Read መ/ቅዱስ ትግርኛ, Tigrigna Bible, 1997 ኦሪት ዘህልቍ 3 Bible Online

ኦሪት ዘህልቍ 3 - መ/ቅዱስ ትግርኛ, Tigrigna Bible, 1997 bible

ኦሪት ዘህልቍ 3

¹በታ እግዚኣብሄር ኣብ ከረን ሲና እተዛረበላ መዓልቲ፡ ወለዶ ኣሮንን ሙሴን እዚ እዩ።

²ስም ደቂ ኣሮን እዚ እዩ፡ ነዳብ እቲ በኹርን ኣቢሁን ኣልኣዛርን ኢታማርን።

³ስም እቶም እተቐብኡ ኻህናት፡ ንኽህነት ዝቐደሶም ደቂ ኣሮን እዚ እዩ።

⁴ናድብ ኣቢሁን ከኣ ኣብ በረኻ ሲና ናብ ቅድሚ እግዚኣብሄር ጋሻ ሓዊ ምስ ኣቕረቡ፡ ኣብ ቅድሚ እግዚኣብሄር ሞቱ፡ ውሉድ ከኣ ኣይነበርዎምን። ኣልኣዛር ኢታማርን ድማ ኣብ ቅድሚ ኣቦኦም ኣሮን ብኽህነት የገልግሉ ነበሩ።

⁵እግዚኣብሄር ከኣ ንሙሴ ኸምዚ ኢሉ ተዛረቦ፡

⁶ንነገድ ሌዊ ናብዚ እቕርቦ፡ ምእንቲ ኼገልግልዎ ባ ቅድሚ ኣሮን ካህን፡ ደው ኣብሎም።

⁷በቲ ዕዮ ኣገልግሎት ማሕደር ኣብ ቅድሚ ድንኳን ምርኻብ መዙን መዚ ኹሉ እቲ ኣኼባን ይሐልው።

⁸ኩሉ እቕሓ ድንኳን ምርኻብን መዚ ደቂ እስራኤልን ኣብ ዕዮ ኣገልግሎት ማሕደር።

⁹ሌዋውያን ንኣሮንን ንደቁን ሀቦም፡ ንሳቶም ካብ ደቂ እስራኤል ብመልኦም ንእኡ ተወፍዮም እዮም።

¹⁰ንኣሮንን ንደቁን ድማ እቲ ናይ ክህነቶም ኪሕልው ኣመዝዞም። ጓና እንተ ቐረባ ኸአ ይሙት።

¹¹እግዚኣብሄር ድማ ንሙሴ ኸምዚ ኢሉ ተዛረቦ፡

¹²እንሆ፡ ኣነ ኣብ ክንዲ እቶም ኣብ ደቂ እስራኤል ማሕጸን ዝኸፈተ ኹሉ በኩሪ ንሌዋውያን ካብ ማእከል ደቂ እስራኣኤል ወሲዶም እየ እሞ፡ ሌዋውያን ንኣይ ይኹኑ።

¹³በኹሪ ዝኾነ ኹሉ ንኣይ እዩ እሞ፡ በታ ንኹሉ በኹሪ ሃገር ግብጺ ዝወቓዕኩላ መዓልቲ፡ ሰብ ኮነ፡ እንስሳ ኾነ፡ ኩሉ በኹሪ ኣብ እስራኤል፡ ንኣይ ቀዲሰዮ እየ፡ ንኣይ ይኹን። ኣነ እግዚኣብሄር እየ።

