Read መ/ቅዱስ ትግርኛ, Tigrigna Bible, 1997 መጽሓፍ መሣፍንት 6 Bible Online

መጽሓፍ መሣፍንት 6 - መ/ቅዱስ ትግርኛ, Tigrigna Bible, 1997 bible

መጽሓፍ መሣፍንት 6

¹ደቂ እስራኤል ድማ ኣብ ቅድሚ እግዚኣብሄር ክፉእ ገበሩ። እግዚኣብሄር ከአ ሾብዓተ ዓመት ናብ ኢድ ሚድያን ኣሕሊፉ ሀቦም።

²ኢድ ሚድያን ድማ ኣብ እስራኤል በርትዔት፡ ደቂ እስራኤል ከአ ብሰሪ ሚድያን እቲ ኣብ ኣኽራን ዘሎ ጎዳጉድን በዓትታትን እምባታትን ገበሩ።

³ኮነ ድማ፡ እስራኤል ምስ ዘርኤ፡ ምድያናውያንን ኣማሌቃውያንን ደቂ ምብራቕን ደየቡ፡ ናብኦም ደየብዎም።

⁴ኣብኦም ሰፊሮም፡ ክሳዕ እቲ ንጋዛ ዜእቱ ፍረ እታ ምድሪ ኣጥፍኡ፡ ገለ ምግቢ ኾነ፡ በጊዕ ኮነት፡ ብዕራይ ኮነ፡ ኣድጊ ኾነ ኣብ እስራኤል ኣይሕደጎን።

⁵ንሳቶም ምስ ከብቶምን ድንኳውንቶምን ደየቡ፡ ምብዛሖም ከአ ኣንበጣ ኾይኖም መጹ። ንሳቶምን ኣግማሎምን ቁጽሪ ዜብሎም ነበሩ እሞ፡ ኬጥፍእዋ ናብታ ሃገር ኣተው።

⁶እስራኤል ብሚድያን ብዙሕ ተሸገረ፡ ደቂ እስራኤል ከአ ናብ እግዚእብሄር ተማህለሉ።

⁷ኾነ ኸአ ደቂ እስራኤል ብሰሪ ሚድያን ናብ እግዚኣብሄር ምስ ተማህለሉ፡

⁸እግዚኣብሄር ንደቂ እስራኤል ሓደ ነብዩ ሰደደሎም። ንሱ ድማ፡ እግዚእብሄር ኣምላኽ እስራኤል ከምዚ ይብል፡ በሎም፡ ኣነ ኻብ ግብጺ ኣደየብኩኹም: ካብ ቤት ባርነት ኣውጻእኩኹም፡

⁹ካብ ኢድ ግብጻውያንን ካብ ኢድ ኹሎም መጥቃዕትኹምን ኣድሓንኩኹም፡ ንኣታቶም ካብ ቅድሜኹም ሰጉጎ ምድሮም ሀብኩኹም።

¹⁰ኣነ እግዚኣብሄር ኣምላኽኩም እየ፡ ንኣማልኽቲ ኣቶም ንስኻትኩም ኣብ ሃገሮም ተቐሚጥኩም ዘሎኹም ኣሞራውያን ኣይትፍርህዎም፡ ድማ በልኩኹም። ግናኸ ቃለይ ኣይሰማዕኩምን።

¹¹መልኣኽ እግዚኣብሄር ድማ መጺኡ ኣብ ናይ ዮኣስ ኣቢዔዝራዊ፡ ኣብ ዖፍራ ዘላ ድዋ ተቐመጠ። ወዱ ጊዴዎን ካብ ሚድያናውያን ኪሓብእ፡ ስርናይ ኣብ መጽሙቑ ወይኒ ይዘብጥ ነበረ።

¹²ብእኡ ድማ መልኣኽ እግዚኣብሄር ተራእዩ፡ ኣታ ሓያል ጅግና እግዚኣብሄር ምሳኻ እዩ፡ ከአ በሎ።

¹³ጊደዎን ድማ፡ ኣየ ጐይታይ እግዚኣብሄር ምሳና እንተልዩ ደአ እዚ ኹሉ ስለምንታይ ረኸበና፡ እቲ ኣቦታትና፡ እግዚኣብሄር ካብ ግብጺ ኣደይቡናዶ ኣይኮነን፡ ኢሎም ዝነገሩና ኹሉ ተኣምራቱኸ ኣበይ ኣሎ፡ ሕጊ ግና እግዚኣብሄር ሓዲጉናስ፡ ኣብ ኢድ ሚድያን እኳ ኣሕሊፉ ሂቡና በሎ።

