Read መ/ቅዱስ ትግርኛ, Tigrigna Bible, 1997 ትንቢት ዘካርያስ 13 Bible Online

ትንቢት ዘካርያስ 13 - መ/ቅዱስ ትግርኛ, Tigrigna Bible, 1997 bible

ትንቢት ዘካርያስ 13

¹በታ መዓልቲ እቲኣ ንቤት ዳዊትን ነቶም ኣብ ዮርሳሌም ዚነብሩን ንሓጢኣትን ርኽሰትን እትኸውን ዔላ ማይ ክትክፈተሎም እያ።

²እግዚኣብሄር ጐይታ ሰራዊት ከምዚ ይብል አሎ፡ በታ መዓልቲ እቲኣ ኪኸውን እዩ፡ ንስም ጣኦታት ካብታ ሃገር ከጥፍኦ እየ፡ ድሕርዚ ድማ ኣይኪዝከርን እዩ። ነቶም ነብያትን ነቲ ርኹስ መንፈስን ከአ ካብታ ሃገር ከልቅቖም እየ።

³ኪኸውን ድማ እዩ፡ ገለ ሰብ ገና እንተ ተነበየ፡ እቶም ዝወለድዎ ኣቦኡን ኣዲኡን፡ ንስኻ ብስም እግዚኣብሄር ሓሶት ተዛሪብካ ኢኻ ሞ፡ ብህይወት ኣይትነብር፡ ኪብልዎ እዮም። እቶም ዝወለድዎ ኣቦኡን ኣዲኡንውን ኪንበ ኽሎ ክወግእዎ እዮም።

⁴በታ መዓልቲ እቲኣ ድማ ኪኸውን እዩ፡ እቶም ነብያት ነፍሲ ወከፎም ኪንበዩ ኸለው፡ ብርእዮም ኪሐንኩ እዮም፡ ንምሕሳው ከአ ጨጓር ባርኖስ ኣይኪለብሱን እዮም።

⁵ግናኸ፡ ሰብ ካብ ንእስነተይ ገዚኡኒ እዩ እሞ፡ ሐረስታይ እየ እምበር፡ ነብዩ ኣይኮንኩን፡ ኪብል እዩ።

⁶ንእኡ ኸእ፡ እዚ ኣብ ማእከል ኣእዳውካ ዘሎ ቑስሊ እንታይ እዩ፡ እንተ በልዎ፡ ንሱ ድማ፡ እዚ ኣብ ቤት እቶም ዘፍቀርኒ እተወጋእክዎ እዩ፡ ክብል እዩ።

⁷ዎ ሰይፊ፡ ኣንጻር ጓሳይን ኣንጻር እቲ ብጻየይ ዝኾነ ሰብን ተንስእ፡ ነቲ ጓሳ ውቕዓይ፡ እንተ ኣባጊዕ ክአ ፋሕ ክብላ እየን፡ ኢደይ ድማ ኣንጻር እቶም ናኣሽቱ ኽመልስ እየ፡ ይብል ግዚኣብሄር ጐይታ ሰራዊት።

⁸ኣብ ኩላ እታ ሃገር ድማ ኪኽውን እዩ፡ ይብል እግዚኣብሄር ቶም ክልተ ኢድ ኣብኣ ኪቖረጹን ኩሞቱን እዮም፡ እቲ ሲሶ ግና ኣብኣ ኺተርፍ እዩ።

⁹ኣነ ኸአ ነቶም ሲሶ ናብ ሓዊ ኽእትዎም፡ ብሩር ከም ዚኹላዕ ክኽልዖም፡ ወርቂ ኸም ዚፍተን ክፍትኖም እየ። ስመይ ኪጽውዑ እዮም፡ ኣነውን ክሰምዖም እይየ ህዝበይ እዩ ክብል እየ። ንሱውን እግዚኣብሄር ኣምላኸይ እዩ ኪብል እዩ።