¹⁴እግዚኣብሄር ድማ ንሙሴ ኣብ በረኻ ሲና ኸምዚ ኢሉ ተዛረቦ፡

¹⁵ንደቂ ሌዊ በብማይ ቤት ኣቦታቶምን በብዓሌቶምን ቁጽሮምን፡ ካብ ወዲ ወርሒ ንላዕሊ ዘሎ ኹሉ ተባዕታይ ቁጽሮም።

¹⁶ሙሴ ድማ ከምቲ ቓል እግዚኣብሄር፡ ከምቲ ንሱ ዝኣዘዞ ገይሩ ቖጸሮም።

¹⁷ደቂ ሌዊ በብስሞም እዚኣቶም እዮም፡ ጌርሾንን ቃሃትን መራሪን።

¹⁸ስም ደቂ ጌርሾን ድማ በብዓሌቶም እዚ እዩ፡ ሊብኒን ሺምዒን።

¹⁹ደቂ ቃሃት ድማ በብዓሌቶም፡ ኣምራምን ይጽሃርን ሔብሮንን ዑዚኤልን እዮም።

²⁰ደቂ መራሪ ድማ በብዓሌቶም፡ ማሕሊን ሙሺን እዮም። ዓሌታት ሌዋውያን በብማይ ቤት ኣቦታቶም እዚኣቶም እዮም።

²¹ካብ ጌርሾን ዓሌት ሊብናውያንን ዓሌታት ሺምዓውያንን እዮም፡ እዚኣቶም ዓሌታት ጌርሾናውያን እዮም።

²²ቁጽሪ እቶም ካብ ወዲ ወርሒ ንላዕሊ ዘለው ኹሎም ቑጹራት ተባዕትዮ፡ እቶም ቁጽራቶም ሾብዓተ ሽሕን ሓሙሽተ ሚእትን እዮም።

²³ዓሌታት ጌርሾናውያን ብድሕሪ ማሕደር ብሸነኽ ምዕራብ ይስፈሩ።

²⁴ሹም ማይ ቤት ኣቦ ጌርሾናውያን ኤልያሳፍ ወዲ ላኤል እዩ።

²⁵ሓለዋ ደቂ ጌርሾን ኣብ ድንኳ ምርኻብ ድማ ነቲ ማሕደርን መኽደኒኡን መደረብራኣኡን መጋረጃ ኣፍ ድንኳን ምርኻብን፡

²⁶መጋረጃታት ኣጸድን መጋረጃ ኣፍ ደገ እቲ ዙትያ ማሕደርን መሰውእን ዘሎ ኣጸድን ኣግማድን ናይ ኩሉ ኣገልግሎቱ እዩ።

²⁷ካብ ቃሃት ድማ ዓሌት ኣምራማውያንን ዓሌት ይጽሃራውያንን ዓሌት ሔብሮናውያንን ዓሌት ዑዙኤላውያንን እዮም፡ እዚኣቶም ዓሌታት ቃሃታውያን እዮም።

²⁸እቶም ሐለዋ መቕደስ ዚሕልው ዝነበሩ ኻብ ወርሒ ንላዕሊ ዘለው ኹሎም ተባዕትዮ ምስ ተቖጽሩ፡ ሾሞንተ ሽሕን ሹዱሽተ ሚእትን ኮኑ።

²⁹ዓሌታት ደቂ ቃሃት ንማሕደር ብሸነኽ ደቡብ ይስፈሩ።

³⁰ሹም ማይ በኢት ኣቦ ዓሌታት ቃሃታውያን ድማ ኤሊጻፋን ወዲ ዑዙኤል እዩ።

³¹ሓለዋኦም ድማ ታቦት ሰደቓን ቀዋሚ ቐንዴልን መሰውኢታትን ንመቕደስ ዜገልግሉሉ ኹሉ እቓሑን እቲ መጋረጃን ናይ ኩሉ ኣገልግሎቱን እዩ።

