Read መ/ቅዱስ ትግርኛ, Tigrigna Bible, 1997 ኦሪት ዘዳግም 30 Bible Online

ኦሪት ዘዳግም 30 - መ/ቅዱስ ትግርኛ, Tigrigna Bible, 1997 bible

ኦሪት ዘዳግም 30

¹ኪኸውን ድማ እዩ፡ እዚ ኹሉ ነገር ኣብ ቅድሜኻ ዘንበርኩልካ በረኸትን መርገምን ምስ መጸካ፡ ኣብቶም እግዚኣብሄር ኣምላኽካ ፋሕ ዘበለካ ኹሎም ህዝብታት ዃንካ ከአ፡ ናብ ልብኻ ተመሊስካ እንተ ሐሰብካዮ፡

²ከምዚ ሎሚ ኣነ ዝእዝዘካ ዘሎኹ ኹሉ፡ ንስኻን ደቅኻን ብኹሉ ልብኻን ብኹሉ ነፍስኻን ናብ እግዚኣብሄር ኣምላኽካ እንተ ተመለስካ፡ ቃሉ ድማ እንተ ሰማዕካ፡

³ሽዑ እግዚኣብሄር ኣምላኽካ ምርኮኻ ይመልስ፡ ይድንግጸልካ ኸአ፡ ካብቶም ናባታቶም ፋሕ ኣቢሉካ ዘነብረ ኹሎም ህዝብታት ከአ እግዚኣብሄር ኣምላኽካ መሊሱ ኸአ ክበካ እዩ።

⁴እቶም ስጉጓትካ ኽሳዕ ወሰን ሰማይ እኳ እንተ በጽሑ፡ እግዚኣብሄር ኣምላኽካስ ካብኡ ኺእክበካ፡ ካብኡውን ኬምጽኣካ እዩ።

⁵እግዚኣብሄር ኣምላኽካ ድማ ናብታ ኣቦታትካ ዝወርስዋ ምድሪ ኼእትወካ እዩ፡ ንስኻ ኸአ ክትወርሳ ኢኻ እሞ፡ ንሱ ኼጸብቐልካ፡ ካብ ኣቦታትካ ድማ ኬብዝሓካ እዩ።

⁶ንእግዚኣብሄር ኣምላኽካ ብኹሉ ልብኻን ብኹሉ ነፍስኻን ምእንቲ ኸተፍቅሮ እሞ ብህይወት ክትነብርሲ፡ እግዚኣብሄር ኣምላኽካ ልብኻን ልቢ ዘርእኻን ኪገዝር እዩ።

⁷እዚ ኹሉ መርገም እዚ ድማ እግዚኣብሄር ኣምላኻካ ናብ ጸላእትኻን ናብቶም ዚጸልኡኻን ዚሰጉኻን ኪገብሮ እዩ።

⁸ንስኻ ድማ ተመሊስካ ንቓል እግዚኣብሄር ትሰምዖ፡ ነዚ ኣነ ሎሚ ዝእዝዘካ ዘሎኹ ኹሉ ትእዛዛቱ ኸአ ትገብሮ።

⁹ቃል እግዚኣብሄር ኣምላኽካ እንተ ሰማዕካ፡ ኣብ መጽሓፍ እዚ ሕጊ እዚ እተጻሕፈ ትእዛዛቱን ሕጋጋቱን ከአ እንተ ሓሎኻ፡ ናብ እግዚኣብሄር ኣምላኽካ ድማ ብኹሉ ልብኻን ብኹሉ ነፍስኻን እንተ ተመለስካ፡ እግዚኣብሄር ከምቲ በቦታትካ ተሓጎስዎ ዝነበረ፡ መሊሱ ንኣኻ ጽቡቕ ብምግባር ኪሕጎስ እዩ ኣሞ፡ እግዚኣብሄር ብኹሉ ተግባር ኢድካን ብፍረ ኸርስኻን ብፍረ ማልካን ብፍረ ምድርኻን ኪመልኣካ እዩ።

