Read መ/ቅዱስ ትግርኛ, Tigrigna Bible, 1997 ትንቢት ኢዮኤል 1 Bible Online

ትንቢት ኢዮኤል 1 - መ/ቅዱስ ትግርኛ, Tigrigna Bible, 1997 bible

ትንቢት ኢዮኤል 1

¹ንዮኤል ወዲ ጱቱኤል ዝመጾ ቓል እግዚኣብሄር እዚ እዩ፡

²ኣቱም ኣረገውቲ፡ እዚ ስምዑ፡ ኣቱም ኣብ ሃገር እትነብሩ ኹላኩምውን ኣእዛንኩም ጽን ይበል። ብዘመንኩም ወይስ ብዘመን ኣቦታትኩም ከምዚ ዝበለዶ ኾይኑ እዩ፡

³እዚ ንደቅኹም ኣዘንትውሎም፡ ደቅኹም ከአ ንደቆም፡ ደቆምውን ነቲ ድሕራይ ወለዶ የዘንትውሉ።

⁴ካብ ኩብኩብታ ዝተረፈ ኣንበጣ በልዖ፡ ካብ ኣንበጣ ዝተረፈ ኸአ ጎደቦ በልዖ፡ ካብ ጎደቦ ዝተረፈ ድማ ሐሰኻ በልዖ።

⁵ኣቱም ሰኸርቲ፡ ንቕሑን ብኸዩን፡ ኣቱም ሰተይቲ ወይኒ ኹላትኩም፡ እቲ ኹልዒ ወይኒ ኻብ ኣፍኩም ተወሲዱ እዩ እሞ፡ ዋይዋይ በሉ።

⁶ቁጽሪ ዜብሉ ሓያል ህዝቢ ናብ ሃገረይ ዋዕሮ ዝበለ ምንጋጋ ኸአ አለዎ።

⁷ንተኽሊ ወይነይ ኣባደማ፡ ንኦም በለሰይ ፈሐቖ፡ ብጥራስ ቀንጠጦ፡ ደርበዮ፡ ጨናፍሩውን ጻዕደወ።

⁸ከምታ ከሊ ተዐጢቓ ንሔማኣ እትበኽየሉ ድንግል ብኸዩ።

⁹መስዋእቲ ብልዕን መስዋእቲ መስተን ካብ ቤት እግዚኣብሄር ጠፊኡ፡ እቶም ካህናት ኣገልገልቲ እግዚኣብሄር ይሐዝኑ አለው።

¹⁰እኽሊ በሪሱ፡ ኮልዒ ወይኒ ነቒጹ፡ ዘይቲውን ቀምሲሉ እዩ እሞ፡ እታ ሃገር ባዲማ፡ ምድሪውን ትሐዝን አላ።

¹¹እቶት ግራሁ ጠፊኡ እዩ እሞ፡ ኣቱም ሓረስቶት፡ ብምኽንያት ስርናይን ስገምን ሕነኹ፡ ኣቱም ሰብ ኣታኽልቲ ወይኒውን፡ ዋይዋይ በሉ።

¹²ተኽሊ ወይኒ ነቐጸ፡ ኦም በለስ ከአ ቀምሰለ፡ ኦም ሮማንን ስየ ቱፋሕን ኩሉ ኣእዋም መሮርን ነቐጸ፡ እወ፡ ሓጎስ ካብ ደቂ ሰብ ነቐጸ።

¹³መስዋእቲ ብልዕን መስዋእቲ መስተን ካብ ቤት ኣምላኽኹም ተኸልኪሊ እዩ ኣሞ፡ ኣቱም ካህናት፡ ተዐጠቑን ብኸዩን፡ ኣቱም ኣገልገልቲ መሰውኢ፡ ዋይዋይ በሉ፡ ኣቱም ኣገልገልቲ ኣምላኸይ ዑ፡ ከሊ ተኸዲንኩም ሕደሩ።

¹⁴ጾም ቀድጹ፡ ኣኼባ ጸውዑ፡ ንዓበይትን ኣብታ ሃገር ዚነብሩ ኹላቶምን ናብ ቤት እግዚኣብሄር ኣምላኽኩም አክቡ፡ ናብ እግዚኣብሄር ከአ ተማህለሉ።

¹⁵መዓልቲ እግዚኣብሄር ቀሪባ አላ፡ ካብቲ ኹሉ ዚኽእልውን ከም መጥፍኢ ኾይና ኽትመጽእ እያ እሞ፡ ኣየ እዛ መዓልቲ እዚኣ።

¹⁶መግቢ ኻብ ቅድሚ ዓይንና፡ ሓጎስን ደስታን ከአ ካብ ቤት ኣምላኽናዶ ተወሲዱ ኣይኮነን፡

¹⁷እቲ ዘርኢ ኣብ ትሕቲ ድንኩሉ መሽመሸ፡ እኽሊ ህጉጉ እዩ እሞ፡ ቁፋፋ ባዶ ኾነ፡ መዓኸንውን ፈረሰ።

¹⁸ኣየ፡ እንስሳታት ዓዕ ይብሉ። እትነ መጓሰ ኣሓ ዚጓሰያሉ ስለ ዝሰኣና ቓህመማ፡ መጓሰ ኣሓ ዚጓስያሉ ስለ ዝሰኣና ቓህመማ፡ መጓሰ ኣባጊዕ ድማ ይስቀያ አለዋ።

¹⁹ነቲ ኣብ በረኻ ዘሎ መጓሰይስ ሓዊ በሊዕዎ፡ ንኹሉ ኣእዋም መሮር ከአ ሃልሃልታ ሞኽ ኣቢልዎ እዩ እሞ፡ ዎ እግዚኣብሄር፡ ኣባኻ ኤእዊ አሎኹ።

²⁰ወሓዚ ማያት ነጺፉ፡ ነቲ መጓሰዩ በረኻ ድማ ሓዊ በሊዕዎ እዩ እሞ፡ እንስሳ መሮርውን ናባኻ የእውዩ ኣለው።