Read መ/ቅዱስ ትግርኛ, Tigrigna Bible, 1997 ኦሪት ዘህልቍ 13 Bible Online

ኦሪት ዘህልቍ 13 - መ/ቅዱስ ትግርኛ, Tigrigna Bible, 1997 bible

ኦሪት ዘህልቍ 13

¹እግዚኣብሄር ድማ ንሙሴ ኸምዚ ኢሉ ተዛረቦ፡

²ነታ ኣነ ንደቂ እስራኣኤል ዝህቦም ምድሪ ኸናኣን ዚስልዩ ሰባት ስደድ፡ ከካብ ነገድ ኣቦታቶም ሓደ ሰብ፡ ኩሎም ካብቶም ሹማምቶም ይስደዱ።

³ሙሴ ድማ ከምቲ ትእዛዝ እግዚኣብሄር ካብ በረኻ ጳራን ሰደዶም። እዞም ሰባት እዚኦም ኩሎም ሓላቑ ደቂ እስራኤል ነበሩ።

⁴ስሞም ከአ እዚ እዩ፡ ካብ ነገድ ሮቤል ኣሙዓ ወዚ ዛኩር፡

⁵ካብ ነገድ ስምኦን ሻፋጥ ወዲ ሖሪ፡

⁶ካብ ነገድ ይሁዳ ካሌብ ወዲ የፋነ፡

⁷ካብ ነገድ ይሳኮር ይግኣል ወዲ ዮሴፍ፡

⁸ካብ ነገድ ኤፍሬም ሆሽዓ ወዲ ኔዌ፡

⁹ካብ ነገድ ብንያም ጳልጢ ወዲ ራፋ፡

¹⁰ነገድ ዮሴፍ፡ ማለት ካብ ነገድ ምናሴ፡ ጋድ ወዲ ሱሲ፡

¹¹ካብ ነገድ ዳን ዓሚኤል ወዲ ግማሊ፡

¹²ካብ ነገድ ዳን ዓሚኤል ወዲ ግማሊ፡

¹³ካብ ነገድ ኣሴር ስቱር ወዲ ሚካኤል፡

¹⁴ካብ ነገድ ንፍታሌም ናሕቢ ወዲ ዎፍሲ፡

¹⁵ካብ ነገድ ጋድ ዓውኤል ወዲ ማኪ።

¹⁶ስም እቶም ነታ ምድሪ ኺስልይዋ ሙሴ ዝሰደዶም ሰባት እዚ እዩ። ሙሴ ንሆሼዐ ወዲ ነዌ፡ እያሱ ኣውጽኣሉ።

¹⁷ሙሴ፡ ምድሪ ኸነኣን ኪስልዩ ሰደዶም። በሎም ከአ፡ ካብዚ ንደቡብ ኬድኩም ናብ ኣኽራን ደይቡ፡

¹⁸እታ ሃገር ድማ ንሳ ኸምይ ከም ዝኾነት፡ እቲ ኣብኣ ዚነብር ህዝቢውን ሓያል እንተ ኾይኑ ወይ ድኹም፡ ሒደት እንተ ኾይኑ ወይ ብዙሕ፡

¹⁹እታ ዝነብርዋ ምድሪ ድማ ኸመይ ምዃና፡ ንሳ ጽብቕቲ እንተ ኾይና ወይ ሕማቕ፡ እተን ዚነብሩለን ከተማታት ከአ ከመይ ምዃነን፡ ሰፈር እንተ ኾይነን ወይ ዕርድታት፡

²⁰እታ ምድሪውን ከመይ ምዃና፡ ንሳ ረጓድ እንተ ኾይና ወይ ረቃቕ፡ ኣእዋም እንተለዋ ወይ እንተ ዜብላ፡ ርአዩ። ትብዑ ኸአ ካብ ፍረ እታ ምድሪ ድማ ኣምጽኡ። እተን መዓልትታት እቲኤን ከአ እቲ ቐዳማይ ፍረ ወይኒ ዚበስለለን ግዚያት ነበራ።

