Read Timugon Murut KASAUKAN 1 Bible Online

KASAUKAN 1 - Timugon Murut bible

KASAUKAN 1

¹Paat ra talimpuun i paat ri Aki Kapuuno' napasauk ra limbowon am namingkal ra tana' ti.[1]

²Ginio ra tana' ti kalo poyo naindon am kolondo' ra atan ayuk pana; nangiatan ayuk koson nanaub ra raat ti am Ambiluo ri Aki Kapuuno'[2] sisiab ra ralimbou ru timug.

³Indagu i Aki Kapuuno', “Kasauk no sinda.” Sinda ti pana nasauk.

⁴Maansayan kaga' i Aki Kapuuno' magilong ra baal raginio am pantuliaro' No boo sinda intor ra molondom.

⁵Inggalani' No sinda no “matawang” am molondom no “rondom”. Kopongo molondom, masauk boo susuab. Ginio noyo orou ondo' kasaa'.

⁶Indagu boo i Aki Kapuuno', “Kasauk noyo pambakuran koson mapasuai ra timug ra ruo intok.” Baal raginio pana nasauk. Ginio noyo i Aki Kapuuno' napasauk ra pambakuran koson napatayar ra timug ondo' mokoondo' ra ragana' ru pambakuran intor ra timug ondo' mokoondo' ra rasawat no.

⁸Inggalani' No pambakuran no “limbowon”. Kopongo molondom, masauk boo susuab. Ginio noyo orou ondo' karuo.

⁹Indagu boo i Aki Kapuuno', “Moonsoi ru timug ondo' mokoondo' ra ragana' ru limbowon tumilis ra rondo' intok saboi tana' ti makito ra mapua'.” Baal raginio pana nasauk.

¹⁰Inggalani' No tana' mapua' no “lantur” am inggalani' No tayar ru timug no “raat”. Maansayan kaga' i Aki Kapuuno' magilong ra baal raginio.

¹¹Indagu poyo i Aki Kapuuno', “Moonsoi ru tana' ti mapatuu' ra nansalinut tutuu' ioginio tutuu' ondo' mapaingkual ra ampos ru kinawa'.” Baal raginio pana nasauk.

¹²Intor raginio tana' ti makaampos ra nansalinut tutuu'. Maansayan kaga' i Aki Kapuuno' magilong ra baal raginio.

¹³Kopongo molondom, masauk boo susuab. Ginio noyo orou ondo' katalu.

¹⁴Indagu boo i Aki Kapuuno', “Moonsoi ru makasinda sumalula' intor ra limbowon koson mapatawang ra tana' ti, koson mapatuliar ra matawang intor ra molondom am niayuk koson mapakito ra nasuku' noyo talimpuunan paat ru orou, bilor am orou pangiantakan ru ugama.”[3] Baal raginio pana nasauk.

¹⁶Ginio noyo i Aki Kapuuno' napasauk ra ruo sinda ondo' maayo iono mato ru orou koson manguasa' ra matawang am bulan koson manguasa' ra rondom; Io niayuk napasauk ra butitin.

¹⁷Pinaayan No ginilo ra limbowon koson mapatawang ra tana' ti,

¹⁸iono koson manguasa' ra matawang am rondom am niayuk mapatuliar ra sinda intor ra molondom. Maansayan kaga' i Aki Kapuuno' magilong ra baal raginio.

¹⁹Kopongo molondom, masauk boo susuab. Ginio noyo orou ondo' kaapat.

²⁰Indagu boo i Aki Kapuuno', “Moonsoi ru timug ti mototop ra nansalinut ondo' maayag am limbowon pana mototop ra nansalinut susuit.”

²¹I Aki Kapuuno' napasauk ra bibiag ondo' mangaayo am ngaangai' nansalinut maayag mayan ralalom ru timug am niayuk ngaangai' susuit. Maansayan kaga' i Aki Kapuuno' magilong ra baal raginio.

²²Barakati' ri Aki Kapuuno' ngaangai' ti am manusub ra ondo' maayag ralalom ru timug mansayat am raat ti pana mototop am susuit sumuang-suang.

²³Kopongo molondom, masauk boo susuab. Ginio noyo orou ondo' kalimo.

²⁴Indagu boo i Aki Kapuuno', “Moonsoi ru tana' ti mapasalula' ra ngaangai' nansalinut bibiag ru lantur ondo' masigo am makaup, maayo kapoam boborok.” Baal raginio pana nasauk.

²⁵Ginio noyo i Aki Kapuuno' nambaal ra ngaangai' no am maansayan kaga' Io magilong ra baal raginio.

²⁶Indagu boo i Aki Kapuuno', “Raino mambaal Takau ra ulun ondo' masauk koson Ritakau am mansalu Ritakau. Ilo manguasa' ra papait, susuit am ngaangai' bibiag ra bokon ondo' masigo am makaup am ondo' boborok am niayuk maayo.”[4]

²⁷ Ginio noyo i Aki Kapuuno' nambaal ra ulun am napasauk risilo koson ra baal Nano galama', sinauk No ilo ungkuyon am ruandu'.

²⁸Barakati' No ilo am indagu, “Paganak kano kasusuang maa' raginio papag mino mayan ra titikop intok ra tana' ti am manguasa'. Akau manguasa' ra ngaangai' papait, susuit am ngaangai' bibiag ondo' masigo.

²⁹Mangani' Aku ramuyun ra akanon ra ngaangai' salinut ru tutuu' ondo' mapasalula' ra unor am kawa';

³⁰Kaa' ngaangai' susuit am bibiag masigo ra bokon no aniin Ku ra sakot am tatanom ra makaraun koson akanon nilo.” Baal raginio pana nasauk.

³¹I Aki Kapuuno' nagilong ra ngaangai' ondo' sinauk Nano am maansayan kaga' Io. Kopongo molondom, masauk boo susuab. Ginio noyo orou ondo' koonom.