Read Timugon Murut KASAUKAN 10 Bible Online

KASAUKAN 10 - Timugon Murut bible

KASAUKAN 10

¹Gitio noyo papag ru anak-anak ungkuyon ri Nuu, iono i Siim, Gam am i Japit. Kopongo rosob no, katatalu nilo makaanak ungkuyon.

²Gitio noyo anak ri Japit, iono i Gomir, Magog, Madai, Jawan, Tubal, Misik am i Tiras.

³Papag ri Gomir, iono ulun Askinas, Ripat am Togarma.

⁴Papag ri Jawan, iono mamagun ru Ilisa, Sipanyol, Siprus am Rodis.

⁵Ilo ti noyo kinamatuaan ru bansa' ondo' minayan ra igig ru nagas am giu' ra pulu'-pulu'. Ngaangai' nilo papag ri Japit. Moonong bansa' namagun ra pagun ru sigagama' am mokoondo' ra ragu nilo galama'.

⁶Anak ungkuyon ri Gam iono i Kus, Misir, Libia am i Kanaan, ilo ti noyo kinamatuaan ru ulun ondo' nampakai ra inggalan nilo.

⁷Papag ri Kus, iono mamagun ru Siba, Gawila, Sabta, Raima am Sabtikga. Papag ri Raima iono mamagun ru Syiba am Didan.

⁸I Kus makaanak ungkuyon ininggalanan ri Nimrod ondo' nasauk ra ulun kasaa' mapanggol kaga' ra tana' ti.

⁹Nabaya' ra indangan ru TUHAN, nasauk io ra sangulun mangngayou ra moonsoi kaga'. Ginio boo ra ulun mindagu, “Gama' ru mapasauk TUHAN rirun ra sangulun mangngayou ra moonsoi kaga' koson ri Nimrod.”

¹⁰Pamarintaan galing ri Nimrod nakaaya' Babil, Irik am Akad. Katatalu no ralalom ru pagun Babilonia.

¹¹Intor ra pagun raginio, minongoi io ra Asyur am pambaal io ra bandar Niniwi, Rigobot-Ir, Kalag,

¹²am Risin ondo' nangkilolot ra Niniwi am Kalag ti rondo' bandar maayo.

¹³Papag ri Misir iono mamagun ru Lidia, Anamim, Ligabim am Naptugim,

¹⁴Patrusim, Kaslugim am Kaptorim ondo' tauli no nasauk ra kinamatuaan ru bansa' ru Palistin.

¹⁵Anak-anak ungkuyon ri Kanaan iono i Sidon ondo' anak katuaan am i Git kinamatuaan ru ulun ondo' namakai ra inggalan nilo.

¹⁶I Kanaan niayuk kinamatuaan ru ulun ru Jibusi, ulun ru Amori am ulun ru Girgasi,

¹⁷ulun ru Giwi, ulun ru Arki, ulun ru Sini,

¹⁸ulun ru Arwadi, ulun ru Simari am ulun ru Gamati. Bansa'-bansa' ru Kanaan siminayat ra masuang intok ra maalur,

¹⁹polos ra balitan ru pagun nilo am sayat poyo intor ra Sidon tampilon rabugus mongoi ra Girar saboi mamaar ra Gaja am tampilon sirangon mongoi ra Sodom, Gomora, Adma am Jiboim saboi mamaar ra Lasa.

²⁰Ilo ngaangai' noyo papag ri Gam. Moonong bansa' namagun ra pagun ru sigagama' am mokoondo' ra ragu nilo galama'.

²¹I Siim ti maayo ri Japit, iono kinamatuaan ru ngaangai' bansa' ru Ibrani.

²²Anak-anak ungkuyon ri Siim iono i Ilam, Asyur, Arpaksad, Lud am i Aram, ilo ti noyo kinamatuaan ru ondo' namakai ra inggalan nilo.

²³Papag ri Aram, iono mamagun ru Us, Gul, Gitir am Mas.

²⁴I Arpaksad ama' ri Sila, am i Sila ama' ri Ibir.

²⁵I Ibir makaanak ungkuyon ruo ngaulun; ondo' kasaa' ininggalanan ri Pilig[25] sabap paat ragili noyo ngaangai' bansa' ru tana' ti natatayar; ondo' karuo ininggalanan ri Joktan.

²⁶Papag ri Joktan mamagun ru Almodad, Silip, Gajar-Mawit, Jirag,

²⁷Gadoram, Ujal, Dikla,

²⁸Obal, Abimail, Syiba,

²⁹Opir, Gawila am Jobab. Ilo ngaangai' ti papag ri Joktan.

³⁰Libung inayanan nilai ti malangka' intor ra Misa saboi ra Sipar, iono libung kagunungan tampilon ra sirangon.

³¹Ilo ngaangai' noyo papag ri Siim. Moonong bansa' namagun ra pagun ru sigagama' am mokoondo' ra ragu nilo galama'.

³²Ngaangai' no papag ri Nuu, rondo'-rondo' bansa' sumugut ra papag nilo sigagama'. Kopongo rosob i, ngaangai' bansa' ru tana' ti intor ra papag ru anak-anak ungkuyon ri Nuu.