Read መ/ቅዱስ ትግርኛ, Tigrigna Bible, 1997 ትንቢት ዳንኤል 8 Bible Online

ትንቢት ዳንኤል 8 - መ/ቅዱስ ትግርኛ, Tigrigna Bible, 1997 bible

ትንቢት ዳንኤል 8

¹ንግዝኣት ንጉስ ቤልሻጽር ኣብ ሳልሳይ ዓመቱ ንኣይ ዳንኤል፡ ድሕሪ እቲ መጀመርያ እተገልጸለይሲ፡ ርእይ ተገልጸለይ።

²ብራእይ ከአ ርኤኹ፡ ክርኢ ኸሎኹ ድማ፡ ኣብታ ኣብ ኣውራጃ ኤላም ዘላ ኸተማ ሱሳን ነበርኩ። ብራእይ ርኤኹ፡ ኣብ ጥቓ ርባ ኡላይ ከአ ነበርኩ።

³ኣዒንተይ ኣልዒለ ርኤኹ፡ እንሆ ኸአ ክልተ ዘርኑ ድዑል ኣብ ቅድሚ እት ርባ ደው ኢሉ ነበር፡ እተን ክልተ ኣቕርንቲ ድማ ልል ዝበላ እየን፡ እታ ሕሓቲ ግና ካብታ ሓንቲ ልዕል ዝበለት እያ፡ እዛ ኣውራ ልዕልቲ ኸአ ደሕሓ እያ ዝወጸት።

⁴እቲ ድዑል ድማ ንምራብ ኣቢል፡ ንሰሜን ኣብሉ፡ ንደቡብ ኣቢል ብአቕርንት ይፍልስ ነበረ፡ ኪቃወሞ ዚኽእል ኣራዊት ኣይነበረን፡ ካብ ኢዱ ኼናግፍ ዚኽእልውን ኣይነበረን። ንሱ ኸም ዝደለዮ ገበረ፡ ዓብዩ ድማ ኾነ።

⁵ኣነ ኸስተብህል ከሎኹ፡ እንሆ፡ ድቤላ ኣብ ምዕራብ ኣብ ዝባን ኩላ ምድሪ መጸ፡ ንምድሪ ኸአ ኣይተንከያን። እዚ ድቤላ እዚ ኣብ መንጎ ኣዒንቱ ምርእይቲ ቐርኒ ነበረቶ።

⁶ንሱ ናብቲ ኽልተ ዝቐርኑ ኣብ ቅድሚ ርባ ደው ኢሉ ርኤኽዎ ድዑል መጸ፡ ብነድሪ ሓይሉውን ጎየዮ።

⁷ናብቲ ድዑል ኪቐርብ ከሎ ዝርኤኽዎ፡ ኣዝዩ ኸአ ተቖጥዖ፡ ነቲ ድዑል ወቕዖ እሞ ክልቲኤን ኣቕርንቲ ሰበሮ፡ ናብ ምድሪ ኣውደቖን ረገጾን። እቲ ድዑልን ንምቅዋሙ ሓይሊ ሰአነ፡ ነቲ ድዑል ካብ ኢዱ ኼናግፎ ዝኸአለ ኸኣአ ኣይነበረን።

⁸እቲ ድቤላ ግና እምብዛ ዓብዩ ኾነ። ምስ በርትዔ ድማ፡ እታ ኦኣባይ ቀርኑ ተሰብረት፡ ኣብ ክንድኣ ኸኣ ኣርባዕተ ምርኡያት ኣቕርንይቲ ናብ ኣርባዕተ ንፋሳት ሰማይ ኣቢለን ወጻ።

⁹ካብ ሓንቲኤን ድማ ንእሽቶ ቐርኒ ወጸት፡ ንሳውን ናብ ደቡብን ናብ ምብራቕን ናብታ ኽብርቲ ሃገርን ኣቢላ ኣዝያ ዐበየት።

¹⁰ክሳዕ ሰራዊት ሰማይ ዐበየ እማ ካብቲ ሰራዊትን ካብ ከዋኽብትን ንሓያሎ ናብ ምድሪ ኣውደቖም ረገጾም ከአ።

¹¹ኤረ ኽሳዕ ነቲ ሐለቓ ሰራዊት እኳ ተዐበየል። ነቲ ናይ ኩሉ መዓልቲ መስዋእቲ ኸአ ካብኡ ኣትረፎ፡ እታ ማሕደር መቕደሱውን ፈረሰት።

¹²እቲ ሰራዊት ምስናይ እቲ ናይ ኩሉ መዓልቲ መስዋእትስ ብሰሪ ዕልወት እዩ እተዋህቦ። ንሱ ነታ ሓቂ ናብ ምድሪ ደርበያ፡ ገበረ ሰለጠሉ ኸአ።

