Read መ/ቅዱስ ትግርኛ, Tigrigna Bible, 1997 ትንቢት ሶፎንያስ 1 Bible Online

ትንቢት ሶፎንያስ 1 - መ/ቅዱስ ትግርኛ, Tigrigna Bible, 1997 bible

ትንቢት ሶፎንያስ 1

¹እቲ ብዘመን ዮስያስ፡ ወዲ ኣሞን ንጉስ ይሁዳ፡ ናብ ጸፎንያስ ወዲ ኩሺ፡ ወዲ ግዳልያ፡ ወዲ ኣማርያ፡ ወዲ ህዝቅያስ፡ ዝመጸ ቓል እግዚኣብሄር እዚ እዩ።

²ኣነ ንብዘሎ ኹሉ ኻብ ዝባን ምድሪ ኸጥፍኦ እየ፡ ይብል እግዚኣብሄር።

³ኣነ ንሰብን እንስሳን ከጥፍኦም እየ፡ ነዕዋፍ ሰማይን ዓሳታት ባሕርን ንመዓንቀፊታት ምስናይ እቶም ረሲኣንን ከጥፍኦም እየ፡ ንሰብውን ካብ ገጽ ምድሪ ኸጽንቶም ኣየ፡ ይብል እግዚኣብሄር።

⁴ኣብ ልዕሊ ይሁዳን ኣብ ልዕሊ እቶም ኣብ ዮርሳሌም ዚነብሩ ኹላቶምን ኢደይ ክዝርግሕ እየ፡ ካብዚ ቦታ እዚ ንተረፍ በዓል፡ ንስም ካህናት ጣኦታት፡ ምስናይ እቶም ካህናት ከጽንቶም እየ፡

⁵ነቶም ኣብ ልዕሊ ናሕሲ ንሰራዊት ሰማይ ዚሰግዱን ነቶም ብማልካም ዚምሕሉን፡

⁶ነቶም ካብ እግዚኣብሄር ዚርሕቁን ንእግዚኣብሄር ዘይደልይዎን ዘይሐትዎን ከጽንቶም እየ።

⁷መዓልቲ እግዚኣብሄር ቀሪባ እያ፡ እግዚኣብሄር መስዋእቲ ሕሩድ ኣዳልዩ፡ ነቶም ዕዱማቱ ከአ ቀዲስዎም እዩ እሞ፡ ኣብ ቅድሚ እግዚኣብሄር ኣምላኽ ስቕ በሉ።

⁸ኪኸውን ድማ እዩ፡ በታ መዓልቲ መስዋእቲ ሕሩድ እግዚኣብሄር፡ ኣነ ነቶም መሳፍንትን ደቂ ንጉስን ነቶም ክዳን ጓኖት ዚኽደኑን ክቐጽዖም እየ።

⁹በታ መዓልቲ እቲኣ ኣነ ነታ ልዳት ዚዘልዋ፡ ነቶም ንቤት ጎይትኦም ብዓመጽን ብጥበራን ዚመልእዋ ኹላቶም ክቐጽዖም እየ።

¹⁰እግዚኣብሄር ከምዚ ይብል አሎ፡ በታ መዓልቲ እቲኣ ደሃይ ጭድርታት ኻብ ደገ ዓሳ፡ ኣውያት ከአ ካብቲ ኻልኣይ ደገ፡ ካብ ኩርባታት ድማ ዓብዩ ምስብባር ኪስማዕ እዩ።

¹¹ኩሉ ህዝቢ ኸነኣን ጠፊኡ፡ እቶም ብሩር እተሰከሙ ኹላቶም ጸኒቶም እዮም እሞ፡ ኣቱም ኣብ መኽቴሽ እትነብሩ፡ ብኸዩ።

¹²በቲ ዘመን እቲ ኪኸውን እዩ፡ ኣነ ንዮርሳሌም ብመብራህቲ ኽጉራጉራ እየ፡ ነቶም ኣብ ሓተላኦም እተቐመጡን ብልቦም፡ እግዚኣብሄርሲ ጽቡቕ ኣይገብር፡ ክፉእውን ኣይገብር፡ ዚብሉን ሰባት ክቐጾዖም እየ።

¹³ገንዘቦም ኪዝመት፡ ኣባይቶም ኪባድም እዩ። ኣባይቲ ኺሰርሑ፡ ግናኸ ኣይክነብርዎን፡ ኣታኽልቲ ወይኒ ኺተኽሉ፡ ወይኑ ግና ኣይኪሰትዩን እዮም።

¹⁴እታ ዓባይ መዓልቲ እግዚኣብሄር፡ ድምጺ መዓልቲ እግዚኣብሄር ቀሪባ ቀሪባ እያ፡ ኣዝያ ኸአ ትቕልጥፍ አላ። ሽዑ እቲ ጅግና ኣምሪሩ የእዊ።

¹⁵እታ መዓልቲ እቲኣ መዓልቲ ቑጥዓ፡ መዓልቲ ጸበባን መከራን፡ መዓልቲ ምዕናውን ምብዳምን፡ መዓልቲ ጸልማትን እያ።

¹⁶ነተን ዕሩዳት ከተማታትን በረኽቲ ግምብታትን መዓልቲ መለኸትን ኣውያትን እያ።

¹⁷እቶም ሰብ ንእግዚኣብሄር ስለ ዝበደሉ፡ ከጽብበሎም እየ፡ ከም ዕውራት ድማ ኪመላለሱ እዮም። ደሞም ከም ሐመድ ኪክዖ እዩ፡ ስጋኦም ከአ ከም ጎሓፍ።

¹⁸ነቶም ኣብታ ሃገር ዚነብሩ ኹላቶም ብድንገት ጥራስ ከጥፍኦም እዩ እሞ፡ በታ መዓልቲ ቑጥዓ እግዚኣብሄርሲ ብሩሮም ወይስ ወርቆም ኣይከናግፎምን እዩ፡ ግናኸ ኩላ እታ ሃገር ብሓዊ ቕንኣቱ ኽትወሐጥ እያ።