Read መ/ቅዱስ ትግርኛ, Tigrigna Bible, 1997 ትንቢት ኢዮኤል 2 Bible Online

ትንቢት ኢዮኤል 2 - መ/ቅዱስ ትግርኛ, Tigrigna Bible, 1997 bible

ትንቢት ኢዮኤል 2

¹መዓልቲ እግዚኣብሄር ተመጽእ አላ፡ ቀሪባ ኸአ እያ እሞ፡ ኣብ ጽዮን መለኸት ንፍሑ፡ ኣብ ቅዱስ ከረነይ ድማ ኣእውዩ፡ ኣብታ ሃገር ዚነብሩ ዘለው ኹላቶም የንቀጥቅጡ።

²መዓልቲ ጸልማትን ጣቓን፡ መዓልቲ ደበናን ድቕድቕ ጸልማትን ከም ወጋሕታ ኣብ ልዕሊ ኣኽራን ይዝርጋሕ። ዓብይን ሓያልን ህዝቢ፡ ካብ ጥንቲ ጀሚሩ ኸምኡ ዝበለ ዘይነበረ፡ ድሕሪኡውን ክሳዕ ዓመታት ውሉድ ወለዶ ዚሐልፍ ከቶ ዘይኸውን።

³ኣብ ቅድሚኡ ሓዊ ይበልዕ፡ ኣብ ድሕሪኡ ሃልሃልታ ሞኽ የብል። እታ ሃገር ኣብ ቅስሚኡ ኸም ገነት፡ ኣብ ድሕሪኡ ኸም ጸምጸም በረኻ እያ፡ ካብኡ ዜምልጥውን የልቦን።

⁴ትርኢቶም ከም ትርኢት ኣፍራስ እዩ፡ ከም ፈረሰኛታት ይጎዩ።

⁵ከምቲ ኣብ ርእሲ ኣኽራን ድዋዕዋዕ ዚብል ሰረገላታት፡ ከምቲ ንሓሰር ኪውሕጥ ከሎ ጥዋዕዋዕ ዚብል ሃልሃልታ ሓዊ ፡ ከምቲ ንውግእ እተሰለፈ ሓያል ህዝቢ ይዘሉ።

⁶ኣብ ቅድሚኦም ህዝብታት ይጭነቑ፡ ኩሉ ገጽ ይጽልም።

⁷ከም ጀጋኑ ይጎዩ፡ ከም ዚዋግኡ ሰብ ናብ ቀጽሪ ይድይቡ፡ ነፍሲ ወከፍ በብጎደናኡ ይሐልፍ፡ ካብ መገዶም ከኣ ኣየግልሱን።

⁸ንብጻዩ ዚደፍእ የልቦን፡ ነፍሲ ወከፍ በበመገዱ ይሐልፍ፡ ናብ ማእከል ኣጽዋር ይአትው ኣይቖስሉን ከአ።

⁹ናብታ ኸተማ ይወሩ፡ ኣብ ቀጽሪ ይሆዩ፡ ናብ ኣባይቲ ይድይቡ፡ ከም ሰራቒ ብመሳኹቲ ይአትው።

¹⁰ምድሪ ኣብ ቅድሚኦም ራዕራዕ ትብል፡ ሰማያት የንቀጥቅጥ፡ ጸሓይን ወርሕን ይጽልምታ፡ ከዋኽብቲ ኸአ ብርሃኖም ይኽወሉ።

¹¹ሰፈር ሰራዊቱ ኣዝዩ ዓብዩ እዩ፡ እቲ ንቓሉ ዚፍጽም ከአ ሓያል እዩ እሞ፡ እግዚኣብሄር ኣብ ቅድሚ ሰራዊቱ ኣዝዩ ዓብዩ እዩ፡ እቲ ንቓሉ ዚፍጽም ከአ ሓያል እዩ እሞ፡ እግዚኣብሄር ኣብ ቅድሚ ሰራዊቱ ድምጺ የስምዕ። እወ፡ መዓልቲ እግዚኣብሄር ዓባይን ኣዝያ እተፍርህን እያ፡ መንከ ኺጽመማ ይኽእል፡

¹²እምበአርሲ ሕጂውን ብጾምን ብብኽያትን ብቑዝማን ብምሉእ ልብኹም ናባይ ተመለሱ፡ ይብል እግዚኣብሄር።

¹³ንሱ ንኹራ ጸንጓዩ ብሳህሊ ኸአ ምሉእ፡ ብእከይ ድማ ተጠዓሳይ፡ ርሕሩሕን መሓርን እዩ እሞ፡ ክዳንኩም ኣይኮነን ልብኹም ደአ ቕደዱ፡ ናብ እግዚኣብሄር ኣምላኽኩምውን ተመለሱ።

¹⁴ተጣዒሱ ዚምለስ እንተ ኾነ፡ ድሕሪኡ ድማ ንእግዚኣብሄር ኣምላኽኩም ብመስዋእቲ ብልዕን ብመስዋእቲ መስተን በረኸት ዚሐድግ እንተ ክዕነ፡ መን ይፈልጥ።

¹⁵ኣብ ጽዮን መለኸት ነፍሑ፡ ጾም ቀደሱ፡ ኣኼባ ጸውዑ።

¹⁶ህዝቢ ኣኪቡ፡ ማሕበር ቀድሱ፡ ኣረገውቲ አክቡ፡ ቁልዑን ጡብ ዚጠብውን አክቡ። መርዓዊ ኻብ ቤቱ ይወጽእ፡ መርዓት ከአ ካብ ሕልፍኝአ።

