Read መ/ቅዱስ ትግርኛ, Tigrigna Bible, 1997 ትንቢት አሞጽ 5 Bible Online

ትንቢት አሞጽ 5 - መ/ቅዱስ ትግርኛ, Tigrigna Bible, 1997 bible

ትንቢት አሞጽ 5

¹ኣቱም ቤት እስራኤል፡ እዚ ኣብ ልዕሌኹም ዝቑዝሞ ዘሎኹ ቓል ስምዑ፡

²እታ ድንግል እስራኤል ወዲቓ፡ ደጊም ኣይትትንስእን፡ ኣብ ምድሪ ጻሕ ኢላ ኣላ፡ ዜተንስኣ ድማ የልቦን።

³ስለዚ እግዚኣብሄር ኣምላኽ፡ እታ ሽሕ ዚወጽዋ ኸተማ ሚእቲ ይተርፍዋ፡ እታ ሚእቲ ዚወጽዋ ኸአ ንቤት እስራኤል ዓሰርተ ይተርፍዋ ይብል አሎ።

⁴ስለዚ እግዚኣብሄር ንቤት እስራኤል ከምዚ ይብል አሎ፡ ድለዩኒ እሞ ብህይወት ክትነብሩ ኢኹም።

⁵ጊልጋል ብርግጽ ክትማረኽ፡ ቤትኤል ድማ ከንቱ ኽትከውን እያ እሞ፡ ንቤትኤል ኣይትድለዩ፡ ናብ ጊልጋል ከአ ኣይትእተው፡ ናብ ብኤርሸባዕውን ኣይትሕለፉ።

⁶ከም ሓዊ ኾይኑ ናብ ቤት ዮሴፍ ህሩግ ክይብል፡ ኣብ ቤትኤል ዜጥፍኦ ተሳኢኑ ኸአ ሞኽ ከየብሎስ፡ ንእግዚኣብሄር ድለዩ፡ ብህይወት ድማ ክትነብሩ ኢኽም።

⁷ኣቱም ንፍርዲ ናብ ዕረ እትልውጥዎ፡ ንጽድቂ ኸአ ናብ ምድሪ እትድርብይዎ፡

⁸እቲ ንሾብዓተ ኸዋኽብቲ ንኦርዩንን ዝገብረ፡ ንድነ ሞት ናብ ወጋሕታ ዚልወጦ፡ ንመዓልቲ ኸአ ግብ ዝበለ ለይቲ ዚገብሮ፡ ንማያት ባሕሪ ዚጽውዖ፡ ናብ ልዕሊ ገጽ ምድሪ ድማ ዚኽዕዎ፡ ኣብ ልዕሊ ዕርዲ ጥፍኣት ኪመጽእ፡ ነቲ ሓያል ብድንገት ጥፍኣት ዜውርደሉ፡ ስሙ እግዚኣብሄር እዩ እሞ ድለይዎ።

⁹እቲ ንሾብዓተ ኸዋኽብቲ ንኦርዩንን ዝገብረ፡ ንድነ ሞት ናብ ወጋሕታ ዚልወጦ፡ ንመዓልቲ ኸአ ግብ ዝበለ ለይቲ ዚገብሮ፡ ንማያት ባሕሪ ዚጽውዖ፡ ናብ ልዕሊ ገጽ ምድሪ ድማ ዚኽዕዎ፡ ኣብ ልዕሊ ዕርዲ ጥፍኣት ኪመጽእ፡ ነቲ ሓያል ብድንገት ጥፍኣት ዜውርደሉ፡ ስሙ እግዚኣብሄር እዩ እሞ ድለይዎ።

¹⁰ነቲ ኣብ ደገ ዚገንሕ ይጸልእዎ፡ ነቲ ብቕንዕና ዚዛረብ ከአ ይፍንፍንዎ።

¹¹ንድኻ ስለ ዝረገጽኩምዎ፡ ነቲ ተሰኪምዎ ዝነበረ ስርናይ ከአ ስለ ዝግደፍኩምዎ፡ ብጽሩብ ኣእማን ኣባይቲ ሰራሕኩም፡ ኣይክትነብርዎን ከአ ኢኹም፡ ዜብህግ ኣታኽልቲ ወይኒ ተኸልኩም፡ ወይኑ ድማ ኣይክትሰትዩን ኢኹም።

