Read መ/ቅዱስ ትግርኛ, Tigrigna Bible, 1997 ኦሪት ዘህልቍ 23 Bible Online

ኦሪት ዘህልቍ 23 - መ/ቅዱስ ትግርኛ, Tigrigna Bible, 1997 bible

ኦሪት ዘህልቍ 23

¹በላዓም ድማ ንባላቅ፡ ኣብዚ ሾብዓተ መሰውኢ ንደቐለይ እሞ ሾብዓተ ዝራብዕን ሾብዓተ ድዑልን ኣዳልወለይ በሎ።

²ባላቅ ከአ ከምቲ በላዓም ዝበሎ ገበረ፡ ባላቅን በላዓምን ኣብ መመሰውኢ ሓደ ዝራብዕን ሓደ ድዑልን ሰውኡ።

³በላዓም ድማ ንባላቅ፡ ኣብ ጥቓ እዚ ዚሓርር መስዋእትኻ ደው በል፡ ኣነ ምናልባሽ እግዚኣብሄር ኪራኸበኒ እንተ ወጸ፡ ክኸይድ እየ፡ እቲ ንሱ ዜርእየኒ ነገር ከአ ክነግረካ እየ፡ በሎ። ናብ ሓደ መላጥ በሪኽ ድማ ከደ።

⁴ኣምላኽ ከአ ንበላዓም ተጓነፎ፡ ንሱ ድማ፡ ሾብዓተ መሰውኢ ኣዳልኹ፡ ኣብ መመሰውኢ ኸአ ዝራብዕን ድዑልን ሰዋእኩ፡ በሎ።

⁵እግዚኣብሄር ድማ ቃል ኣብ ኣፍ በላዓም ኣንበረ፡ ናብ ባላቅ ተመሊስካ ኸምዚ ኢልካ ተዛረቦ፡ ከአ በሎ።

⁶ናብኡ ድማ ተመልሰ። እንሆ ኸአ፡ ንሱ ምስ ኩሎም ሹማምቲ ሞኣብ ኣብ ጥቓ እቲ ዚሓርር መስዋእቱ ደው ኢሉ ነበረ።

⁷ምስላኡ ኣልዒሉ ድማ በለ፡ ባላቅ ካብ ኣራም፡ ንጉስ ሞኣብ ካብ ኣኽራን ምብራቕ ኣምጽኣኒ፡ መጺእካ ንያእቆብ ርገመለይ፡ ንዓ ንእስራኤል ጸይፎ።

⁸ኣምላኽ ንዘይረገሞ ኸመይ ኢለ ኽረግም፡ እግዚኣብሄር ንዘይጸየፎ ኸመይ ገይረ ኽጽይፍ፡

⁹ካብ ርእሲ ኣኻውሕ ደአ ኣርእዩ፡ ካብ ኩርባታት ከአ እጥምቶ ኣሎኹ። እንሆ ንበይኑ ዚቕመጥ ህዝቢ፡ ምስ ህዝብታትውን አይቁጸርን።

¹⁰ነቲ ሓመድ ያእቆብ መን ኪቖጽሮ ይኽእል፡ ወይ ንርብዒ እስራኣኤል መን ይጽብጽቦ፡ ነፍሰይ ሞት ጻድቃን ትሙት፡ መወዳእታይ ከአ ከም ናቱ ይኹን።

¹¹ባላቅ ድማ ንበላዓም፡ እንታይ እዩ ዝገበርካኒ፡ ንጸላእተይ ክትረግሞም ኣምጻእኩኻ፡ እንሆ ኸአ ፈጺምካ መረቕካዮም፡ በሎ።

¹²ንሱ ድማ፡ እቲ እግዚኣብሄር ኣብ ኣፈይ ዘንበሮ ተጠምቂቐ ኽዛረበዶ ኣይግበኣንን እዩ፡ ኢሉ መለሰ።

¹³ባላቅ ድማ፡ በጃኻ፡ ኣብኣ ዃንካ ኽትርእዮምሲ፡ ናብ ካልእ ቦታ ምሳይ ኪድ። ናይ ሓደ ወገን ወሰኖም ትርኢ ኣሎኻ እምበር፡ ንብዘለው ኣይትርእዮምን ኢኻ ዘሎኻ፡ ኣብኡ ዃንካ ንኣታቶም ርገመለይ፡ በሎ።

