Read መ/ቅዱስ ትግርኛ, Tigrigna Bible, 1997 መጽሓፍ መሣፍንት 12 Bible Online

መጽሓፍ መሣፍንት 12 - መ/ቅዱስ ትግርኛ, Tigrigna Bible, 1997 bible

መጽሓፍ መሣፍንት 12

¹ሰብ ኤፍሬም ድማ ተአኪቦም ናብ ሰሜን ሐለፉ። ንይፍታሕ ከአ፡ እቲ ምስ ደቂ ዓሞን ክትዋጋእ ክትሐልፍ ከሎኻስ፡ ምሳኻ ክንከይድ ንኣና ዘይጸዋዕካና፡ ስለምንታይ ኢኻ፡ ቤትካ ኣብ ልዕሌኻ ብሓዊ ኽነድ ኢና፡ በልዎ።

²ይፍታሕ ድማ፡ ኣነን ህዝበይን ምስ ደቂ ዓሞን ኣብ ብርቱዕ ምጽራር ከሎና፡ ምስ ጸዋዕኩኹም ከአ፡ ካብ ኢዶም ኣየድሐንኩምንን።

³ከም ዘይተድሕኑኒ ምስ ርኤኹ ድማ፡ ንነፍሰይ ኣብ ኢደይ ገይረያ፡ ናብ ደቂ ዓሞን ሐለፍኩ፡ እግዚኣብሄር ከአ ንኣታቶም ኣብ ኢደይ ሀበኒ። ስለምንታይከ ሎሚ ኽትዋግኡኒ ደየብኩም በሎም።

⁴ይፍታሕ ድማ ንኹሎም ሰብ ጊልዓድ ኣኽቲቱ ምስ ኤፍሬም ተዋግኤ። ንሳቶም ከአ፡ ኣቱም ሰብ ጊልዓድ፡ ካብ ኤፍሬም ሀዲምኩም ኣብ ማእከል ኤፍሬምን ኣብ ማእከል ምናሴን ኢኹም ይብልዎም ነበሩ፡ እሞ፡ እቶም ሰብ ጊልዓድ ንሰብ ኤፍሬም ሰዐርዎም።

⁵እቶም ጊልዓዳውያን ድማ ንኤፍሬማውያን መሳገሪታት ዮርዳኖስ ሐዙሎም። ኮነ ኸአ፡ ካብቶም ህዱማት ኤፍሬም፡ ኣሕልፋኒ፡ ምስ በሎም፡ እቶም ሰብ ጊልዓድ ድማ፡ ኢፍሬማዊ ዲኻ በልዎ። ንሱ ኸአ ኣይፋለይን፡ እንተ በለ፡

⁶ንሳቶም ድማ፡ እስኪ ሺቦለት በል በልዎ። ንሱ ኸአ ከምኡ ኣቕኒዑ ምዝራብ ስለ ዘይከአለ፡ ሲቦለት በለ። ሽዑ ሒዞም ኣብ መሳገሪታት ዮርዳኖስ ሐረድዎ፡ በታ ጊዜ እቲኣ ኻብ ኤፍሬም ኣርብዓን ክልተን ሽሕ ወደቑ።

⁷ይፍታሕ ድማ ንእስራኤል ሹዱሽተ ዓመት ፈረደ። ድሕርቲ ይፍታሕ ጊልዓዳዊ ሞተ፡ ኣብ ሓንቲ ኻብ ከተማታት ጊልዓድ ከአ ተቐብረ።

⁸ድሕሪኡ ኸአ ኣብጻን ብዓል ቤትልሄም ንእስራኤል ፈረደ።

⁹ንሱ ሰላሳ ኣወዳት ነበርዎ፡ ሰላሳ ኣዋልድ ንግዳም ኣመርዐወ፡ ነወዳቱ ድማ፡ ሰላሳ ኣዋልድ ካብ ግዳም ኣእተውሎም፡ ንእስራኤል ከአ ሾብዓተ ዓመት ፈረደ።

¹⁰ኢብጻን ድማ ሞተ፡ ኣብ ቤትልሄም ከአ ተቐብረ።

¹¹ብድሕሪኡ ኸአ ኤሎን ዛብሎናዊ ንእስራኤል ፈረደ፡ ንእስራኤል ዓሰርተ ዓመት ፈረደ።

¹²ኤሎን ዛብሎናዊ ድማ ሞተ፡ ኣብ ኣያሎን ኣብ ምድሪ ዛብሎን ተቐብረ።

¹³ድሕሪኡ ድማ ዕብዶን፡ ወዲ ሂሌል ጲርዓቶናዊ፡ ንእስራኤል ፈረደ።

¹⁴ንሱ ኸአ ሰብዓ ገልገል ኣድጊ ዚውጥሑ ኣርብዓ ደቅን ሰላሳ ደቂ ደቅን ነበርዎ። ንእስራኤል ድማ ሾሞንተ ዓመት ፈረደ።

¹⁵ዓብዶን፡ ወዲ ሂሌል ጲርዓቶናዊ፡ ከአ ሞተ፡ ኣብ ጴርዓቶን ምድሪ ኤፍሬም፡ ኣብ ከረን ኣማሊቃውያን ከአ ተቐብረ።