¹⁴ንሱ ድማ፡ ኣየ ጐይታይ፡ እንሆ ዓሌተይ ካብ ምናሴ እቲ ድኻ እዩ፡ ኣነ ኸአ ኣብ ቤት ኣቦይ እቲ ንእሽቶ እየ፡ ንእስራኤል ደአ ብምንታይ ከድሕኖ እየ፡ በሎ።

¹⁵ንሱ ድማ፡ ኣየ ጐይታይ፡ እንሆ ዓሌተይ ካብ ምናሴ እቲ ድኻ እዩ፡ ኣነ ኸአ ኣብ ቤት ኣቦይ እቲ ንእሽቶ እየ፡ ንእስራኤል ደአ ብምንታይ ከድሕኖ እየ፡ በሎ።

¹⁶እግዚኣብሄር ከአ፡ ኣነ ምሳኻ ክኸውን እየ እሞ፡ ንሚድያናውያን ከም ንሓደ ሰብኣይ ክትወቕዖም ኢኻ በሎ።

¹⁷ንሱ ኸአ፡ ኣብ ቅድሜኻ ሞጎስ እንተ ደአ ረኺበስ፡ እትዛረበኒ ዘሎኻ ንስኻ ኸም ዝኾንካ ምልክት ሀበኒ፡

¹⁸መስዋእተይ ኣውጺኤ፡ ናባኻ መጺኤ ኣብ ቅድሜኻ ኽሳዕ ዘቕርበልካስ፡ በጃኻ ካብዚ ኣይትኺድ በሎ። ንሱ ድማ፡ ክሳዕ እትምለስ ክጸንሓካ እየ በሎ።

¹⁹ሽዑ ጊደዎን ኣትዩ ሓደ ማሕስእን ሓደ ኤፋ ሓርጭ ቅጫ ሰንኪቱ ኣዳለወ። ነቲ ስጋ ኣብ ሰፍኢ፡ ነቲ መረቕውን ኣብ ቁራዕ ገበሮ። ኣብ ትሕቲ ድዋ ኣውጺኡ ድማ ናብኡ ኣቕረበሉ።

²⁰እቲ መልኣኽ ኣምላኽ ከአ፡ ነቲ ስጋን ነቲ ቕጫን ኣብዚ ኸውሒ እዚ ኣንብሮ ነቲ መረቕውን ኣፍስሶ፡ በሎ። ከምኡ ድማ ገበረ።

²¹ሽዑ እቲ መልኣኽ እግዚኣብሄር ጫፍ እታ ኣብ ኢዱ ዝነበረት ዘንጊ ሰዲዱ ነቲ ስጋን ቅጫን ተንከዮ እሞ ሓዊ ኻብቲ ኸውሒ ወጺኡ፡ ነቲ ስጋን ቅጫን በልዖ፡ እቲ መልኣኽ እግዚኣብሄር ድማ ካብ ኣዒንቱ ተሰወረ።

²²ሽዑ ጊደዎን ንሱ መልኣኽ እግዚኣብሄር ከም ዝኾነ ረአየ። ጊዴዎን ከአ፡ ወይለይ እግዚኣብሄር ኣምላኽ፡ ንመልኣኽ እግዚኣብሄር ገጽ ንገጽ ርእየዮ በለ።

²³እግዚኣብሄር ድማ፡ ሰላም ንኣኻ ይኹን፡ ኣይትፍራህ፡ ኣይትመውትን ኢኻ በሎ።

²⁴ሽዑ ጊዴዎን ኣብኡ ንእግዚኣብሄር መሰውኢ ሰርሔ፡ እግዚኣብሄር ሰላም፡ ኢሉ ኸአ ሰመዮ። ንሱ ድማ ክሳዕ ሎሚ ኣብቲ ናይ ኣቢዔዝራውያን ዖፍራ ኣሎ።

²⁵ኮነ ኸአ፡ በታ ለይቲ እቲኣ እግዚኣብሄር በሎ፡ ናይ ኣቦኻ ኣርሓ እቲ ኻልኦት ሾብዓተ ዓመት ዝገበረ ኣርሓ፡ ውሰድ፡ ነቲ ናይ ኣቦኻ መሰውኢ በዓል ኣፍርሶ፡ ነቲ ኣብ ጥቓኡ ዘሎ ኣስታርተ ኸአ ቆረዞ።

²⁶ኣብ ልዕሊ እዚ ኸውሒ እዚ ድማ ንእግዚኣብሄር ኣምላኽካ መሰውኢ ኸም ስርዓቱ ጌርካ ስራሕ፡ ነቲ ኻልኣይ ኣርሓ ኸአ በቲ እትቖርጾ ኣስታርተ ጌርካ ዚሓርር መስዋእቲ ኣዕርጎ።

