዝኾነ ይኹን ነዛ ጽሕፈት እዚኣ ዜንብባን ትርጓሜኣ ኸኣ ዚነግረንን ቀይሕ ሃሪ ኺለብስ፡ ድሪ ወርቂ ኺአስር፡ ኣብቲ መንግስቲ ድማ ሳልሳይ ገዛኢ ኪኸውን እዩ፡ ኢሉ መለሰ።

⁸ሽዑ ኹላቶም ጠቢባን ንጉስ አተው፡ ግናኸ ነታ ጽሕፈት ኬንብብዋን ትርጓሜኣ ኸኣአ ንቲ ንጉስ ኪነግርዎን ኣይአሉን።

⁹ሽዑ ንጉስ ቤልሻጽር ኣዝዩ ሰምበደ፡ ገጹ ተለወጠ፡ መኳንንቱውን ተጨነቑ።

¹⁰እታ ንግስቲ በቲ ንንጉስን መኳንንቱን ዝበጽሖም ነገር ናብ ቤት ምሳሕ አተወት። እታ ንግስቲ ኸአ ከምዚ ኢላ በለት፡ ዎ ንጉስ፡ ንዘለአለም ህያው ኩን፡ ሓሳባትካ ኣየጨንቕካን፡ ገጽካውን ኣይለወጥ።

¹¹መንፈስ ቅዱሳን ኣማልኽቲ ዘለዎ ሰብኣይ ኣብ መንግስትኻ አሎ። ብዘመን ኣቦኻ ድማ ብብርሃንን ኣእምሮን ከምቲ ጥበብ ኣማልኽቲ ዝኾነ ጥበብን ተረኽቦ። ዎ ንጉስ፡ ኣቦኻ ንጉስ ነቡካድነጸር፡ ባዕሉ ኣቦኻ፡ ኣብ ልዕሊ እቶም ጠቢባንን ኣስማተኛታትን ከለዳውያንን ቆጸርቲ ኸዋኽብትን ሾሞ።

¹²ኣብቲ እቲ ንጉስ ቤልጥሻጽር ኢሉ ዘውጽአሉ ዳንኤል ብሉጽ መንፈስን ፍልጠትን ምስትውዓል ምትርጓም ሕልምን ምግላጽ ምስጢርን ምቕናዕ እተጠላለፈ ነገርን ተረኺቡ እዩ እሞ፡ ሕጂ ዳንኤል ይጸዋዕ፡ ንሱውን ነቲ ትርጓሜ ኼፍልጠካ እዩ።

¹³ሽዑ ንዳንኤል ኣብ ቅድሚ ንጉስ ኣምጽእዎ። እቲ ንጉስ ከአ ንዳንኤል፡ እቲ ኻብቶም ኣቦይ ንጉስ ካብ ይሁዳ ዝማረኾም ደቂ ምሩኻት ይሁዳ ዝኾንካ ዳንኤል ንስኻዶ ኢኻ፡ ኢሉ መለሰ።

¹⁴ኣነ ብዛዕባኻ መንፈስ ኣማልኽቲ ኸም ዘሎካ፡ ብርሃንን ምስትውዓልን ብሉጽ ጥበብን ድማ ከም እተረኽበካ፡ ሰማዕኩ።

¹⁵ሕጂ ኸአ እቶም ጠቢባንን ፈለጥትን፡ ነዛ ጽሕፈት እዚኣ ኼንብብዋ እሞ ትርጓሜኣ ኼፍልጡኒ፡ ኣብ ቅድመይ ኣምጽእዎም፡ ግናኸ ትርጓሜ እቲ ነገርሲ ኼፍልጡኒ ኣይከኣሉን።

¹⁶ብዛዕባኻ ግና ትርጓሜታት ምትርጓም፡ እተፈልጠ ነገር ከአ ምፍታሕ ከም እትኽእል ሰምዔ አሎኹ። እምበኣርስ ነዛ ጽሕፈት ከተንብባን ትርጓሜኣ ድማ ከተፍልጠንን እንተ ኸኣልካስ፡ ቀይሕ ሃሪ ኽትለብስ፡ ድሪ ወርቂ ኣብ ክሳድካ ኽትአስር፡ ኣብታ መንግስቲ ኸአ ሳልሳይ ገዛኢ ኽትከውን ኢኻ፡ በሎ።

¹⁷ሽዑ ዳንኤል ኣብ ቅድሚ ንጉስ ከምዚ ኢሉ መለሰ፡ ህያባትካ ንኣኻ ይኹን፡ ውህበታትካውን ንኻልእ ሀቦ። ዝኾነ ኾይኑ ንንጉስ እታ ጽሕፈት ከንብበሉ፡ ትርጓሜኣውን ከፍልጦ እየ።

