Read Timugon Murut KASAUKAN 13 Bible Online

KASAUKAN 13 - Timugon Murut bible

KASAUKAN 13

¹Iruani' ri Abram Misir am ongoi tampilon ralayo, sumuku' ra tampilon rabugus pagun ru Kanaan nabaya' ra andu' nano, ngaangai' longgom nano am minaya' niayuk i Lot riso.

²I Abram ti sangulun langkaya' kaga'. Mokoondo' io ra domba, kambing, sapi', pirok am niayuk mas.

³Io pana nangiruan ra intok raginio am ongoi ra rondo' intok ra bokon sumuku' ra Bitil. Nakasaboi io ra libung lolot ru Bitil am Ai, intok nangkiman nano ragili,

⁴am nambaalan nano ra altar. Ginio noyo intok nano siminamba ra TUHAN.

⁵I Lot pana mokoondo' ra sasambaloi galama', ulipon, domba, kambing am sapi'.

⁶Ginio ra kalo sumama' ilo ra tana' limayak raginio amon ru masimpung ilo, sabap ra makatinambiag ilo ra masuang kaga'.

⁷Kasauk boo pansasangaran ru magagalung ra domba ri Abram am magagalung ra domba ri Lot. (Paat raginio ulun ru Kanaan am ulun ru Piris lakat poyo mayan ra tana' raginio).

⁸Indagu i Abram ri Lot, “Ito ti mabukat, kalo moonsoi amon ru mansasangor ulun-ulun muno am ulun-ulun kuno.

⁹Ginio poyo moonsoi pantuliar to. Pilio' noyo ati paatan ondo' kasagaan muno ra tana' ragitio. Amon ru mongoi kou tampilon ragiti, mongoi aku tampilon ra bokon.”

¹⁰Pulolowo' boo ri Lot liliut am kaimpal no titikop limayak Jordan saboi ra bandar Joar am makamasuang timug koson ra Taman ru TUHAN[28] kapoam koson ra tana' ru Misir. (Ginio noyo baal ra io kalo poyo pinuso ru TUHAN bandar Sodom am Gomora.)

¹¹Pupus no nampili' i Lot ra ngaangai' limayak Jordan koson ra io galama' tatangan am ongoi io boo tampilon ra sirangon. Ginio noyo baal nilo ruo nantuliar.

¹²Pamagun i Abram ra pagun ru Kanaan am i Lot minayan ra lolot ru bandar-bandar giu' ra limayak no am pangkim mamaar ra Sodom.

¹³Giu' ra bandar Sodom no inayanan ru ulun ondo' mangalaat kaga' am makatula ra TUHAN.

¹⁴Pakaugar i Lot, indagu TUHAN ri Abram, “Intor ra binigaran muno, pulolowo' toojo ngaangai' intok.

¹⁵Pataakon Ku rirun am papag muno ngaangai' tana' ra nakito muno. Masauk ginio ra okou tatangan ra sabubuoi no.

¹⁶Manaak Aku rirun ra papag ondo' masuang kaga', saboi kolondo' sangulun pana makauntob risilo. Makauntob poyo ulun ra kaau ru tana' ti, makauntob io niayuk ra suang ru papag muno.

¹⁷Raino, ongoyo' liputo' titikop intok ra tana' ragitio sabap ra pataakon Ku noyo ngaangai' rirun.”

¹⁸Ginio ra pabandingo' ri Abram kim nano am pamagun io mamaar ra puun-puun matulai giu' ra Mamri maar ra Gibron. Giu' no nambaalan nano ra altar ru TUHAN.