Read መ/ቅዱስ ትግርኛ, Tigrigna Bible, 1997 ትንቢት ናሆም 1 Bible Online

ትንቢት ናሆም 1 - መ/ቅዱስ ትግርኛ, Tigrigna Bible, 1997 bible

ትንቢት ናሆም 1

¹ጾር ነነዌ። መጽሓፍ ራእይ ናሆም ኣልቆሻዊ።

²እግዚኣብሄርሲ ቕንእን ፈዳይ ሕን ኣምላኽ እዩ፡ እግዚኣብሄር ፈዳይ ሕነን ቁጥዓ ዝመልኤን እዩ። እግዚኣብሄር ንተጻረርቱ ሕነ ይፈድዮም፡ ንጸላእቱ ኸአ ይቕየሞም።

³እግዚኣብሄር ንኩራ ደንጓይን ብዓል ዓብዩ ሓይልን እዩ፡ ነቲ በዳሊ ከቶ ኸም ንጹህ ኣይቆጽሮን፡ እግዚኣብሄር ብሸምቦባን ብህቦብላን እዩ መገዱ፡ ደበና ኸአ ተጎጓ ኣእጋሩ እዩ።

⁴ነቲ ባሕሪ ይገንሖን የንቅጾን፡ ንኹሉ ርባታት የንጽፎ፡ ብሳንን ቀሜሎስን ጸምለው፡ ዕምባባ ሊባኖስውን ጸምለወ።

⁵ኣኽራን ኣብ ቅድሚኡ የንቀጥቅጡ፡ ኩርባታት ከአ ይመኩ፡ ምድርን ዓለምን ኣብኡ ዚነብሩ ኹላቶምን ኣብ ቅድሚኡ ይናወጹ።

⁶ኣብ ቅድሚ ኹራኡ ደው ዚብል መን እዩ፡ ኣብ ረስኒ ቑጥዓኡስ መን ይቐውም፡ ነድሩ ኸም ሓዊ ይልሕም ነኻውሕውን ይጭንድሖ።

⁷እግዚኣብሄር ሰናይ እዩ፡ ብመዓልቲ ጸበባ ዕርዲ እዩ፡ ነቶም ኣብኡ እተማዕቆቡ ድማ ይፈልጦም እዩ።

⁸ንሱ ነቲ ቦታኣ ብዚድምስስ ውሒዝ ጥራስ ኬጥፍኦ እዩ፡ ንጸላእቱ ኸአ ናብ ጸልማት ኪሰጎም እዩ።

⁹ኣንጻር እግዚኣብሄር እንታይ ትሐስቡ፡ ንሱስ ብጥራስ ኬጥፍእ እዩ፡ ጸበባ ኻልኣይ ሳዕ ኣይኪለዐልን እዩ።

¹⁰ምንም እኳ ኸም እሾኹ እንተ ተተናነጎ፡ ብወይኖምውን እንተ ሰኸሩ፡ ከም ንቑጽ ብርዒ ብጥራስ ሞኹ ኪብሉ እዮም።

¹¹እቲ ንእግዚኣብሄር እከይ ዚሐስበሉ፡ ሕሰም ከኣ ዚመኽረሉ፡ ካባኻ ወጸ።

¹²እግዚኣብሄር ከምዚ ይብል ኣሎ፡ ምንም እኳ ሓያላትን ብዙሓትን ኣንተ ኾኑ፡ ኪዕጸዱ እዮም፡ ንሱውን ኪጠፍእ እዩ ንሱውን ኪጠፍእ እዩ። ኣነ ኣጨነቕኩኻ፡ ድሕሪ ደጊምሲ ኣይከጨንቐካን እየ።

¹³ሕጂ ድማ ኣርዑት ኻባኻ ኽሰብር እየ፡ ንማእሰሪታትካ ኸአ ክበታትኾ ኣየ።

¹⁴እግዚኣብሄር፡ ድሕርዚ ኻብ ስምካ ኣይዘራእ፡ ኣነ ነቲ ቕሩጽ ምስልን ነቲ ፍሱስ ምስልን ካብ ቤት ኣማልኽትኻ ኸጥፍኦ እየ፡ እተነዐቕ ኢኻ እሞ፡ መቓብር ክገብረልካ ኣየ፡ ኢሉ ብዛዕባኻ አዘዘ።

¹⁵እንሆ፡ ኣእጋር እቲ ብስራት ዜበስር፡ ሰላም ከአ ዜውሪ ኣብ ኣኽራን አለዋ። ደጊምሲ እቲ ሕሱም ኣብ ማእከልካ ኣይኪሐልፍን ብጥራስ ከአ ጸኒቱ እዩ እሞ፡ ዎ፡ ይሁዳ፡ በዓላትካ ኣብዕል፡ መብጽዓኻ ፈጽም።