Read መ/ቅዱስ ትግርኛ, Tigrigna Bible, 1997 ኦሪት ዘህልቍ 16 Bible Online

ኦሪት ዘህልቍ 16 - መ/ቅዱስ ትግርኛ, Tigrigna Bible, 1997 bible

ኦሪት ዘህልቍ 16

¹ቆራሕ ወዲ ይጽሃር፡ ወዲ ቃሃት ወዲ ሌዊ፡ ዳታንን ኣቢራምን ደቂ ኤልያብ፡ ኦን ከአ ወዲ ጴሌት፡ ደቂ ሮቤል፡

²ሓያሎ ሰባት ካብ ደቂ እስራኤል፡ ክልተ ሚእትን ሓምሳን ሹማምቲ እቲ ኣኼባ፡ ብማሕበር እተጸውዑ ስሙያት ሰባት ሒዞም ንሙሴ ተላዕልዎ።

³ንሙሴን ንኣሮንን ኪጻረሩ ተአኪቦም ድማ፡ ብዘለው ኣኼባ ኹሎም ቅዱሳን እዮም፡ እግዚኣብሄር ድማ ኣብ ማእከሎም ኣዩ እሞ፡ እምብዛ ኣብዚሕኩምዎ ስለምንታይ ኣብ ልዕሊ ማሕበር እግዚኣብሄር ትዕበዩ ኣሎኹም በልዎም።

⁴ሙሴ እዚ ምስ ሰምዔ፡ ብገጹ ተደፍኤ።

⁵ንቆራሕን ነቶም ኣኼባኡን ከምዚ ኢሉ ተዛረቦም፡ እግዚኣብሄር ጽባሕ እቲ ናቱ ዝኾነን ኣቲ ቕዱስን እቲ ናብኡ ዜቕርቦን መን ከም ዝኾነ፡ ኬፍልጥ እዩ።

⁶ከምዚ ግበሩ፡ ቆራሕን ብዘሎ ኣኼባኡን ጸጽንሃህኩም ውሰዱ፡

⁷ጽባሕ ድማ ኣብ ቅድሚ እግዚኣብሄር ሓዊ ግበረሉ፡ ዕጣን ከአ ኣእትውሉ። ኪኸውን ድማ እዩ፡ እቲ እግዚኣብሄር ዚሐርዮ ሰብኣይ፡ ንሱ ቅዱስ ይኹን። ኣቱም ደቂ ሌዊ፡ እምብዛ ኣብዚሕኩምዎ።

⁸ሙሴ ኸአ ንቆራሕ በሎ፡ ኣቱም ደቂ ሌዊ፡ ሕጂ ስምዑ።

⁹ኣብ ማሕደር እግዚኣብሄር ከተገልግሉ፡ ኣብ ቅድሚ ኣኼባ ደው ኢልኩም ከአ ከተገልግልዎ፡ ኣምላኽ እስራኤል ናብኡ ኬቕርበኩም ኢሉ፡ ካብ ኣኼባ እስራኤል ዝፈለየኩምዶ ውሑድኩም እዩ።

¹⁰ንኣኻን ንኹሎም ኣሕዋትካ ደቂ ሌዊ ድማ ምሳኻን ናብኡ ኣቕሪቡኩምሲ፡ ክህነትዶ ድማ ድሊኹም፡

¹¹ስለዚ ንስኻን ብዘሎ ኣኼባኻን ኣብ ልዕሊ እግዚኣብሄር ኢኹም እተአከብኩም። ኣሮንከ፡ ኣብ ልዕሊኡ እተጉረምርሙ፡ ንሱ እንታይ እዩ።

¹²ሙሴ ድማ ንዳታንን ኣቢራምን፡ ደቂ ኤልያብ፡ ኪጽውዑሉ ለአኸ። ንሳቶም ከአ፡ ኣይንድይብን፡ በሉ።

¹³ኣብ በረኻ ክትቀትለና ኢልካ፡ ካብታ ጸባን መዓርን እተውሕዝ ምድሪ ዘውጻእካናዶ ውሒዱ እዩ፡ ኣብ ልዕሌና ኽትሽየምዶ ንርእስኻ ትሸይም።፡

¹⁴ብዝተረፈስ ጸባን መዓርን ናብ እተውሕዝ ምድሪ ኣይእቶኻናን ግርቡን ኣታኽልቲ ወይንን ከአ ኣየረስቴኻናን። ኣዒንቲ እዞም ሰባት እዚኦምዶ ኽተንቁር ደሊኻ ኢኻ፡ ኣይንድይብን።

¹⁵ሙሴ ድማ ኣዝዩ ተናዲዱ ንእግዚኣብሂር፡ ናብ መስዋእቶም ኣይተጠምት፡ ካባታቶም ሓንቲ ኣድጊ እኳ ኣይወሰድኩን፡ ካባታቶም ንሓደ እኳ ኽፉእ ኣይገበርኩን፡ በሎ።