¹³ሽዑ ኻብ ቅዱሳንሲ ሓደ ኺዛረብ ከሎ ሰማዕኩ። ሓደ ኻልእ ቅዱስ ድማ ነቲ ዚዛረብ ዘሎ፡ እቲ ብዛዕባ ናይ ኩሉ መዓልቲ መስዋእትን ብሰሪ ምዕላው ከአ እቲ መቕደስን ሰራዊትን ንምርጋጽ ምእንቲ ኺውሀብ ዚመጽእ ምዕናውን ዚነግር ራእይሲ ኽሳዕ መኣዝ እዩ ዝነብር፡ ኢሉ ተዛረቦ።

¹⁴ንሱ ኸአ፡ ክሳዕ ክልተ ሽሕን ሰለስተ ሚእትን ምሸትን ብጊሓትን፡ ሽዑ እታ መቕደስ ክትነጽህ እያ፡ በለኒ።

¹⁵ኮነ ድማ፡ ኣነ ዳንኤል ነቲ ራእይ ምስ ርኤኹ፡ ከስተውዕሎ ደሌኹ። እንሆ ኸአ፡ ሰብ ዚመስል ኣብ ቅድመይ ደው በለ።

¹⁶ካብ ማእከል ኡላይ ድማ፡ ገብርኤል፡ እቲ ራእይ ነዚ ሰብዚ ግለጸሉ፡ ኢሉ ዚጽውዕ ድምጺ ሰብ ሰማዕኩ።

¹⁷ንሱ ኸአ ናብታ ደው ኢለያ ዝነበርኩ ስፍራ ቐረበ። ምስ መጸ፡ ሰምበድኩ ብገጸይውን ወደቕኩ። ንሱ ድማ፡ ኣታ ወዲ ሰብ እዛ ራእይ እዚኣ ብዛዕባ ጊዜ መወዳእታ እያ እሞ፡ ኣስተውዕሎ፡ በለኒ።

¹⁸ንሱ ኺዛረበኒ ኸሎ፡ ኣእምሮይ ጠፊኡኒ፡ ብገጸይ ናብ ምድሪ ወደቕኩ። ግናኸ ንሱ ተንከየኒ፡ ቀጥ ኣቢሉ ኸአ ኣቖመኒ።

¹⁹ንሱውን በለ፡ እዚ ብዛዕባ እቲ እተመደበ ናይ መወዳእታ ጊዜ እዩ እሞ፡ እንሆ፡ ነቲ ኣብ መወዳእታ ጊዜ ቖጥዓ ዚኸውን ከፍልጠካ እየ።

²⁰እቲ ዝርኤኻዮ ኽልተ ዝቖርኑ ድዑልሲ ነገስታት ሜዶንን ፋርስን እዮም።

²¹እቲ ጨጓር ድቤላ ድማ ንጉስ ዮናኒ እዩ። እታ ኣብ መንጎ ኣዒንቱ ዝነበረት ዓባይ ቀርኒ ኸአ እቲ ቐዳማይ ንጉስ እዩ።

²²ብዛዕባ እታ እተሰብረትን ኣብ ክንድኣ ኸአ ኣርባዕተ ዝተንስአን፡ ካብቲ ህዝቢ ኣርባዕተ መንግስትታት ኪትንስኣ እየን፡ ብሓይሊ ግና ኣይኪመዓራረይኣን እየን።

²³ኣብታ መወዳእታ መንግስቶም ከአ፡ እቶም ኣበሰኛታት መስፈሮም ምስ መልኡ፡ ሓደ ጨካን ዝገጹን ተንኮል ዜስተውዕልን ንጉስ ኪትንስእ እዩ።

²⁴ሓይሉ ኺብርትዕ እዩ፡ ብሓይሉ ግና ኣይኮነን፡ መስትንክር ዝኾነ ጥፍኣት ኪገብር እዩ። ኪገብር ኪሰልጦውን እዩ፡ ንሓያላትን ንህዝቢ ቅዱሳንን ድማ ኬጥፍኦም እዩ።

²⁵ብጥበቡ ኸአ ምጥባር ኣብ ኢዱ ኺሰልጥ፡ ብልቡ ኺዕበ፡ ብድንገት ንብዙሓት ኬጥፍእ፡ ኤረ ነቲ መስፍን መሳፍንቲ ኬትንስኦ እዩ፡ ግናኸ ብዘይ ኢድ ሰብ ኪስበር እዩ።

²⁶እቲ ብዛዕባኡ እተዘርበ ናይ ምሸትን ብጊሓትን ራእይስ ሓቂ እዩ። እዚ ራይ ንርሑቕ ዘመን እዩ እሞ፡ ሕተሞ።

²⁷ኣነ ዳኒኤል ከአ ወዐልኩ፡ ሓያሎ መዓልቲ ድማ ሐመምኩ፡ ደሓር ተንሳእኩ፡ ኣብ ዕዮ ንጉሱውን ተጻመድኩ። በቲ ራእይ ከአ እድነቕ ነበርኩ፡ ነዚ ዜስተብህል ግና ኣይነበረን።