Read Timugon Murut KASAUKAN 17 Bible Online

KASAUKAN 17 - Timugon Murut bible

KASAUKAN 17

¹Paat umur ri Abram siam ngoopor am siam ngambilor, minintalang TUHAN riso am indagu, “Aku noyo i Aki Kapuuno' Ondo' Maayo Kaga' Kuasa'. Gagaya' no Raki' am kasalok no mambaal ra kasagaan Kuno.

²Mabantu' Aku rirun am manaak rirun ra papag ra masuang.”

³Igulatur i Abram am indagu boo i Aki Kapuuno',

⁴“Gitio noyo bantu' Kutu rirun: Bantu' Kuno ra okou masauk ra kinamatuaan ru masuang bansa'.

⁵Ginio ra inggalan muno sala' boo ka i Abram kaa' i Abragam[31] sabap masauk kou ra kinamatuaan ru masuang bansa'.

⁶Aku pana manaak rirun ra masuang papag am mokoondo' intor risilo no masauk ra raja'. Okou makapapag ra masuang toojo saboi ilo ti masauk ra bansa'-bansa'.

⁷“Suguton Ku toojo bantu' Kuno rirun am papag muno, mansusugul am bantu' no mantilayun. Masauk Aku ri Aki Kapuuno' muno am i Aki Kapuuno' ru papag muno.

⁸Manaak Aku rirun am papag muno ra tana' ragitio, intok inayanan muno raino ti koson ra ulun bansa' ru bokon. Titikop tana' ru Kanaan masauk ra longgom ru papag muno ra sabubuoi no am Aku masauk ri Aki Kapuuno' nilo.”

⁹Indagu poyo i Aki Kapuuno' ri Abragam, “Musiti' okou niayuk gumagaya' ra bantu' no, okou am niayuk papag muno mansusugul.

¹⁰Okou am moonong ungkuyon ru papag muno musiti' sunatin.

¹¹Intor raino musiti' mu sunatin moonong anak ungkuyon ondo' makaumur balu' ngoorou, makaaya' ulipon ondo' inanak ra baloi muno kapoam ulipon ondo' binali intor ra bansa' ru bokon. Sunat no masauk ra tatandu' ru nabantuan Kuno rirun.

¹³Ginio ra musiti' moonong ungkuyon sunatin am sunat ti masauk ra tatandu' ru inan ondo' mapakito ra nabantuan Kuno rirun mantilayun.

¹⁴Moonong ungkuyon ondo' kalo sinunatan, kalo masauk io ra ulun Kuno sabap kalo ginagaya' no nabantuan Kuno.”

¹⁵Indagu boo i Aki Kapuuno' ri Abragam, “Pai' boo sabito' andu' muno ri Sarai, intor raino inggalan nano i Sara.

¹⁶Barakaton Ku io am maganak io ra sangulun anak ungkuyon ondo' taakin Ku rirun. Barakaton Ku i Sara[32] am masauk io ra ina' ru papag ru bansa'-bansa'. Gino ngai' ru papag nano mokoondo' masauk ra raja'.”

¹⁷Igulatur boo i Abragam, kaa' masuatan io paat mangkara' ra, “Kalo noyo lair sangulun ungkuyon ondo' makaumur maatus ngambilor makaanak poyo? Kalo noyo lair maganak i Sara ra kinatuo nano ra siam ngoopor ngambilor?”

¹⁸Ginio ra indagu io ri Aki Kapuuno', “Moonsoi poyo i Ismail no ayuk pana manungkus raki'.”

¹⁹Kaa' indagu i Aki Kapuuno', “Kalo, andu' muno i Sara maganak ra sangulun anak ungkuyon am inggalanin mu ri Isak.[33] Suguton Ku bantu' Kuno ra anak no am papag nano ra sabubuoi no. Nabantuan Kuno mantilayun.

²⁰Kaa' nangiou Aku noyo ra pakiasian muno ra tayar ri Ismail. Sabap raginio barakaton Ku am aniin Ku io ra papag ra masuang. Masauk Io ra kinamatuaan ru mopor am ruo ngaulun raja' am papag nano saukon Ku ra rondo' bansa' ondo' maayo kaga'.

²¹Kaa' suguton Ku bantu' Kuno ri Isak anak ungkuyon muno ondo' anakon ri Sara ra sambilaran olo'-olo' koson paat ragitio.”

²²Karagu ri Aki Kapuuno' ginio ri Abragam, iruani' No io.

²³Paat orou raginio niayuk, ginagaya' ri Abragam i Aki Kapuuno' am sunati' no i Ismail anak nano, ngaangai' ungkuyon ru baloi nano am nakaaya' ulipon ondo' inanak ra baloi nano am niayuk ondo' binali nano.

²⁴Siam ngoopor am siam ngambilor noyo umur ri Abragam sinunatan,

²⁵am mopor am talu ngambilor noyo umur ri Ismail anak nano sinunatan.

²⁶Karuruo nilo ti sinunatan ra nogondo' orou,

²⁷am nabaya' ra ngaangai' ulipon ri Abragam.