³²ሹም ሹማምቲ ሌዋውያን ከኣ ኣልኣዛር ወዲ ኻህን ኣሮን እዩ። ንሱ ነቶም ሓለዋ መቕደስ ዚሕልው፡ ገበዞም ይኹን።

³³ካብ መራሪ፡ ዓሌት ማህላውያንን ዓሌት ሙሻውያንን እዮም፡ እዚኣቶም ዓሌታት መራሪ እዮም።

³⁴ካብ ወዲ ወርሒ ንላዕሊ ዘለው ኹሎም ተባዕትዮ ምስ ተቖጽሩ፡ እቶም ቑጹራቶም ሹዱሽተ ሽሕን ክልተ ሚእትን ኮኑ።

³⁵ሹም ማይ ቤት ኣቦ ዓሌታት መራሪ፡ ጹርኤል ወዲ ኣቢሓይል እዩ። ንሳቶም ንማሕደር ብሸነኽ ሰሜኑ ይስፈሩ።

³⁶እተመዘዝዎ ሓለዋ ደቂ መራሪ ድማ ንኣልዋሕ ማሕደርን ጋድማቱን ኣኦኑዱን ኣእጋሩን ኩሉ እቓሑኡን ናይ ኩሉ ኣገልግሎቱን፡

³⁷ኣዕኑድ እቲ ኣጸድ በብዙርያኡን ኣእጋሩን ሸኻውልቱን ኣግማዱን እዩ።

³⁸እቶም ኣብ መንጽር ማሕደር ብምብራቑ፡ ኣብ ቅድሚ ድንኳን ምርኻብ፡ ብሸነኽ ምውጻእ ጸሓይ ዚሰፍሩ፡ ሙሴን ኣሮንን ደቁን እዮም። ንሳቶም ነቲ ሓለዋ ደቂ እስራኤል ኣብ መቕደስ ዚሕሎ ይሕልው ነበሩ። ጓና ናብኡ እንተ ቐረበ ኸኣ ይሙት።

³⁹እቶም እተቖጽሩ ኩሎም ሌዋውያን፡ ሙሴን ኣሮንን ብትእዛዝ እግዚኣብሄር በብዓሌቶም ዝቖጸርዎም፡ ካብ ወዲ ወርሒ ንላዕሊ ዘለው ኹሎም ተባዕትዮ ዕስራን ክልተን ሽሕ ኮኑ።

⁴⁰እግዚኣብሄር ድማ ንሙሴ በሎ፡ ኩሎም ተባዕትዮ በኹሪ ደቂ እስራኤል ካብ ወዲ ወርሒ ንላዕሊ ንዘለው ቑጸር፡ ቁጽሪ ስሞም ድማ ውሰድ።

⁴¹ኣነ እግዚኣብሄር እየ፡ ንሌዋውያን ኣብ ክንዲ ኹሎም በኹሪ ኣብ ደቂ እስራኤል፡ ማል ሌዋውያን ድማ ኣብ ክንዲ በኹሪ ማል ደቂ እስራኤል ንኣይ ውሰዶም።

⁴²ሙሴ ድማ፡ ከምቲ እግዚኣብሄር ዝኣዘዞ ንኹሉ በኹሪ ኣብ ደቂ እስራኤል ቆጸረ።

⁴³ካብ ወዲ ወርሒ ንላዕሊ ዘሎ ኹሉ በኹሪ ተባዕታይ በብስሞም እተቖጽሩ፡ ቁጹራቶምን ዕስራን ክልተን ሽሕን ክልተ ሚእትን ሰብዓን ሰለስተን ኮኑ።

⁴⁴እግዚኣብሄር ድማ ንሙሴ ኸምዚ ኢሉ ተዛረቦ፡

⁴⁵ንሌዋውያን ኣብ ክንዲ ኹሉ በኹሪ ኣብ ደቂ እስራኤል፡ ማል ሌዋውያን ድማ ኣብ ክንዲ ማሎም ውሰድ፡ ሌዋውያን ናተይ ይኹኑ። ኣነ እግዚኣብሄር እየ።

⁴⁶በጃ እቶም ክልተ ሚእትን ሰብዓን ስለስተን በኩር ደቂ እስራኤል፡ ካብ ቁጽሪ ሌዋውያን ዝሐለፉ ኸኣ፡

⁴⁷ነንርእሲ ሓሙሽተ ሲቃል ውሰድ፡ ብሲቃል መቕደስ ውሰድ፡ ሲቃል ዕስራ ጌራ እዩ።

⁴⁸ናይቶም ሕልፊ ዝኾኑ ኸኣ ገንዘብ በጃ ንኣሮንን ንደቁን ሀቦም።

⁴⁹ሙሴ ድማ ካብቶም ብሌዋውያን እተበጀዎም ሕልፊ ዝኾኑ፡ ገንዘብ በጃ ወሰደ።

⁵⁰ካብ በኹርታት ደቂ እስራኣኤል ብሲቃል መቕደስ ሽሕን ሰለስተ ሚእትን ስሳን ሓሙሽተን ሲቃል ገንዘብ ወሰደ።

⁵¹ሙሴ ድማ ከምቲ ቓል እግዚኣብሄር፡ ከምቲ እግዚኣብሄር ንሙሴ ዝኣዘዞ፡ እቲ ገንዘብ በጃ ንኣሮንን ንደቁን ሀቦም።