¹⁶ሙሴ ድማ ንቆራሕ፡ ጽባሕ ንስኻን ብዘሎ ኣኼባኻን፡ ንስኻን ንሳቶምን ኣሮንን ኣብ ቅድሚ እግዚኣብሄር ተረኸቡ።

¹⁷ነፍሲ ወከፍ ከአ ጽንሃሁ ይውሰድ፡ ዕጣን ድማ ይገብረሉ፡ ነፍሲ ወከፍ ጽንሃሁ ኽልተ ሚእትን ሓምሳን ጽንሃህ ኣብ ቅድሚ እግዚኣብሄር ኣቕርቡ፡ ንስኻን ኣሮንን ከአ ነፍሲ ወከፍ ጽንሃሁ ይውሰድ በሎ።

¹⁸ነፍሲ ወከፍ ከአ ጽንሃሁ ወሰደ፡ ሃዊ ድማ ገበረሉ፡ ኣብ ልዕሊኡ ኸአ ዕጣን ኣእተውሉ፡ ምስ ሙሴን ኣሮንን ከአ ኣብ ኣፍ ድንኳን ምርኻብ ደው በሉ።

¹⁹ቆራሕ ድማ ንብዘሎ ኣኼባ ተራእየ።

²⁰እግዚኣብሄር ድማ ንሙሴን ንኣሮንን፡

²¹ካብ ማእከል ኣዚ ኣኼባ እዚ ተፈለዩ፡ ብቕጽበት ዓይኒ ኽውድኦም እየ፡ ኢሉ ተዛረቦም።

²²ሽዑ ንሳቶም፡ ኣታ ኣምላኽ፡ ኣምላኽ ነፍሳት ኩሉ ስጋ፡ ሓጢኣት ዝገበረስ ሓደ ሰብኣይ እዩ፡ ንብዘሎ ኣኼባዶ ኽትቑጥዖ ኢኻ፡ ኢሎም ብገጾም ተደፍኡ።

²³እግዚኣብሄር ድማ ንሙሴ ኸምዚ ኢሉ ተዛረቦ፡

²⁴ነቲ ኣኼባ ኻብ ዙርያ እቲ ሰፈር ቆራሕን ዳታንን ኣቢራምን ኣግለሱ፡ ኢልካ ተዛረቦም።

²⁵ሙሴ ድማ ተንሲኡ ናብ ዳታን ኣቢራምን ከደ፡ እቶም ዓበይቲ እስራኤል ከአ ሰዐብዎ።

²⁶ነቲ ኣኼባ ኸኣ፡ በጃኹም፡ ካብ ድንኳውንቲ እዞም ሕሱማት ሰባት እዚኣቶም ኣግልሱ፡ ብኹሉ ሓጢኣቶም ከይትጠፍኡ ኸአ ናቶም ዘበለ ኣይትተንከዮ፡ ኢሉ ተዛርቦም።

²⁷ንሳቶምውን ካብ ዙርያ እቲ ሰፈር ቆራሕን ዳታንን ኣቢራምን ኣግለሱ። ዳታንን ኣቢራምን ግና ወጺኣኦም፡ ምስ ኣንስቶምን ደቆምን ሕጻናቶምን ኣብ ኣፍ ድንኳውንቶም ደው በሉ።

²⁸ሙሴ ኸአ፡ ካብ ፍቓደይ ዘይኮነ፡ ነዚ ኹሉ ግብሪ እዚ ኽገብር እግዚኣብሄር ከም ዝለአኸኒ፡ በዚ ኽትፈልጡ ኢኹም፡

²⁹እዞም ሰባት እዚኦም ከም ኣምውታ ኹሉ ሰብ እንተ ሞቱ፡ ወይ ንኹሉ ሰብ ዚበጽሕ ጥራይ እንተ በጽሖም፡ ሽዑ እግዚኣብሄር ኣይለአኸንን።

³⁰እግዚኣብሄር ሓድሽ ነገር እንተ ገበረ ግና፡ እዚኣቶም ምስ ኩሉ ዘለዎም ብህይወቶም ናብ ሲኦል ክወርዱ፡ ምድሪ ኣፋ ኸፊታ ኣንተ ወሓጠቶም፡ ሽዑ እዞም ሰባት እዚኦም ንእግዚኣብሄር ከም ዝነዐቕዎ ኽትፈልጡ ኢኹም፡ በለ።

³¹ኮነ ኸአ፡ እዚ ኹሉ ተዛሪቡ ምስ ወድኤ፡ ኣብ ትሕቲኦም ዘላ ምድሪ ተጨደት፡

³²ምድሪ ኸአ ኣፋ ኸፈተት፡ ንኣታቶምን ነቦታቶምን ንኹሎም ናይ ቆራሕ ሰብን ንኹሉ ገንዘቦምን ወሐጠቶም።

³³ንሳቶም ምስ ኩሉ ዘለዎም ብህይወቶም ናብ ሲኦል ወረዱ፡ ምድሪ ኸአ ደፈነቶም፡ ካብ ማእከል ማሕበር ድማ ጠፍኡ።

³⁴እቶም ኣብ ዙርያኦም ዝነበሩ ብዘለው እስራኤል ከአ ጭራሕምራሖም ሰሚዖም፡ ናኣና ድማ ምድሪ ኸይትውሕጠና፡ ኢሎም ሀደሙ።

³⁵ካብ እግዚኣብሄር ከአ ሓዊ ወጸ፡ ነቶም ዚዐጥኑ ዝነበሩ ኽልተ ሚእትን ሓምሳን ሰባት ድማ በልዖም።

³⁶እግዚኣብሄር ድማ ንሙሴ ኸምዚ ኢሉ ተዛረቦ፡

³⁷ንኣልኣዛር፡ ወዲ ኻህን ኣሮን፡ እቲ ጽንሃሃት ተቐዲሱ እዩ እሞ፡ ካብቲ ንዳድ ኣውጽኣዮ፡ ነቲ ሓዊ ኸአ ናብዝን ናብትን ፋሕ ኣብሎ በሎ።