¹⁰ቃል እግዚኣብሄር ኣምላኽካ እንተ ሰማዕካ፡ ኣብ መጽሓፍ እዚ ሕጊ እዚ እተጻሕፈ ትእዛዛቱን ሕጋጋቱን ከአ እንተ ሓሎኻ፡ ናብ እግዚኣብሄር ኣምላኽካ ድማ ብኹሉ ልብኻን ብኹሉ ነፍስኻን እንተ ተመለስካ፡ እግዚኣብሄር ከምቲ በቦታትካ ተሓጎስዎ ዝነበረ፡ መሊሱ ንኣኻ ጽቡቕ ብምግባር ኪሕጎስ እዩ ኣሞ፡ እግዚኣብሄር ብኹሉ ተግባር ኢድካን ብፍረ ኸርስኻን ብፍረ ማልካን ብፍረ ምድርኻን ኪመልኣካ እዩ።

¹¹እዚ ኣነ ሎሚ ዝእዝዘካ ዘሎኹ ትእዛዛት፡ ንኣኻ ኣዝዩ ዚሽግርን ካባኻ ዝረሐቐን ኣይኮነን እሞ፡

¹²ናብ ሰማይ ዚድይበልናን ዜምጽኣልናን፡ ክንገብሮ ኸአ ዜስምዓና መን እዩ፡ ከይትብል፡ ኣብ ሰማይ ኣይኮነን።

¹³ባሕሪ ዚሳገረልናን ዜምጽኣልናን ክንገብሮ ኸአ ዜስምዓና እሞ መን እዩ፡ ከይትብል ድማ፡ ኣብ ስግር ባሕሪ ኣይኮነን።

¹⁴እቲ ቓል፡ ምእንቲ ኽትገብሮስ፡ ኣብ ኣፍካን ኣብ ልብኻን ኣዝዩ ቐረባኻ እዩ፡

¹⁵ርኤ፡ ሎሚ ህይወትን ጽቡቕን፡ ሞትን ክፉእን ኣብ ቅድሜኻ ኣንቢረልካ ኣሎኹ።

¹⁶ብህይወት ምእንቱ ኽትነብርን ክትበዝሕን፡ ኣብታ ኽትወርሳ እትኣትዋ ዘሎኻ ሃገር፡ እግዚኣብሄር ኣምላኽካ ምእንቲ ኺባርኸካ ድማ፡ ንእግዚኣብሄር ኣምላኽካ ኸተፍቅሮ፡ ብመገዱ ኸአ ክትከይድ፡ ትእዛዛቱን ሕጋጋቱን ፍርድታቱን ድማ ክትሕሉ፡ ኣነ ሎሚ እእዝዘካ ኣሎኹ።

¹⁷ግናኸ ልብኻ ንድሕሪት እንተ ተመልሰ እሞ እንተ ዘይሰማዕካ፡ ንኻልኦት ኣማልኽቲ ኽትሰግድ ከአ እንተ ተስሓብካን እንተ ኣምለኽካዮምን፡

¹⁸ብርግጽ ከም እትጠፍኡ፡ ኣነ ሎሚ እምስክረልኩም ኣሎኹ። ኣብታ ኽትወርሳ ዮርዳኖስ ተሳጊርካ እትአትዋ ምድሪ መዓልትታትኩም ኣይተንውሑን።

¹⁹ህይወት ሞትን፡ በረኸትን መርገምን ኣብ ቅድሜኻ ኣንቢረልካ ኸም ዘሎኹ፡ ኣባኻ ንምስክር ሎሚ ሰማይን ምድርን ጸዊዔ ኣሎኹ። እምበኣርሲ ንስኻን ዘርእኻን ብህይወት ምእንቲ ኽትነብር፡ ህይወት ሕረ።

²⁰ንሱ ህይወትካን ምናሕ ዕድሜኻን እዩ እሞ፡ ኣብታ እግዚኣብሄር ነቦኣታትካ፡ ንኣብርሃምን ንይስሃቅን ንያእቆብን፡ ኪህቦም ዝመሓለሎም ምድሪ ኽትነብርሲ፡ ንእግዚኣብሄር ኣምላኽካ ኣፍቅሮ፡ ቃሉ ድማ ስማዕ ናብኡውን ልገብ።