Read መ/ቅዱስ ትግርኛ, Tigrigna Bible, 1997 ኦሪት ዘዳግም 3 Bible Online

ኦሪት ዘዳግም 3 - መ/ቅዱስ ትግርኛ, Tigrigna Bible, 1997 bible

ኦሪት ዘዳግም 3

¹ተመሊስና ድማ ብመገዲ ባሳን ደየብና። ዖግ፡ ንጉስ ባሳን ድማ ምድ ኩሉ ህዝቡ ኣብ ኤድሬዒ ኺዋግኣና ኢሉ ኺቃባበለና ወጸ።

²እግዚኣብሄር ከአ በለኒ፡ ንእኡን ንብዘሎ ህዝቡን ንሃገሩን ኣብ ኢድካ ሂበካ ኣሎኹ እሞ፡ ኣይትፍራሀዮ። ከምቲ ኣብ ሔስቦን ንዝነበረ ሲሆን ንጉስ ኣሞራውያን ዝገበርካዮ፡ ንእእዩ ድማ ከምኡ ኽትገብሮ ኢኻ።

³ከምኡ ኸአ እግዚኣብሄር ኣምላኽና ንዖግ ንጉስ ባሳንን ንኹሉ ህዝቡን ኣብ ኢድና ሀበና፡ ሓደ እኳ ኸይተረፎ ወቓዕናዮ።

⁴በታ ግዜ እቲኣ ኹላ ምድሪ ኣርጎብ፡ መንግስቲ ዖግ ኣብ ባሳን፡ ስሳ ኸተማ ኩለን ከተማታቱ ሒዝና ካባታቶም ዘይሓዝናያ ኸተማ ኣይነበረትን።

⁵ኩለን እዘን ከተማታት እዚኤን፡ ብጀካ እተን ዘይተዐርዳ ብዙሓት ከተማታት፡ ብነዊሕ መካበብያ እተዐርዳ። ብመዓጹን ብመሸጎርን ዝጸንዓ እየን።

⁶ከምቲ ንሲሆን ንጉስ ሔስቦን፡ ዝገበርናዮ ድማ፡ ፈጺምና ኣጥፋኣናዮም። ንኹለን ከተማታት ምስ ሰብኡትን ኣንስትን ቆልዑን ፈጺምና ኣጥፋእናዮም።

⁷ኩለን ማልን ካብ ከተማታት ዝገፈፍናዮን ግና ንኣና ዘመትናዮ።

⁸እቲ ኻብ ለሰ ኣርኖን ክሳዕ ከረን ሄርሞን፡ ኣብ ማዕዶ ዮርዳኖስ ዝነበረት ሃገር፡ በታ ጊዜ እቲኣ ኻብ ኢድ ክልቲኦም ነገስታት ኣሞራውያን ወሰድናያ።

⁹ነዚ ሄርሞን ሲዶናውያን ሲርዮን ይብልዎ።

¹⁰ጎልጎል ዘለዋ ኹለን ከተማታት መንግስቲ ዖግ ኣብ ባሳን።

¹¹ካብቶም ተረፍ ረፋውያን ግና ዖግ ንጉስ ባሳን በይኑ ተሪፉ ነበረ። እንሆ ዓራቱ ዓራት ሓጺን ነበረ፡ ንሱ ኣብ ራባት ናይ ደቂ ዓሞን ደይኮነን፡ ምንዋሑ ብእመት ሰብ ትሽዓተ እመት፡ ምግፋሑ ኸአ ኣርባዕተ እመት ነበረ።

¹²በታ ጊዜ እቲኣ እዛ ምድሪ እዚኣ ወረስና። ካብታ ለሰ ኣርኖን ዘላ ዓሮዔር ፈረቓ ኸረን ጊልኣድን ከተማታትን ንደቂ ሮቤልን ንደቂ ጋድን ሀብክዎም።

¹³ተረፍ ጊልኣድን ኩላ ባሳን መንግስቲ ዖግን ንፈረቓ ነገድ ምናሴ ሀብክዎም። ብዘላ ምድሪ ኣርጎብ፡ ኩላ ባሳን፡ ሃገር ረፋውያን ትበሀል።

¹⁴ያኢር ወዲ ማናሴ፡ ነታ ኽሳዕ ወሰን ግሹራውያንን ማዓካውያንን ዘላ ኹላ ምድሪ ኣርጎብ ሓዛ። ንእኤን ማለት ባሳን፡ ብስሙ፡ እቲ ኽሳዕ ሎሚ ዚሰመያሉ ዘለዋ፡ ሓዎትያኢር ኣውጽኣለን።

