Read መ/ቅዱስ ትግርኛ, Tigrigna Bible, 1997 ትንቢት ሚክያስ 6 Bible Online

ትንቢት ሚክያስ 6 - መ/ቅዱስ ትግርኛ, Tigrigna Bible, 1997 bible

ትንቢት ሚክያስ 6

¹እቲ እግዚኣብሄር ዚዛረቦ ስምዑ፡ ተንስእ ኣብ ቅድሚ ኣኽራን ፍረድ ንኹድኹዶታት ከአ ደሃይካ ኣስምዓዮም።

²እግዚኣብሄር ምስ ህዝቡ ነገር አለዎ፡ ምስ እስራኤል ድማ ኪካታዕ እዩ እሞ፡ ኣቱም ኣኽራን፡ ንስኻትኩምውን ጽኑዓት መሰረት ምድሪ፡ ነገር እግዚኣብሄር ስምዑ።

³ኣታ ህዝበይ፡ እንታይ ገይረካ እየ፡ ብምንታይከ ኣድከምኩኻ፡ እስኪ መስክረለይ።

⁴ኣነ ኻብ ሃገር ግብጺ ኣውጺእካ፡ ካብ ቤት ባርነት ኣድሒነካ፡ ንሙሴን ኣሮንን ሚርያምን ከአ ቀቅድሜኻ ሰዲደዮም እየ እሞ፡

⁵ኣታ ህዝበይ፡ ጽድቂ እግዚኣብሄር ክትፈልጥሲ፡ ነቲ ባላቅ ንጉስ ሞኣብ ዝመኸሮ፡ በለዓም ወዲ ቤዖር ከአ ዝመለሰሉ፡ ካብ ሸጢም ክሳዕ ጊልጋል ዝኾነውን ዘክር።

⁶ናብ ቅድሚ እግዚኣብሄር እንታይ ሒዘ ኽመጽእ፡ ከመይ ገይረኸ ኣብ ቅድሚ ልዑል ኣምላኽ ክሰግድ እየ፡ ዚሐርር መሰዋእትን ኣባትይ ሓደ ዓመትን ክቕርብዶ ናብ ቅድሚኡ ኽመጽእ እየ፡

⁷እግዚኣብሄርዶ በሽሓት ደዓውልን በእላፋት ወሓይዝ ዘይትን ባህ ይብሎ እዩ፡ ስለ በደለይዶ በኹሪ ወደይ፡ ስለ ሓጢኣት ነፍሰይ ከአ ፍረ ኽርሰይዶ ኸውፊ እየ፡

⁸ኣታ ሰብ ቅኑዕ ኽትገብር፡ ምሕረት ከአ ክትፈቱ፡ ምስ ኣምላኽካውን ብትሕትና ኽትመላለስ እንተ ዘይኮነስ፡ ካባኻ ዚደልዮ እንታይ እዩ።

⁹ደሃይ እግዚኣብሄር ነታ ኸተማ ይጽውዓ፡ ጥበብ ከአ ንስምካ ኽትርኢ እያ። ነታ ሾቦጥን ነቲ ዘዳለዎን ሰምዑ።

¹⁰እቲ መዛግብ ረሲእነትን ነቲ ጽዩፍ ጎደሎ ኤፋንዶ ገና ኣብ ቤት ረሲእ አሎ እዩ፡

¹¹ኣነዶ ብሚዛን ረሲእነትን በቲ ኸረጺት ጠባሪ መምዘንን ንጹህ ኪኸውን እየ፡

¹²እቶም ሃብታማት ዓመጽ ዝመልኡ እዮም፡ እቶም ኣብኣ ዚነብሩ ድማ ሓሶት ይዛረቡ፡ ልሳኖምውን ኣብ ኣፎም መታለሊት እያ።

¹³ስለዚ ኣነ ድማ ብሰሪ ሓጢኣትካ ኽሳዕ እትደክምን እትፈርስን ክወቕዓካ እየ።

¹⁴ንስኻ ትበልዕ፡ ግናኸ ኣይትጸግብን፡ ውርደትካ ኣብ ውሽጥኻ ኪኸውን እዩ፡ ትሕዝ፡ ግናኸ ኣይተድሕንን፡ እቲ ዘድሐንካዮ ኸአ ንአደዳ ሰይፊ ኽምጥዋ እየ።

¹⁵ንስኻ ትዘርእ፡ ግናኸ ኣይትዐጽን ፍረ ኣውልዕ ትጎድእ፡ ግናኸ ዘይቲ ኣይትልከን። ኩልዒ ወይኒ ትጸምቑ፡ ወይኒ ግና ኣይትሰትን።

¹⁶ኣነ ንኣኻ መሰክሒ፡ ነቶም ኣብኣ ዚነብሩ ኸአ ንፉጻ ኽገብርሲ፡ ስርዓት ኣምርን ኩሉ ግብሪ ቤት ኣሃብን ይሕልው፡ ንስኻትኩም ድማ ብምኽሮም ትመላለሱ አሎኹም እሞ፡ ጸርፊ ህዝበይ ክትጾሩ ኢኹም።