Read Timugon Murut KASAUKAN 15 Bible Online

KASAUKAN 15 - Timugon Murut bible

KASAUKAN 15

¹Kopongo raginio, nakakito i Abram ra minintalang am nakaining ra ragu ru TUHAN, “Pai' kalaa' Abram, mangampin Aku rirun intor ra makalalaa' am mangani' rirun ra taak maayo.”

²Kaa' taam i Abram, “Iou TUHAN Raja', Atan kia onong ru taak no raki' sabap ra aku kolondo' anak? Ulun ondo' manungkus ra rapu' kuno, iono i Iliijir ayuk, ulipon kuno ulun ru Damsyik no.

³Kalo nanaak Kou raki' ra anak, ginio ra sangulun intor ra ulipon kuno manungkus ra rapu' kutu.”

⁴Naining poyo ri Abram ragu ru TUHAN, “Ulipon raginio kalo makapanungkus ra rapu' muno; Anak ungkuyon muno galama' ondo' manungkus.”

⁵Ibito' ru TUHAN i Abram miningkual ra liwar am indagu, “Pantingaa' ra limbowon am kinami' untobo' suang ru butitin no; makapapag kou koson ra kinasuang ru butitin no.”

⁶Nangintopot i Abram ra TUHAN, am ginio ra TUHAN nangiou riso koson sangulun motopot.

⁷Indagu boo TUHAN ri Abram, “Aku noyo TUHAN ondo' nagibit noyo rirun mingkual intor ra Bandar Ur ra pagun ru Babilonia koson manaak rirun ra tana' ti am okou noyo tatangan.”

⁸Kaa' pangkuot i Abram, “Iou TUHAN Raja', ati kulaan ku mapandayan ra tana' no aku tatangan?”

⁹Taam TUHAN, “Ibiti' aku ra sanginan sapi' ruandu', sanginan kambing ruandu', sanginan domba gawayan, moonong sanginan ti makaumur talu ngambilor am sanginan susuit asang am sanginan susuit maningkuluuk.”

¹⁰Ibito' boo ri Abram ngaangai' bibiag no ri Aki Kapuuno', moonong bibiag no tinata' no piruoo'. Pinantaluma' ri Abram banta' ra tinata' no ra ruo ngatinting, kaa' ruo ngainan ra susuit i binainan no.

¹¹Arapin ru kanui kual no, kaa' ongoyon anjawo' ri Abram.

¹²Paat mato ru orou tumolop galing, nokororot pakalunus i Abram am pulali' ru guang nano makaliman ra malaa' kaga'.

¹³Indagu TUHAN riso, “Papag muno masauk ra ulun bansa' ra bokon giu' ra pagun ra bokon. Masauk ilo ra ulipon ra giu' no am uliponon ilo buoi apat ngaatus ngambilor.

¹⁴Kaa' ukumin Ku mamagun ondo' mangulipon risilo, am paat ilo mangiruan ra pagun raginio, magibit ilo ra masuang kaga' kuliamos.

¹⁵Okou galama' maayag polos ra umur muno matutuo toojo, matoi kou ra maandai am lobongon.

¹⁶Masuku' papag kaapat muno, sumaguli' ilo ragiti sabap kalo paugaron Ku ulun ru Amori ra ilo kalo poyo lumaat kaga' saboi ilo ukumin.”

¹⁷Pokotolop mato ru orou am molondom noyo, pulali' ru rapuan makabaa ondo' makalisun am pilasut napaangan nansail ra lolot ru tinata' ra kual no.

¹⁸Paat raginio niayuk nambaal TUHAN ra bantu' Nano ri Abram. Indagu TUHAN, “Bantu' Kuno ra manaak Aku ra papag muno ra titikop ru tana' ragitio, intor ra balitan ru pagun ru Misir polos ra sungoi Iprat,

¹⁹makaaya' tana' ru ulun ru Kini, ulun ru Kinas, ulun ru Kadmon,

²⁰ulun ru Git, ulun ru Piris, ulun ru Ripaim,

²¹ulun ru Amori, ulun ru Kanaan, ulun ru Girgasi am ulun ru Jibusi.”