³⁸ነቲ ጽንሃሃት ናይቶም ብሓጢኣቶም ህይወቶም ዘጥፍኡ፡ እቲ መሰውኢ ብእኡ ኺልበጥ ኣርቂቖም ይቐጥቅጥዎ፡ ናብ ቅድሚ እግዚኣብሄር ኣቕሪቦምዎ እዮም እሞ፡ ተቐደሱ እዩ። ንደቂ እስራኤል ድማ ትእምርቲ ይኹን።

³⁹ኣልኣዛር ካህን ከአ ነቲ እቶም ዝነደዱ ጽንሃሃት ኣስራዚ ወሰዶ፡ ንመለበጢ መሰውኢ ኪኸውን ከአ ኣርቀቕዎ።

⁴⁰ካብ ዘርኢ ኣሮን ዘይኮነ ጓና ሰብ ኪዐጥን ኢሉ ናብ ቅድሚ እግዚኣብሄር ከይቐርብ፡ ከም ቆራሕን ከም ኣኼባኡን ከይኸውን፡ ከምቲ እግዚኣብሄር ብኢድ ሙሴ ዝበሎ፡ ንደቂ እስራኣኤል መዘከርታ ይኹን።

⁴¹ንጽቢሒቱ ድማ ብዘሎ እቲ ኣኼባ ደቂ እስራኣኤል፡ ንስኻትኩም ንህዝቢ እግዚኣብሄር ቀተልኩምዎ፡ ኢሎም ኣብ ልዕሊ ሙሴን ኣሮንን ኣጉረምረሙ።

⁴²ኮነ ኸአ፡ እቲ ኣኼባ ናብ ልዕሊ ሙሴን ኣሮንን ምስ ተአከበ፡ ናብ ድንኳን ምርኻብ ኣቢሎም ግልጽ በሉ፡ እንሆ ድማ ደበና ኣጎልበቦ፡ ክብሪ እግዚኣብሄር ከአ ተራእየ።

⁴³ሙሴን ኣሮንን ድማ ናብ ቅድሚ ድንኳን ምርኻብ መጹ።

⁴⁴እግዚኣብሄር ድማ ንሙሴ፡ ካብ ማእከል እዚ ኣኼባ እዚ ፍልይ በሉ፡ ኣነ ብቕጽበት ዓይኒ ኸጥፍኦም ኣየ፡ ኢሉ ተዛረቦ። ንሳቶም ብገጾም ተደፍኡ።

⁴⁵እግዚኣብሄር ድማ ንሙሴ፡ ካብ ማእከል እዚ ኣኼባ እዚ ፍልይ በሉ፡ ኣነ ብቕጽበት ዓይኒ ኸጥፍኦም ኣየ፡ ኢሉ ተዛረቦ። ንሳቶም ብገጾም ተደፍኡ።

⁴⁶ሙሴ ኸአ ንኣሮን፡ ካብ ቅድሚ እግዚኣብሄር ቁጥዓ ወጺኡ፡ መዓት ጀሚሩ እዩ እሞ፡ ጽንሃካ ወሲድካ፡ ካብ መሰውኢ ሓዊ ግበረሉ፡ ዕጣን ከአ ኣእተወሉ፡ ቀልጢፍካ ድማ ናብቲ ኣኼባ ኺድ እሞ ኣተዐርቆም፡ በሎ።

⁴⁷ኣሮን ከአ፡ ከምቲ ሙሴ ዝበሎ፡ ጽንሃህ ወሰደ፡ ናብ ማእከል ማሕበር ድማ ጎየየ። እንሆ ኸአ፡ እቲ መዓት ኣብቶም ህዝቢ ጀሚሩ ነበረ፡ ዕጥን ገይሩ ድማ ነቲ ህዝቢ ኣተዐረቖ።

⁴⁸ኣብ መንጎ ምውታንን ህያዋንን ደው በለ፡ እቲ መዓት ከአ ዝግበለ።

⁴⁹ብጀካ እቶም ብሰሪ ቆራሕ ዝሞቱ፡ እቶም ብመዓት ዝሞቱ ዓሰርተው ኣርባዕተ ሽሕን ሾብዓተ ሚእትን ኮኑ።

⁵⁰ኣሮን ድማ ናብ ሙሴ ናብ ኣፍ ድንኳን ምርኻብ ተመልሰ፡ ኣቲ መዓት ከአ ዝግ በለ።