Read መ/ቅዱስ ትግርኛ, Tigrigna Bible, 1997 ትንቢት ሆሴዕ 2 Bible Online

ትንቢት ሆሴዕ 2 - መ/ቅዱስ ትግርኛ, Tigrigna Bible, 1997 bible

ትንቢት ሆሴዕ 2

¹ነሕዋትኩም፡ ዓሚ፡ ንኣሓትኩም ከአ፡ ሩሓማ፡ በሉ።

²ኣዴኹም ሰበይተይ ኣኮነትን፡ ኣነውን ሰብኣያ ኣይኮንኩን እሞ፡ ምስኣ ተኻትዑ፡ ተኻትዑ ምንዝርንኣ ኻብ ገጻ፡ ዝሙታ ኸአ ካብ መንጎ ኣጥባታ ተውጽእ።

³እንተ ዘይኮነስ ገፊፈ ኸምታ እተወልደላ መዓልቲ ጥራይ ኽንብራ፡ ከም ምድረ በዳ ኽገብራ፡ ከም ንቑጽ ምድሪ ኽንብራ፡ ብጽምኢውን ክቐትላ እየ።

⁴ደቃ ድማ ደቂ ምንዝርና እዮም እሞ፡ ኣይክምሕሮምን እየ።

⁵ኣዲኦም መንዚራ እያ እሞ፡ እታ ዝጠነሰቶም ነወረት። ደድሕሪ እቶም እንጌራን ማይን ጸምረይን ልሕጺ እንጣጢዔን ዘይተይን መስተይን ዝህቡኒ ፈተውተይ ክኸይድ እየ፡ ኢላ እያ እሞ።

⁶ስለዚ እንሆ፡ ንጎደናኺ ብእሾኹ ክሐጽሮ፡ መገድታታ ኸይትረኽቦስ፡ ብቑጽሪ ክቐጽራ እየ።

⁷ደድሕሪ ፈተውታ ክትጎዩ፡ ግናኸ ኣይከተርክቦምን፡ ክትደልዮም፡ ግናኸ ኣይክትረኽቦምን እያ። ሽዑ ንሳ፡ ካብ ሎሚ ሽዑ ይሕሸኒ ነይሩ እዩ እሞ፡ ክኸይድ ናብቲ ቐዳማይ ሰብኣየይ ክምለስ እየ፡ ክትብል እያ።

⁸ንሳ ስርናይን ወይንን ዘይትን ኣነ ኸም ዝሀብክዋ፡ እቲ ንበዓል ዝገበርዎ ብሩርን ወርቅን ከም ዘብዛሕኩላ፡ ኣይፈለጠትን።

⁹ስለዚ ንስርናየይ ብግዚኡ። ንወይነይ ከአ ብወርሓቱ መሊሰ ኽወስዶ እየ። ነቲ ዕርቃና እትኸድነሉ ጸምረይን ልሕጺ እንጣጢዔይን ድማ ክምንዝዓ እየ።

¹⁰ሕጂ ኸአ ኣብ ቅድሚ ዓይኒ ፈተውታ ሓፍረታ ክቐልዓ እየ፡ ሓደ እኳ ኻብ ኢደይ ዜድሕና የልቦን።

¹¹ኩሉ ሓጎሳን በዓላታን ሰርቂ ወርሓን ሰናብታን ኩሉ ዓበይቲ በዓላታን ከጥፍኣ እየ።

¹²ነቲ፡ ፈተውተይ ዝህቡኒ ደመወዘይ እዚ እዩ፡ ዝበለቶ ተኽሊ ወይንናን ኦም በለሳን ከብርሶ፡ ዱር ከአ ክገብሮ እየ፡ ኣራዊት መሮርውን ኪበልዕዎ እዮም።

¹³ብምኽንያት እተን ንበዓላት ዝዐጠነትለን መዓልትታት ክቐጽዓ እየ፡ ብቐለቤታን ብስልማታን ተጋይጽ ግና ረስዓትኒ፡ ይብል እግዚኣብሄር።

¹⁴ስለዚ እንሆ፡ ኣነ ኽሐባብላ፡ ናብ በረኻ ኽወስዳ፡ ንልባ ኸአ ክዛረቦ እየ።

¹⁵ካብኡ ኣታኽልቲ ወይና፡ ለሰ ኣኮር ከአ ከም ደገ ተስፋ ኽህባ እየ። ኣብኡ ኸምቲ ብመዓልትታት ንእስነታ፡ ከምቲ ቦታ ኻብ ሃገር ግብጺ ዝወጸትላ መዓልቲ ኽትዝምር እያ።

¹⁶በታ መዓልቲ እቲኣ ክኸውን እዩ፡ ይብል እግዚኣብሄር፡ ሰብኣየይ ኢልኪ ኽትጽውዕኒ ኢኺ፡ ድሕርዚ ኸአ በዓለይ ኢልኪ ኣክትጽውዕንን ኢኺ።

¹⁷ኣነ ድማ ስም በዓላት ካብ ኣፉ ኸውጽእ እየ፡ ድሕርዚ ኸአ ስሞም ኣይኪዝክርን እዩ።

¹⁸በታ መዓልቲ እቲኣ ምስ ኣራዊት መሮርን ምስ ኣዕዋፍ ሰማይን ምስ ለመምታ ምድርን ኪዳን ክአትወሎም እየ፡ ቀስትን ሰይፍን ውግእን ካብታ ሃገር ክሰባብሮ፡ ብደሓንውን ከንብሮም እየ።

¹⁹ንዘለአለም ንኣይ ክሕጸየኪ እየ፡ ብጽድቅን ብፍርድን ብሳህልን ብምሕረትን ንኣይ ክሕጸየኪ እየ፡

²⁰ብእምነት ከአ ንኣይ ክሕጸየኪ፡ ንስኺውን ንእግዚኣብሄር ክትፈልጥዮ ኢኺ።

²¹በታ መዓልቲ እቲኣ ድማ ኪኸውን እዩ፡ ይብል እግዚኣብሄር፡ ኣነ ኽመልስ እየ፡ ንሰማይ ክመልሰሉ፡ ንሱ ኸአ ንምድሪ ኺመልሰላ እዩ።

²²ምድሪ ድማ ንስርናይን ወይንን ዘይትን ክትመልሱሉ እያ። እዚውን ንይዝሬኤል ኪመልሰሉ እዩ።

²³ኣብዛ ምድሪ እዚኣ ድማ ንኣይ ክዘርኦ እየ፡ ንሎሩሓማ ኸአ ክምሕራ እየ፡ ንሎዓሚ ድማ፡ ንስኻ ህዝበይ ኢኻ፡ ክብሎ እየ። ንሱውን፡ ኣምላኸይ ኪብለኒ እዩ።