¹⁵ንማኪር ድማ ጊልኣድ ሀብክዎ።

¹⁶ንደቂ ሮቤልን ንደቂ ጋድን ድማ ካብ ጊልኣድ ክሳዕ ለሰ ኣርኖን፡ ክሳዕ ፈረቓ እቲ ለሰን ዶቡን ድማ፡ ክሳዕ ርባ ያቦቅ፡ ንሱ ኸአ ዶብ ደቂ ዓሞን፡

¹⁷ድማ ጎልጎልን ዮርዳኖስን ዶብን ካብ ኪረነት ክሳዕ ናይ ጎልጎል ባሕሪ፡ ንሱ ባሕሪ ጨው፡ ኣብ እግሪ ጎቦታት ጲስጋ ንምብራቕ ሀብክዎም።

¹⁸በታ ጊዜ እቲኣ ኸምዚ ኢለ ኣዛዝክኹም፡ እግዚኣብሄር ኣምላኽኩም እዛ ምድሪ እዚኣ ኽትርስትይዋ ሂበኩም እየ እሞ፡ ሰብ ሓይሊ ዘበልኩም ኣጽዋር ሒዝኩም ቀቅድሚ ኣሕዋትኩም ደቂ እስራኤል ሕለፉ።

¹⁹ኣንስትኹምን ቆልዑኹምን ከብትኹምን ግና፡ ብዙሓት ከብቲ ኸም ዘሎኹም እፈልጥ እየ፡ ኣብተን ዝሀብኩኹም ከተማታት ይቀመጡ።

²⁰እግዚኣብሄር ነሕዋትኩም ድማ ከማኸትኩም ክሳዕ ዜዕርፎም፡ እታ እግዚኣብሄር ኣምላኽኩም ኣብ ማዕዶ ዮርዳኖስ ዝህቦም ምድሪ ኽሳዕ ዚርስትይዋ፡ ጽንሑ። ድሕርቲ ነፍሲ ወከፍኩም ነናብታ ዝሀብኩኹም ርስትኹም ትምለሱ።

²¹በታ ጊዜ እቲኣ ድማ ንእያሱ፡ እግዚኣብሄር ኣምላኽኩም ኣብዞም ክልተ ነገስታት እዚኣቶም ዝገበሮ፡ ኣዒንትኻ ርእየን ኣየን፡ ነተን ናብኤን እተሐልፍ ዘሎኻ ኹለን መንግስታት ከአ እግዚኣብሄር ከምኡ ኺገብር እዩ፡

²²እግዚኣብሄር ኣምላኽኩም፡ ኢለ ኣዘዝክዎ።

²³በታ ግዜ እቲኣ ድማ፡ ንእግዚኣብሄር ከምዚ ኢለ ለመንክዎ፡

²⁴ዎ እግዚኣብሄር ኣምላኽ፡ ንባርያኻ ዕቤትካን እታ ጽንዕቲ ኢድካን ከተርእየኒ ጀመርካ፡ ከመይሲ ኣብ ሰማይ ኮነ ኣብ ምድሪ ኸም ግብርኻን ከም ሓይልኻን ኪገብር ዚኽእል ኣየናይ ኣምላኽ እዩ፡

²⁵ነዛ ኣብ ስግር ዮርዳኖስ ዘላ ጽብቕቲ ምድሪ፡ ነቲ ጽቡቕ ከረንን ሊባኖስን፡ ክርኢ ኾታ ኣሕልፈኒ፡ በልኩ።

²⁶እግዚኣብሄር ግና ብሰርኹም ተቖጥዓኒ፡ ኣይሰምዓንን ከአ። እግዚኣብሄር ድማ በለኒ፡ ይኣኽለካ፡ በዚ ነገር እዚ መሊስካ ኣይትዛረበኒ፡

²⁷ነዚ ዮርዳኖስ ኣይተሳግሮን ኢኻ እሞ፡ ናብ ርእሲ ጲስጋ ደየብ፡ ኣዒንትኻ ኣልዒልካ ኸአ ንምዕራብን ንሰሜንን ንደቡብን ንምብራቕን በዒንትኻ ጠምት።

²⁸እያሱ ግና ቀቅድሚ እዚ ህዝቢ እዚ ኽሓልፍ፡ ንሱ ኸአ ነዛ እትርእያ ዘሎኻ ምድሪ ኼረትዮም እዩ እሞ፡ ንእኡ ኣዝዞ ኣጽንዓዮ ኣትብዓዮውን።

²⁹ኣብቲ ኣብ መንጽር ቤትጴዖር ዘሎ ለሰ ድማ ጸናሕና።