Read Timugon Murut KASAUKAN 14 Bible Online

KASAUKAN 14 - Timugon Murut bible

KASAUKAN 14

¹Mokoondo' apat ngaulun raja', iono: Raja' Amrapil intor ra Babilonia, Raja' Ariok intor ra Ilasar, Raja' Kidorlaomir intor ra Ilam am Raja' Tidial intor ra Goyim nangayou ra limo ngaulun raja' ra bokon, iono: Raja' Bira intor ra Sodom, Raja' Birsya intor ra Gomora, Raja' Syinab intor ra Adma, Raja' Simibir intor ra Jiboim am raja' intor ra Bila ondo' sabiton niayuk ra Joar.

³Kalilimo ngaulun raja' no nantutuluk am pinasimpung nilo saujor nilai giu' ra Limayak Sidim, ondo' raino sabiton ra Raat Matoi.

⁴Mopor am ruo ngambilor buoi nilo kinuasa' ru Raja' Kidorlaomir kaa' ralalom bilor koopor am talu, minanggal ilo riso.

⁵Ralalom bilor koopor am apat, Raja' Kidorlaomir am pantutuluk nano minatong nababaya' ra saujor nilai am kinala nilo ulun ru Ripaim ra Asytirot-Karnaim, ulun ru Jujim ra Gam, ulun ru Imim ra Syawi-Kiryataim,

⁶am ulun ru Gori ra kagunungan Idom am nangilou risilo saboi ra galur ru Il-Paran giu' ra igig ru tana' kaagisan.

⁷Kopongo raginio saguli' boo ulun-ulun nangilou no am uli' ra Kadis (ondo' paat ragili kauligan kaga' ra In-Mispat), naalap nilo ngaangai' tana' ru ulun ru Amalik am nangala ra ulun ru Amori ondo' minayan ra Gajajon-Tamar.

⁸Kopongo raginio raja' ondo' intor ra Sodom, Gomora, Adma, Jiboim am Bila napatampos ra suang ru saujor nilo ra Limayak Sidim,

⁹mangayou ra raja' ondo' intor ra Ilam, Goyim, Babilonia am Ilasar, limo ngaulun raja' mangayou ra apat ngaulun raja'.

¹⁰Limayak raginio nototop ra tulubong makatiir am paat ra raja' Sodom am Gomora nagiru' intor ra pangayawan no, nangaratu' ilo ra tulubong-tulubong no. Talu ngaulun raja' ra bokon no nakapagiru' giu' ra kagunungan.

¹¹Apat ngaulun raja' ondo' nangamanang nangalap ra ngaangai' no giu' ra Sodom am Gomora am nakaaya' akanon am ilo pana minugar.

¹²I Lot akon ri Abram minayan ra Sodom, io pana pinaaya' ibito' nababaya' ra ngaangai' kuliamos nano.

¹³Kaa' sangulun ondo' nakapagiru' am minongoi pambala' ra ngaangai' no ri Abram, ulun ru Ibrani no. Minayan i Abram maar ra puun-puun matulai, longgom ri Mamri ulun ru Amori. I Mamri am pabukat-pabukat ungkuyon nano, i Iskol am i Anir rangan pagamung ri Abram.

¹⁴Pakaining ri Abram ra rinakop akon nano i Lot, timungo' no ngaangai' ulun mapandai mangayou ralalom ru kim nano suang 318 ngaulun am sunuo' nilo kaapat ngaulun raja' no saboi ra bandar Dan.

¹⁵Giu' no tinayar ri Abram ulun-ulun nano ra kukula' ngantayaran am ongoyo' bulunsaro' paat ra rondom am kinala nilo. Inilou no ilo polos ra Goba tampilon ralayo ru bandar Damsyik.

¹⁶Naalap saguli' ri Abram ngaangai' kuliamos ondo' inalap nilo am niayuk i Lot, ruandu'-ruandu' am ulun-ulun ondo' rinakop ra bokon.

¹⁷Kopongo i Abram nangala ra Raja' Kidorlaomir am pantutuluk nano, saguli' io. Uma' boo raja' Sodom ri Abram giu' ra Limayak Syawi ondo' sabiton niayuk ra Limayak Raja'.

¹⁸Raja' Milkisidik raja' ru Salim am niayuk imam ri Aki Kapuuno' Ondo' Masawat Kaga' no, nagibit ra ruti' am wain koson pataakon ri Abram.

¹⁹Nambarakat io ri Abram, kono, “Gama' ru i Aki Kapuuno' Ondo' Masawat Kaga' no, ondo' napasauk ra limbowon am tana' ti mambarakat ri Abram!

²⁰Koompor noyo i Aki Kapuuno' Ondo' Masawat Kaga' no, ondo' nanaak rirun ra kamanangan intor ra pantula'-pantula' muno.” Tayari' boo ri Abram i Milkisidik sampiopor intor ra ngaangai' kuliamos ra inalap am inibit nali saguli'.

²¹Indagu Raja' Sodom ri Abram, “Alapo' kuliamos inalap no kaa' parulio' raki' ngaangai' ulun kuno.”

²²Taam i Abram, “Magibot aku ra saang ru TUHAN i Aki Kapuuno' Ondo' Masawat Kaga' no, napasauk ra limbowon am tana' ti,

²³ra kalo mangalap aku rondo' pana raki' ra longgom muno, gino ayuk nai am ra santiis gantian kapoam kakaput ru kasut pana kalo. Koon raginio kalo boo makaindagu kou, ‘Aku no napalangkaya' ri Abram.’

²⁴Kalo mangalap aku ra atan pana koson luntukin ku. Ondo' ayuk apuon ku iono atan ondo' pinakai ru ulun-ulun kuno. Kaa' polosoo' noyo rangan pantutuluk kuno koson ri Anir, i Iskol am i Mamri mangalap ra tayar nilo.”