¹⁸ዎ ንጉስ፡ እቲ ልዑል ኣምላኽ ነቦኻ ነቡካድነጻር መንግስትን ዕቤትን ክብርን ግርማን ሀቦ።

¹⁹ስለ እቲ ንሱ ዝሀቦ ዕቤት ኩሎም ኣህዛብን ወገናትን ቋንቋታትን ኣብ ቅድሚኡ የንቀጥቅጡን ብህይወት ኪነብር ሐደጎ፡ ንዝደለዮ ልዕል አበሊ፡ ንዝደለዮ ኸአ ኣዋረዶ።

²⁰ግናኸ ልቡ ልዕል ምስ በለ፡ መንፈሱ ኸአ ተሪሩ ምስ ተዐበየ፡ ካብ ንፋስ መንግስቱ ወረደ፡ ክብረቱውን ተወሰዶ።

²¹ካብ ደቂ ሰብ ተሰጎ፡ ልቡ ኸአ ከም ናይ እንስሳ ኾነ፡ ምስ ኣድጊ በረኻ ድማ ሰፈረ፡ ከም ነብዑርውን ሳዕሪ ኣብልዕዎ፡ ስጋኡ ብኣውሊ ሰማይ ጠልቀየ፡ እዚ ኸአ እቲ ልዑል ኣምላኽ ኣብ ልዕሊ መንግስቲ ሰብ ከም ዚመልኽ፡ ንዝደለዮ ኸአ ኣብ ልዕሊኡ ኸም ዘቖሙሉ፡ ክሳዕ ዜስተውዕሎ እዩ ዝኾነ።

²²ኣታ ቤልሻጽር ወዱ፡ ምንም እኳ እዚ ኹሉ ፈሊጥካ ኽንስኻስ፡ ልብኻ ኣየትሓትካን።

²³ነቲ ጐይታ ሰማይ ርእስኻ ኣልዐልካሉ፡ ነቲ ኣቓሑ ቤቱ ኣብ ቅድሜኻ ኣምጽእዎ እሞ፡ ንስኻስ መኳንንትኻን ኣንስትኻን ዕቁባትካን ወይኒ ሰቴኹምሉ። ነቶም ዘይርእዩን ዘይሰምዑን ዘይፈልጡን ኣማልኽቲ ብሩርን ወርቅን ኣስራዝን ሓጺንን ዕንጨይትን እምንን ወደስካ እምበር፡ ንስትንፋስካን ንኹለን መገድኻን ኣብ ኢዱ ዝሐዘ ኣምላኽሲ ኣየኽበርካዮን።

²⁴ስለዚ ኸአ ነዛ ጽሕፈት እዚኣ ዝጸሐፈት ኢድ ካብኡ እያ እተላእከት።

²⁵እዛ ጽሕፈት ስሕፈት እትብሎ ዘላ ኸአ፡ መኔ፡ መኔ ቴቄል ኡፋርሲን፡ እዩ።

²⁶ትርጓሜኡ ድማ መኔ፡ ኣምላኽ ንመንግስትኻ ቖጸሮን ጠረሶን፡ ቴቄል፡ ብሚዛን ተመዚንካ፡ ቀሊልካ ተረኺብካ፡ ኡፋርሲን፡ መንግስትካ ተመቔላ ንሰብ ሜዶንን ፋርስን ተዋህበት ማለት እዩ።

²⁷ትርጓሜኡ ድማ መኔ፡ ኣምላኽ ንመንግስትኻ ቖጸሮን ጠረሶን፡ ቴቄል፡ ብሚዛን ተመዚንካ፡ ቀሊልካ ተረኺብካ፡ ኡፋርሲን፡ መንግስትካ ተመቔላ ንሰብ ሜዶንን ፋርስን ተዋህበት ማለት እዩ።

²⁸ትርጓሜኡ ድማ መኔ፡ ኣምላኽ ንመንግስትኻ ቖጸሮን ጠረሶን፡ ቴቄል፡ ብሚዛን ተመዚንካ፡ ቀሊልካ ተረኺብካ፡ ኡፋርሲን፡ መንግስትካ ተመቔላ ንሰብ ሜዶንን ፋርስን ተዋህበት ማለት እዩ።

²⁹ሽዑ ቤልሻጽር ንዳንኤል ቀይሕ ሃሪ ኪኸድንዎ፡ ኣብ ክሳዱ ኸአ ድሪ ወርቂ ኺአስሩሉ አዘዘ፡ ኣብታ መንግስቲ ሳልሳይ ገዛኢ ኪኸውን ድማ ኣዋክ ኣንገረሉ።

³⁰በታ ለይቲ እቲኣ ቤልሻጽር ንጉስ ከለዳውያን ተቐትለ።

³¹ዳርዮስ ሜዶናዊ ኸአ፡ ወዲ ስሳን ክልተን ዓመት ከሎ፡ ነታ መንግስቲ ተቐበላ።