¹²ኣነስ ግህሰትኩም ብዙሕ፡ ሓጢኣትኩም ከም ብርቱዕ ከም ዝኾነ እፈልጥ እየ። ነቲ ጻድቕ ተጻብብሉ ደርሆ ትቕበሉ፡ ነቲ መስኪን ኣብ ደገ ትገፍዕዎ አሎኹም።

¹³ክፉእ ዘመን እዩ እሞ፡ ስለዚ እቲ ለባም በዚ ኸምዚ ዘመሰለ ዘመን ስቕ ይበል።

¹⁴ብህይወት ክትነብሩስ፡ ሰናይ ድለዩ፡ እከይ ኣይኮነን። ከምኡ ኸአ፡ ከምቲ ዝበልኩምዎ፡ እግዚኣብሄር ኣምላኽ ሰራዊት ምሳኻትኩም ኪኸውን እዩ።

¹⁵እከይ ጽልኡ፡ ሰናይ ከአ ኣፍቅሩ፡ ኣብ ደገውን ፍርዲ ኣጽንዑ፡ ምናልባሽ እግዚኣብሄር ኣምላኽ ሰራዊት ነቲ ኻብ ዮሴፍ ዝተረፈ ኺርሕርሓሉ እዩ።

¹⁶ስለዚ እግዚኣብሄር ኣምላኽ ሰራዊት፡ እቲ ጐይታ፡ ከምዚ ይብል አሎ፡ ኣብ ኩሉ ኣደባባያት ኪቐዙም፡ ኣብ ኩሉ መገድታት ከአ ዋይዋይ ኪበሀል እዩ። ንሓረስታይ ናብ ሐዘን፡ ነቶም መልቀስ ዚኽእሉ ኸአ ናብ ብኽያት ኪጽውዕዎም እዮም።

¹⁷ብማእከልካ ኽሐልፍ እየ እሞ፡ ኣብ ኩሉ ኣታኽልቲ ወይኒ ብኽያት ኪኸውን እዩ ይብል እግዚኣብሄር።

¹⁸ኣቱም መዓልቲ እግዚኣብሄር እትደልዩ፡ ወይለኹም። መዓልቲ እግዚኣብሄር እንታይ ትጠቕመኩም፡ ንሳስ ጸልማት እያ፡ ብርሃን ኣይኮነን።

¹⁹ከምቲ ኻብ ቅድሚ ኣንበሳ ዚሀድም እሞ ድቢ ዚጓነፎ፡ ከምቲ ናብ ቤት አትዩ ኢዱ ኣብ መንደቕ ዜጸግዕ እሞ ተመን ዚነኽሶ፡

²⁰መዓልቲ እግዚኣብሄርሲ ጸልማትን ብርሃንን ዜብላንዶኸ ኣይኮነትን፡ ድቕድቕ ጸልማትን ምንጽብራቕ ዜብላንዶኸ ኣይኮነትን፡

²¹ንበዓልትኩም ጸላእኩም ነዐቕኩም ንኣኼባ በዓላትኩም ድማ ኣይሽትቶን።

²²መስዋእቲ ምሕራርን መስዋእቲ ብልዕኹምን እንተ ኣቕረብኩምለይ እኳ፡ ኣይክቕበሎን እየ፡ ነቲ ናይ ስቡሕ ከብትኹም መስዋእቲ ምስጋናውን ቁሊሕ ኣይክብሎን እየ።

²³ድሃይ ቅኔታትካ ኻባይ ኣርሕቕ፡ ቃና መሰንቆታትካ ኸአ ኣይሰምዕን እየ።

²⁴ግናኸ ፍርዲ ኸም ማያት፡ ጽድቂ ድማ ከም ዘይነጽፍ ርባ ይውሐዝ።

²⁵ኣቱም ቤት እስራኤል ኣርብዓ፡ ዓመት ኣብ በረኻስ መስዋእቲ ሕሩድን መስዋእቲ ብልዕንዶ ኣቕሪብኩምለይ ኢኹም፡

²⁶ነቲ ድንኳን ሞሎኽኩምን ንምስልታት ጣኦታትኩምን ነቲ ንርእስኹም ዝገብርኩምዎ ኮኾብ ኣምላኽኩምን ተሰከምኩም።

²⁷ስለዚ ንኽንየው ደማስቆ ኸማርኸኩም እየ፡ ይብል እቲ ኣምላኽ ሰራዊት ዝስሙ እግዚኣብሄር።