Read መ/ቅዱስ ትግርኛ, Tigrigna Bible, 1997 ትንቢት ሆሴዕ 10 Bible Online

ትንቢት ሆሴዕ 10 - መ/ቅዱስ ትግርኛ, Tigrigna Bible, 1997 bible

ትንቢት ሆሴዕ 10

¹እስራኤል ብዙሕ ዝጨናፍሩን ብዙሕ ፍረ ዚፈርን ወይኒ እዩ። ከም መጠን ምብዛሕ ፍሬኡ መሰውኢታት ኣብዝሔ፡ ከም መጠን ምጽባቕ ሃገሩ ሓወልትታት ኣጸበቐ።

²ልቦም ተመቕለ፡ ሕጂ ገበነኛታት ኮይኖም ተረኽቡ። ንሱ ንመሰውኢታቶም ይሰባብሮም፡ ንሓወልትታቶም ከኣ ሓሸምሸም የብሎ።

³ኤረ ሕጂስ፡ ንእግዚኣብሄር ኣይፈራህናዮን እም፡ ንጉስ የብልናን፡ ንጉስከ እንታይ ኪገብረና እዩ፡ ይብሉ።

⁴ዘረባ ይዛረቡ፡ ብሓሶት ይምሕሉ፡ ኪዳን ይአትው፡ ስለዚ ፍርዲ ኸም መርዛም ሳዕሪ ኣብ ነግሒ ግራት ይበቁል።

⁵እቶም ኣብ ሰማርያ ዚነብሩ ስለ እቲ ብተይ ቤትኣዌን ይፈርሁ። ክብረቱ ኻብኡ ስለ ዝኸደ፡ እቲ ህዝቢ ንእኡ ይሓዝነሉ፡ እቶም ካህናት ጣኦታቱ ድማ ስሊኡ የንቀጥቅጡ።

⁶ንሱ እኳ፡ ንንጉስ ያሬብ ኪውሀብሲ፡ ናብ ኣሶር ይውሰድ። ኤፍሬም ይሐፍር፡ እስራኤል ከአ ብምኽሩ ይሐንኽ።

⁷ሰማርያ ምስ ንጉስ ኸም ዓፍራ ኣብ ልዕሊ ማይ ትጠፍእ።

⁸እቲ በረኽቲ ቦታ ኣዌን፡ ሓጢኣት እስራኤልውን፡ ይጠፍእ፡ ኣብ ልዕሊ መሰውኢኦም እሾኽን ተኾርባን ይበቁል። ንሳቶም ከአ ነኽራን ክደኑና፡ ንኹርባታት ድማ ውደቑና፡ ይብልዎም።

⁹ዎ እስራኤል፡ ካብ መዓልትታት ጊብዓ ጀሚርካ ሓጢኣት ገበርካ፡ ንሳቶም ኣብኡ ቖሙ፡ እቲ ኣብ ደቂ ኣበሳ ዝኾነ ውግእ ኣብ ጊብዓ ኣይረኸቦምን እዩ።

¹⁰ከም ፍቓደይ ክቐጽዖም እየ፡ ኣብቲ ኽልተ ሓጢኣቶም ምስ ተአስሩ፡ ህዝብታት ንጉድኣቶም ኪእክቡ እዮም።

¹¹ኤፍሬም መኼዳ ዝለመደት እሞ መኼዳ እትፈቱ ኣርሒ እዩ፡ ኣነ ግና በቲ ጽቡቕ ክሳዳ ሓለፍኩ። ንኤፍሬም ክጸምዶ እየ፡ ይሁዳ ኺሐርስ፡ ያእቆብውን ኪጉልጉል እዩ።

¹²ንሱ ኽሳዕ ዚመጽእ፡ ጽድቂ ኸአ ክሳዕ ዜዝንመሎምሲ፡ ንእግዚኣብሄር እትደልዮሉ ጊዜ እዩ እሞ፡ ንኣኻትኩም ብጽድቂ ዝርኡ፡ ከም መጠን ምሕረቱ ኸአ ዕጸዱ፡ ሓድሽ ጽግዒውን ጽግኡ።

¹³ንስኻ ብመገድኻ፡ ብብዝሒ ጀጋኑኻ ተአሚንካ ኢኻ እሞ፡ ረሲእነትካ ሐረስኩም፡ ኣበሳ ዐጸድኩም፡ ፍረ ሓሶት ባላዕኩም።

¹⁴ከምቲ ብመዓልቲ ውግእ እታ ኣደ ምስ ደቃ ኽትጭፍለቕ ከላ፡ ሳልማን ንቤትኣርብኤል ዘጥፍኣ፡ ኣብ ማእከል ህዝብኻ ታዕታዕ ኪለዐል፡ ኩሉ ዕርድታትካውን ኪፈርስ እዩ።

¹⁵ብሰሪ ሕሰም ክፍኣትኩም ቤትኤል ከምኡ ይገብረኩም፡ ምድሪ ኺወግሕ ከሎ ድማ፡ ንጉስ እስራኤል ጥራስ ይጠፍእ።