¹⁷እቶም ካህናት ኣገልገልቲ እግዚኣብሄር ኣብ መንጎ ኣዳራሽን መሰውእን ይብከዩ ይበሉውን፡ ዎ እግዚኣብሄር፡ ንህዝብኻ ንሐፎ፡ ነቲ ርስትኻ፡ ኣህዛብ ኪገዝእዎ ኢልካ፡ ንመላገጺ ኣሕሊፍካ ኣይትሀቦ። ስለምንታይከ ኣብ ኣህዛብ፡ ኣምላኾም ኣበይ ኣሎ። ዚበሀል።

¹⁸እግዚኣብሄር ንሃገሩ ቐንኤ፡ ንህዝቡ ኸአ ራሕርሔ።

¹⁹እጊዝባሂር ንህዝቡ መለሰሉ በሎውን፡ እንሆ፡ ኣነ እኽልን ወይንን ዘይትን ክሰደልኩም እየ፡ ብእኡ ኸአ ክትጸግቡ ኢኹም፡ ድሕርዚ ኣብ ማእከል ህዝብታት መላገጺ ኣይገብረኩምን እየ።

²⁰ነቲ ሰሜናዊ ኻባኻትኩም ከርሕቆ፡ ናብ ደረቕን ዝዐነውን ምድሪ ኽሰጎ እየ፡ ገጽ ናብ ምብራቓዊ ባሕሪ፡ ዝባኑ ኸአ ናብ ምዕራባዊ ባሕሪ እዩ። ዓብዩ ነገር ገይሩ እዩ እሞ፡ ምብድባዱ ኺወጽእ፡ ምምሽማሹ ድማ ኪደይብ እዩ።

²¹ኣቲ ሃገር፡ እግዚኣብሄር ዓብዩ ነገር ገይሩ እዩ እሞ፡ ኣይትፍርሂ፡ ተሕጎሲ ባህውን ይበልኪ።

²²ኣቱም እንስሳ መሮር፡ እቲ መጓሰዩ በረኻ ለምሊሙ፡ ኦም ፍሬኡ ይፈሪ፡ ኦም በለስን ተኽሊ ወይንን ከአ ሓይሉ ይህብ አሎ እሞ፡ ኣይትፍርሁ።

²³ኣቱም ደቂ ጽዮን፡ ዝናም ጽድያ ብልክዕ ይሀብኩም፡ ዝናብ ጽድያን ጽብሓትን ከም ቀደሙ የውርደልኩም አሎ እሞ፡ ተሐጎሱ ብእግዚኣብሄር ኣምላኽኩምውን ባህ ይበልኩም።

²⁴ኣዕውዲ ኸአ እኽሊ ኺመልእ፡ መጽመቑታትውን ወይንን ዘይትን ኪጅርብብ እዩ።

²⁵ኣነ ኸአ እቶም ኣንበጣን ኩብኩብታን ጎደበን ሓሰኻን፡ ኣባኻትኩም ዝሰደድክዎ ዓብዩ ሰራዊተይ ዝበልዔን ዓመታት ክኽሕሰኩም እየ።

²⁶መብልዕ ክትበዑ ኽትጸብጉውን ኢኹም፡ ነቲ ተአምራት ዝገበረልኩም ስም እግዚኣብሄር ኣምላኽኩም ድማ ከተመስግንዎ ኢኹም። ህዝበይውን ንዘለአለም ኣይሐንኽን።

²⁷ኣነ ኣብ ማእከል እስራኤል ከም ዘሎኹ፡ ኣነ ኸአ እግዚኣብሄር ኣምላኽኩም ከም ዝኾንኩ፡ ብጀካይ ድማ ካልእ ከም ዜልቦ ኽትፈልጡ ኢኹም፡ ህዝበይውን ንዘለአለም ኣይሐንኽን።

²⁸ብድሕርዚ ኪኸውን እዩ፡ መንፈሰይ ናብ ልዕሊ ኹሉ ስጋ ክኽዑ እየ፡ አወዳትኩምን አዋልድኩምን፡ ኣጉባዝኩም ከአ ራእይ ኪርእዩ እዮም።

²⁹በተን መዓልትታት እትኤንሲ ኣብ ሰብኡትን ኣንስትን ባሮት እኳ መንፈሰይ ክኽዑ እየ።

³⁰ኣብ ሰማያትን ኣብ ምድርን ከአ ተአምራት፡ ደምን ሓውን ኣዕኑድ ትክን፡ ክርኢ እየ።

³¹እታ ዓባይን መፍርሂትን መዓልቲ እግዚኣብሄር ከይመጸት፡ ጸሓይ ኣብ ጸልማት፡ ወርሒ ድማ ኣብ ደም ትልወጥ።

³²ኪኸውን ከአ እዩ፡ ከምቲ እግዚኣብሄር ዝበሎ፡ ኣብ ከረን ጽዮንን ኣብ ዮርሳሌምን ኣብቶም እግዚኣብሄር ዚጽውዖም ተረፍን ምድሓን ኪኸውን እዩ እሞ፡ ስም እግዚኣብሄር ዚጽውዕ ዘበለ ኹሉ ኺድሕን እዩ።