¹⁴ናብ መሮር ጾፊም ናብ ርእፊ ጲስጋ ድማ ወሰዶ፡ ሾብዓተ መሰውኢ ኸአ ነደቐ፡ ኣብ መመሰውኢ ድማ ሓደ ዝራብዕን ሓደ ድዑልን ሰውኤ።

¹⁵ባላቅ ከአ፡ ኣብዚ ኣብ ጥቓ ዚሐርር መስዋእትኻ ደው በል፡ ኣነ ኣብኡ ኽራኸቦ ክኸይድ እየ፡ በሎ።

¹⁶እግዚኣብሄር ድማ ንበላዓም ተራኸቦ፡ ቃል ከአ ኣብ ኣፉ ኣንበረ፡ ናብ ባላቅ ተመሊስካ ድማ ከምዚ ኢልካ ተዛረቦ፡ በለ።

¹⁷ናብኡ ኸአ መጸ፡ እንሆ ድማ፡ ኣብ ጥቓ ኣቲ ዚሐርር መስዋእቱ ደው በሉ፡ ሹማምቲ ሞኣብውን ምስኡ ነበሩ። ባላቅ ድማ፡ እግዚኣብሄር እንታይ ተዛሪቡካ፡ በሎ።

¹⁸ሽዑ ምስላኡ ኣልዒሉ በለ፡ ባላቅ ተንስእ፡ ስማዕ ድማ፡ ኣታ ወዲ ጺጶር፡ ናባይጽን በል።

¹⁹ኣምላኽ ከይሕሱ፡ ሰብ ኣይኮነን። ከይጠዐስ ከአ፡ ወዲ ሰብ ኣይኮነን። ንሱ ዝበሎስ ኣይገበሮንዶ፡ እተዛረቦስ ኣይፍጽሞንዶ፡

²⁰እንሆ፡ ክምርቕ ተአዚዘ እየ። ንሱ ድማ ባሪኹ እዩ፡ ኣነ ኸአ ክመልሶ ኣይከአለንን።

²¹ኣብ ያእቆብ ክፍኣት ኣይጠመተን፡ ኣብ እስራኣኤል ከአ ሕሰም ኣይረአየን። እግዚኣብሄር ኣምላኹ ምስኡ ኣዩ፡ እልልታ ንንጉስ ድማ ኣብ ማኣከሉ ኣሎ።

²²ኣምላኽ ካብ ግብጺ ኣውጽኦም፡ ሓይሊ ኸም ናይ ርኤም ዝበለ ኣለዎ።

²³ኣብ ያእቆብ ኣስማት፡ ኣብ እስራኤል ከአ ጥንቁልና የልቦን። ብዛዕባ ያእቆብን እስራኤልን ብጊዚኡ፡ ኣምላኽ ከመይ ዝበለ ግብሪ ገበረ፡ ኪበሀል እዩ።

²⁴እንሆ፡ ህዝቢ ኸም ዋዕሮ ይትንስእ፡ ከም ኣንበሳ ይልዐል። ዝዘረፎ ኽሳዕ ዚበልዕ፡ ደም እቶ ቅቱላት ከአ ክሳዕ ዚሰቲ በጥ ኣይብልን።

²⁵ሽዑ ባላቅ ንበላዓም፡ ምርጋም ኣይትርገሞ፡ ምምራቕ ከአ ኣይትመርቆ፡ በሎ።

²⁶በላዓም ግና ንባላቅ፡ እግዚኣብሄር ዚብለኒ ኹሉ እየ ዝገብር፡ ኢለዶ ኣይተዛረብኩኻን፡ ኢሉ መለሰሉ።

²⁷ባላቅ ድማ ንበላዓም። ናብ ካልእ ቦታ ኽወስዳካ፡ ምናልባሽ ኣምላኽ እንተ ሰመሮ፡ ኣብኣ ዃንካ ኽትረግመለይ፡ በጃኻ ንዓ፡ በሎ።

²⁸ባላቅ ከአ ንበላዓም፡ ንበረኻ ኣቢሉ ናብ ዘርኢ ፡ ናብ ርእሲ ጴዖር ወሰዶ።

²⁹በላዓም ድማ ንባላቅ፡ ኣብዚ ሾብዓተ መሰውኢ ንደቐለይ፡ ሶብዓተ ዝራብዕን ሾብዓተ ድዑልን ከአ ኣብዚ ኣዳልወለይ፡ በሎ።

³⁰ባላቅ ድማ ከምቲ በላዓም ዝበሎ ገበረ፡ ኣብ መመሰውኢ ኸአ ሓደ ዝራብዕን ሓደ ድዑልን ሰውኤ።