Read መ/ቅዱስ ትግርኛ, Tigrigna Bible, 1997 ትንቢት አሞጽ 1 Bible Online

ትንቢት አሞጽ 1 - መ/ቅዱስ ትግርኛ, Tigrigna Bible, 1997 bible

ትንቢት አሞጽ 1

¹ቃላት ኣሞጽ፡ እቲ ኻብ ጓሶት ተቆዓ ዝነበረ፡ ብዘመን ኡዝያ ንጉስ ይሁዳን ብዘመን የሮብዓም፡ ወኢድ ዮአስ ንጉስ እስራኤልን ቅድሚ እቲ ምንቅጥቃጥ ምድሪ ኽልተ ዓመት ብዛዕባ እስራኤል ዝረአዮ።

²በለውን፡ እግዚኣብሄር ካብ ጽዮን ይጓዝም፡ ካብ ዮርሳሌም ከአ ድምጹ የስምዕ። እቲ ጓሶት ዚጓስይሉ ይሐዝን፡ ርእሲ ቀርሜሎስ ድማ ይነቅጽ።

³እግዚኣብሄር ከምዚ ይብል አሎ፡ ንጊልዓድ ብሓጺን መኼዲ ኣኺዶምዋ እዮም እሞ፡ ስለ ሰለስተ ገበን ደማስቆ፡ ኤረ ስለ ኣርባዕተ እኳ ደአ፡ መዓተይ ካብአ ኣይክመልስን እየ።

⁴ኣነ ናብ ቤት ሃዛኤል ሓዊ ኽሰድድ እየ፡ ንኣዳራሻት ቤንሃዳድ ከአ ሞኹ ኬብሎ እዩ።

⁵ንመሃርሃሪ ደማስቆ ኽሰብሮ፡ ነቶም ኣብኡ ዝነብሩ ድማ ካብ ለሰ ኣዌን፡ ነቲ ዘንጊ ዚሕዝ ከአ ካብ ቤት ኤድን ከጽንቶም እየ፡ ህዝቢ ሶርያውን ተማሪኹ ናብ ቂር ኪኸይድ እዩ፡ ይብል እግዚኣብሄር።

⁶እግዚኣብሄር ከምዚ ይብል አሎ፡ ናብ ኢድ ኤዶም ኣሕሊፎም ክህብዎምሲ፡ ንኹሎም ምርኮ ማሪኾምዎም እዮም እሞ፡ ስለ ሰለስተ ገበን ጋዛ፡ ኤረ ስለ ኣርባዕተ እኳ ደአ፡ መዓተይ ካብኣ ኣይክመልስን እየ።

⁷ኣነ ናብ ቀጽሪ ጋዛ ሓዊ ኽሰድድ እየ፡ ንኣዳራሻታ ኸአ ሞኽ ኬብሎ እዩ።

⁸ነቶም ኣብኡ ዚነብሩ ኻብ ኣሽዶድ፡ ነቲ ዘንጊ ዚሕዝ ድማ ካብ ኣስቃሎን ክጽንቶም እየ፡ ኢደይ ኣብ ልዕሊ ዔቅሮን ክመልስ እየ፡ እቶም ዝተረፉ ፍልስጥኤማውያን ከአ ኪጠፍኡ እዮም፡ ይብል እግዚባሄር ኣምላኽ።

⁹እግዚኣብሄር ከምዚ ይብል አሎ። ነቶም ምሩኻት ብምሉአቶም ናብ ኢድ ኤዶም ኣሕሊፎም ሂቦምዎም፡ ንኺዳን ኣሕዋት ከአ አይዘአሮምን እሞ፡ ስለ ሰለስተ ገበን ጢሮስ፡ ኤረ ስለ ኣርባዕተ እኳ ደአ፡ መዓተይ ካብኣ ኣይክመልስን እየ።

¹⁰ኣነ ናብ ቀጽሪ ጢሮስ ሓዊ ኽሰድድ እየ፡ ነቲ ኣዳራሻታ ኸአ ሞኽ ኬብሎ እዩ።

¹¹እግዚኣብሄር ከምዚ ይብል አሎ፡ ንሓው ብሰይፊ ሰጉጉዎስ፡ ኩሉ ምሕረት ከአ ዐጽዩ፡ ኩራኡ ድማ ኩሉ ጊዜ ቐዳዲዱ፡ ነድሩውን ንሓዋሩ ዐቑሩ እዩ እሞ፡ ስለ ሰለስተ ገበን ኤዶም፡ ኤረ ስለ ኣርባዕተ እኳ ደአ፡ መዓተይ ካብኣ ኣይክመልስን እየ።

¹²ኣነ ናብ ቴማን ሓዊ ኽሰድድ የ፡ ነቲ ኣዳራሽ ቦጽራ ኸአ ሞኹ ኬብሎ እዩ።

¹³እግዚኣብሄር ከምዚ ይብል አሎ፡ ዶቦም ምእንቲ ኼግፍሑስ፡ ነተን ጥኑሳት ጊልዓድ ከብደን ቀዲዶምወን እዮም እሞ፡ ስለ ሰለስተ ገበን ደቂ ዓሞን፡ ኤረ ስለ ኣርባዕተ እኳ ደአ” መዓተይ ካብኣ ኣይክመልስን እየ።

¹⁴ኣነ ኣብ ቀጽሪ ራባ ሓዉ ኽአጉድ እየ፡ ነቲ ኣዳራሻታ ኸአ ብመዓልቲ ውግእ ኣብ ማእከል ጭድርታ፡ ብመዓልቲ ህውከት ኣብ ማእከል ህቦብላ ሞኽ ኬብሎ እዩ።

¹⁵ንጉሶም ድማ፡ ንሱ ምስ መሳፍኑ፡ ተማሪኹ ኪኸይድ እዩ፡ ይብል እግዚኣብሄር።