Read መ/ቅዱስ ትግርኛ, Tigrigna Bible, 1997 1ይ መጽሓፍ ሳሙኤል 24 Bible Online

1ይ መጽሓፍ ሳሙኤል 24 - መ/ቅዱስ ትግርኛ, Tigrigna Bible, 1997 bible

1ይ መጽሓፍ ሳሙኤል 24

¹ዳዊት ድማ ካብኡ ደዪቡ ኣብ ጽኑዕ ቦታታት ዔገገዲ ተቐመጠ።

²ኰነ ኸኣ፡ ሳኦል ደድሕሪ ፍልስጥኤማውያን ካብ ምስዓብ ምስ ተመልሰ፡ እንሆ፡ ዳዊት ኣብ በረኻ ዔንገዲ ኣሎ፡ ኢሎም ነገርዎ።

³ሽዑ ሳኦል፡ ካብ ብዘሎ እስራኤል እተሐርዩ ሰለስተ ሽሕ ሰብኣይ ወሲዱ፡ ንዳዊትን ሰቡን ኣብ ኣኻውሕ ጤለበዱ፡ ኺደልዮም ከደ።

⁴ናብቲ ጥቓ መገዲ ዝነበረ ደምቤታት ኣባጊዕ ድማ መጸ፡ ኣብኡ ኸኣ በዓቲ ነበረ፡ ሳኦል ድማ እግሩ ኪኸድን ኣተው። ዳዊትን ሰቡን ከኣ ኣብ ውሽጢ እቲ በዓቲ ተቐሚጦም ነበሩ።

⁵ሽዑ እቶም ሰብ ዳዊት፡ እታ እግዝኣብሄር፡ ነቲ ጸላኢኻ ጽቡቕ ኰይኑ እተራእየካ ኽትገብሮስ፡ እንሆ፡ ኣነ ኣብ ኢድካ ኽህበካ እየ፡ ዝበለካ መዓልቲ እንሃ፡ ሎሚ እያ፡ በልዎ። ዳዊት ድማ ተንሲኡ ቐስ ኢሉ ጫፍ ክዳን ሳኦል ቈረጸ።

⁶ድሕርዚ ግና፡ ጫፍ ክዳን ሳኦል ስለ ዝቘረጸ፡ ንዳዊት ልቡ ወቕዖ።

⁷ንሰቡ ድማ፡ ንሱ ቕቡእ እግዚኣብሄር እዩ እሞ፡ ንጐይታይ፡ ነቲ ቕቡእ እግዚኣብሄር፡ ኢደይ ናብኡ ዘርጊሔ እዚ ምግባርሲ እግዚኣብሄር ካባይ የርሕቆ፡ በሎም።

⁸ዳዊት ነቶም ሰቡ ብዘረባኡ ዐገቶም፡ ኣብ ሳኦል ኪትንስኡ ድማ ኣይፈቐደሎምን። ሳኦል ከኣ ካብቲ በዓቲ ተንሲኡ መገዱ ኸደ።

⁹ድሕርዚ ዳዊት ተንሲኡ ኻብቲ በዓቲ ወጸ፡ ዎ ጐይታይ ንጉስ፡ ኢሉ ኸኣ ደድሕሪ ሳኦል ጸውዔ። ሳኦል ድማ ንድሕሪኡ ግልጽ በለ እሞ፡ ዳዊት ብገጹ ናብ ምድሪ ተደፊኡ ፍግም በለ።

¹⁰ዳዊት ድማ ንሳኦል በሎ፡ ስለምንታይ ኢኻ ዘረባ እቶም፡ እንሆ፡ ዳዊት ንክፋእካ እዩ ዚደሊ፡ ዚብሉኻ ሰባት እትሰምዕ

¹¹እግዚኣብሄር ሎሚ ኣብቲ በዓቲ ንኣኻ ኣብ ኢደይ ኣሕሊፉ ኸም ዝሀበኒ፡ ሎሚ መዓልቲ ኣዒንትኻ ርእየን እየን። ክቐትለካ ድማ መኸሩኒ። ኣነ ግና፡ ንሱ ቕቡእ እግዚኣብሄር እዩ እሞ፡ ኢደይ ናብ ጐይታይ ኣይዝርግሕን ኢለ ነሐፍኩኻ።