²¹ንሳቶም ከአ ደይቦም ነታ ምድሪ ኻብ በረኻ ጺን ካዕ እታ ኣብ መኣተዊ ሓማት ዘላ ሪሓብ ሰለይዋ።

²²ናብ ደቡብ ከአ ደየቡ፡ ናብ ኬብሮንውን ኣተው፡ ኣብኣ ድማ ኣሒማን፡ ሼሳይን ታልማይን ደቂ ዓናቅ ነበሩ። ኬብሮን ከአ ሾብዓተ ዓመት ቅድሚ እታ ኣብ ግብጺ ዘላ ጾዓን ተሰርሔት።

²³ናብ ርባ ኤሽኮል ከአ መጹ፡ ካብኣ ድማ ሓደ ጨንፈር ምስ ሓደ ኣስካል ወይኒ ቖሪጾም፡ ክልተ ኾይኖም ብመሰላጾርዎ። ካብ ሮማንን ካብ በለስን ከአ ተማልኡ።

²⁴እታ ቦታ እቲኣ፡ ብዛዕባ እቲ ደቂ እስራኤል ካብኣ ዝቖጸረዎ ኣስካል፡ ለሰ ኤሽኮል ተባህለት።

²⁵ኣብ መወዳኣታ ኣርብዓ መዓልቲ ድማ ካብ ምስላይ እታ ምድሪ ተመልሱ።

²⁶ከይዶም ከአ ኣብ በረኻ ጳራን ኣብ ቃዴስ ናብ ሙሴን ናብ ኣሮንን ናብ ብዘሎ ኣኼባ ደቂ እስራኤልን መጹ። ናኣታቶምን ንብዘሎ ኣኼባን እቲ ነገር ኣዛረብዎም፡ ፍረ እታ ምስሪውን ኣርኣይዎም።

²⁷ከምዚ ኢሎም ድማ ኣዘንተውሉ፡ ናብታ ዝሰድድካና ሃገር በጻሕና፡ ብሓቂ ኸኣ ንሳ ጸባን መዓርን እተውሕዝ እያ፡ ፍሬኣ ኸአ እዚ እዩ።

²⁸ኣብታ ሃገር ዚነብር ህዝቢ ግና ሓያል እዩ፡ ኣተን ከተማታት ከአ እተዐርዳን እዝየን ዓበይትን እየን፡ ኣብኡ ድማ ደቂ ዓናቅ ርኤና።

²⁹ኣብ ሃገር ደቡብ ኣማሌቕ ይነብር ኣሎ፡ ኣብ ኣኽራን ከአ ሔታውያንን ይቡሳውያንን ኣሞራውያንን ይነብሩ ኣለው፡ ኣብ ጥቓ ባሕርን ብሸነኽ ዮርዳኖስን ድማ ከነኣናውያን ይነብሩ ኣለው።

³⁰ካሌብ ከአ ነቲ ህዝቢ ኣብ ቅድሚ ሙሴ ኣህድኦ፡ ኣጽቢቕና ንኽእላ ኢና ኣሞ፡ ንደይብ ደኣ ነታ ምድሪ ንውረሳ፡ ድማ በለ።

³¹ኣቶም ምስኡ ደይቦም ዝነበሩ ሰባት ግና፡ ንሱ ኻባና ዚሕይል እዩ እሞ፡ ናብታ ህዝቢ እቲ ኽንድይብ ኣይንኽእልን ኢና በሉ።

³²ብዛዕባ እታ ዝሰለይዋ ምድሪ ኸአ ንደቂ እስራኤል ከምዚ ኢሎም ክፉእ ነገር ኣውረዩሎም፡ እታ ኽንስልያ ዝሓለፍናያ ምድሪ፡ ንሳ ነቶም ዚነብርዋ እትውሕጥ ምድሪ እያ፡ እቶም ኣብኣ ዝርኤናዮም ኩሎም ህዝቢ ኸአ ነዋሕቲ ሰባት እዮም።

³³ኣብኣ ድማ ካብ ንጉዓት ዓሌት፡ ንጉዓት ደቂ ዓናቅ ርኤና። ንሕና ኣብ ዓይንና ኸም ኣምበጣ ኾንና፡ ኣብ ኣዒንቶም ከአ ከምኡ ነበርና።