²⁷ሽዑ ጊዴዎን ካብ ገላውኡ ዓሰርተ ሰብ ወሲዱ ኸምቲ እግዚኣብሄር ዝበሎ ገበረ። ኮነ ኸአ፡ ብመዓልቲ ኸይገብሮስ ንቤት ኣቦኡን ንሰብ እታ ኸተማን ስለ ዝፈርሄ፡ ብለይቲ ገበሮ።

²⁸ንስብሒቱ ሰብ እታ ኸተማ ኣንጊሆም ምስ ተንስኡ፡ እንሆ መሰውኢ በዓል ፈሪሱ፡ እቲ ኣብ ጥቓኡ ዝነበረ ኣስታርተ ኸአ ተቖሪጹ፡ እቲ ኻልኣይ ኣርሓውን ኣብቲ ተሰሪሑ ዝነበረ መሰውኢ ተሰዊኡ ነበረ።

²⁹ንሓድሕዶም ድማ፡ እዚ ነገር እዚ መን ገበሮ፡ ተባሃሃሉ፡ ሓቲቶም መርሚሮን ድማ እዚ ነገር እዚ ጊዴዎን ወዲ ዮኣስ እዩ ዝገበሮ በሎ።

³⁰ሽዑ ሰብ እታ ኸተማ ንዮኣስ፡ ወድኻ መሰውኢ በዓል ኣፍሪሱ፡ ነቲ ኣብ ጥቓኡ ዝነበረ ኣስታርተ ድማ ቖሪጹ እዩ እሞ፡ ኪመውት ኣውጽኣዮ በልዎ።

³¹ዮኣስ ከአ ነቶም ኪቃወምዎም ዝተንስኡ ኹሎም፡ ንበዓልዶ ኽትጣበቑሉ ኢኹም ወይስ ከተድሕንዎዶ ደሊኹም እቲ ኺጣበቐሉ ዚደሊ፡ ምድሪ ኸይወግሔት ይሙት፡ ንሱ ኣምላኽ እንተ ኾይኑስ ነቲ መሰውኢኡ ዘፍረሰሉ ባዕሉ ይማጎቶ በሎም።

³²ስለዚ በታ መዓልቲ እቲኣ፡ በዓል ነቲ መሰውኢኡ ዘፍረሰሉ ባዕሉ ይማጎቶ፡ ኢሉ የሩብበዓል ሰመዮ።

³³ሽዑ ኹሎም ሚድያናውያንን ኣማሌቃውያንን ደቂ ምብራቕን ብሓደ ተአከቡ፡ ተሳጊሮም ድማ ኣብ ለሰ ይዝርኤል ሰፈሩ።

³⁴ንጊደዎን ከአ መንፈስ እግዚኣብሄር ወረዶ። ንሱ መለኸት ነፍሔ፡ ኣቢዔዝራውያን ከአ ተአኪቦም ሰዐብዎ።

³⁵ናብ ብዘሎ ምናሴ ድማ ልኡኻት ሰደደ፡ ንሳቶም ከአ ከቲቶም ሰዐብዎ። ናብ ኣሴርን ዛብሎንን ንፍታሌምን ድማ ልኡኻት ሰደደ፡ ንሳቶምውን ኪቕበልዎም ደየቡ።

³⁶ጊዴዎን ድማ ንኣምላኽ፡ ከምቲ እተዛረብካዮ ንእስራኤል ብኢደይ ተድሕኖ እንተ ኾንካስ፡

³⁷እንሂ፡ ኣነ እዚ ቁረጽ ጸምሪ እዚ ኣብ ዓውዲ እኔብር ኣሎኹ። ኩላ ምድሪ ንቕጽቲ ኸአ ኣብዚ ጸምሪ ጥራይ ዛዕዝዓ እንተ ኾነ፡ ሽዑ ኸምቲ እተዛረብካዮ፡ ንእስራኤል ብኢደይ ከም እተድሕኖ እፈልጥ በሎ።

³⁸ከምኡ ድማ ኾነ። ንጽብሒቱ ኣንጊሁ ተንሲኡ፡ ነቲ ጸምሪ ጸመቔ፡ ካብቲ ጸምሪ ኸአ ሒላብ ምሉእ ማይ ኣውጽኤ።

³⁹ጊዴዎን ድማ ንኣምላኽ ሓንሳእ ጥርይ ክዛረብ፡ ቁጥዓኻ ኣባይ ኣይንደድ፡ በቲ ጸምሪ ሓንሳእ ጥራይ ክፍትን በጃኻ። እምባአርሲ እቲ ጸምሪ ጥራይ ንቑጽ፡ ኣብ ብዘላ ምድሪ ድማ ዛዕዝዓ ይኹን በሎ።

⁴⁰ኣምላኽ ድማ በታ ለይቲ እቲኣ ኸምኡ ገበረ፡ እቲ ጸምሪ ጥራይ ንቑጽ ከሎ ኣብ ብዘላ ምድሪ ዛዕዝዓ ኾነ።