¹²ኣቦየ፡ ርኤ፡ እወ፡ እቲ ጫፍ ክዳንካ ኣብ ኢደይ ከም ዘሎ፡ ርኤ፡ ጫፍ ክዳንካ ክቘርጽ ከሎኹ፡ ንኣኻ ብዘይ ምቕታለይ ኣብ ኢደይ ክፍኣት ኰነ፡ በደል ኰነ ኸም ዜልቦ ፍለጥን ርኤን። ንስኻ ኸኣ ንነፍሰይ ክትወስድ እትደሊ ኽነስኻስ፡ ኣባኻ ኣይሓጣእኩን።

¹³እግዚኣብሄር ኣብ መንጎይን ኣብ መንጎኻን ይፍረድ፡ እግዚኣብሄር ድማ ንኣኻ ሕነ ይፍደየለይ፡ ኢደይ ግና ኣባኻ ኣይትኸውንን እያ።

¹⁴ከምቲ ምስላ እቶም ቀዳሞት፡ ክፋእ ካብቶም ክፋኣት ይወጽእ፡ ዚብሎ እዩ። ኢደይ ግና ኣባኻ ኣይትኸውንን እያ።

¹⁵ንጉስ እስራኤል ደድሕሪ መን እዩ ወጺኡ ዘሎ ንመንከ ኢኻ ንስኻ እትሰጎ ዘሎኻ ንምውት ከልቢ፡ ንሓደ ቘንጪ።

¹⁶ስለዚ እግዚኣብሄር ዳኛ ዀይኑ ኣብ መንጎይን ኣብ መንጎኻን ይፍረድ፡ ንሱ ኸኣ ርእዩ ንነገረይ ይከላኸለለይ፡ ፈሪዱ ድማ ካብ ኢድካ የድሕነኒ።

¹⁷ኰነ ኸኣ፡ ዳዊት እዚ ዘረባ እዚ ንሳኦል ተዛሪቡ ምስ ወድኤ፡ ሳኦል፡ እዚ ቓል እዚ ቓልካ ድዩ ወደይ ዳዊት ኢሉ ድማ፡ ሳኦል ዓው ኢሉ በኸየ።

¹⁸ንዳዊት ከኣ በሎ፡ ኣነ ኽፋእ እናገበርኩኻ፡ ጽቡቕ ጌርካለይ ኢኻ እሞ፡ ካባይሲ ንስኻ ትጸድቕ።

¹⁹እግዚኣብሄር ኣብ ኢድካ ኣሕሊፉኒ ኽነሱስ፡ንኣይ ብዘይ ምቕታልካ ንስኻ ጽቡቕ ከም ዝገበርካለይ፡ ሎሚ ኣርኤኻ።

²⁰ሰብ ንጸላኡኢ ምስ ዚረኽቦስ፡ ብደሓንዶ መገዱ ይሰዶ ስለዚ ሎሚ ዝገበርካለይ እግዚኣብሄር ጽቡቕ ይፍዴኻ።

²¹ሕጂ ኸኣ እንሆ፡ ንስኻ ብርግጽ ከም እትነግስ፡ እታ መንግስቲ እስራኤል ድማ ኣብ ኢድካ ኸም እትቐውም፡ እፈልጥ ኣሎኹ።

²²ሕጂ ኸኣ፡ ብድሕረይ ንዘርኤይ ከይተጽንቶ፡ ንስመይውን ካብ ቤት ኣቦይ ከይተጥፍኦ፡ ብእግዚኣብሄር ምሐለለይ።

²³ዳዊት ድማ ንሳኦል መሐለሉ። ሽዑ ሳኦል ናብ ቤቱ ኸደ፡ ዳዊትን ሰቡን ግና ናብ እምባ ደየቡ።