Read Timugon Murut KASAUKAN 19 Bible Online

KASAUKAN 19 - Timugon Murut bible

KASAUKAN 19

¹Pakasaboi ruo malaikat no ra bandar Sodom ra palunggai' noyo, nanturung i Lot ra kulobon garabang ru bandar raginio. Pakakito io risilo, ingkakat io am ongoi uma' risilo. Igulatur io ra saang nilai,

²am indagu, “Tuan, apit kau poyo ra baloi kuno. Makapambagu' kau ra kalayam am makakaalangan kau. Susuab no, rumondom kau sukal am rayusin min boo pangkiralanan min.” Kaa' taam ilo, “Kalo pana, mombolong akai ayuk ragiti padang ru bandar ti.”

³Jinajalan ilo kimaiti' ri Lot, am pupus no pababaya' ilo boo minumpos ra baloi nano. Panusub i Lot ra kambo-kambo nano mangansak ra ruti' am momongo ra akanon mangaamis ra tambului no, am pangakan ilo.

⁴Kalo poyo nombolong tambului no, ungkuyon ru bandar Sodom no liminibung noyo ra baloi no. Nakakai' ungkuyon ru bandar no, ondo' mangatutuo am poyo mangamulok soroi ra giu' no.

⁵Piawo' nilo i Lot am pangkuot, “Ati kia ulun ondo' minatong pombolong ra baloi muti? Pataako' ilo ramon maa' raginio makarulug akai risilo!”

⁶Ingkual i Lot am angabi' no kulobon i.

⁷Indagu io risilo, “Rangan kau ngaangai', makiasi' aku ra pai' kau pambaal ra malaat kaga' ti!

⁸Kaa' rongogo', aku mokoondo' ruo ngaulun anak ruandu' ondo' lakat poyo ralaa. Moonsoi pataakon ku ilo ramuyun am guguang min mangurana' risilo maya' ra kasagaan min. Kaa' pai' min jamari' tambului kuno, sabap ilo tambului kuno am musiti' aku magalung toojo risilo.”

⁹Kaa' indagu ilo ri Lot, “Pagiru'! Okou ulun bansa' ru bokon ragiti ondo' masaga' mangila' ramon? Ugar, Pagiru' no! Amon ru kalo, jojokon mai poyo pamakuan mai rirun intor ra ruo ngaulun no.” Juuli' nilo i Lot am sonsog ilo mapalunsai ra angob.

¹⁰Kaa', ingkual karuo ngaulun ondo' soroi ralalom baloi no am namunduk ri Lot paumposo' saguli' ra baloi no am angabi' nilo kulobon.

¹¹Bolowo' nilo mato ru ngaangai' ulun ondo' soroi ra liwar no saboi kalo boo mauyum nilo angob ru baloi no.

¹²Indagu boo karuruo ngaulun tambului no ri Lot, “Amon ru makaanak ungkuyon kou, anak ruandu', anak mangiwan kapoam pabukat mu ra bokon minayan ra bandar ti, ibito' ilo noyo mingkual intor ragiti.

¹³Sabap pusoon mai intok ragitio. Nakaining noyo TUHAN ra panguwan ra maagat kaga' ra mamagun ru giti am nangator Io ramon mongoi pamuso ra bandar Sodom.”

¹⁴Ugar boo i Lot ongoi pambala' ra karuruo ngaulun tamung ru anak-anak ruandu' nano am indagu, “Ribaki' min ingkual intor ragiti sabap pusoon ru TUHAN intok ragitio.” Kaa', tantamon nilo mangkuli ayuk i Lot.

¹⁵Paat tumawang, rinondom ru karuruo malaikat no nangulisok ri Lot mataki' mugar, konilo, “Ribaki', ugar no mabaya' ra andu' muno am karuruo anak ruandu' muno intor ragiti maa' ra akau makapagiru' no kalo matoi paat bandar ti pusoon.”

¹⁶Maimamang i Lot. Kaa' makaasi' TUHAN riso, ginio ra kitango' ru karuo ngaulun tambului no i Lot, andu' nano am karuruo anak nano mingkual intor ra bandar no.

¹⁷Kopongo raginio, indagu sangulun intor ra malaikat no, “Pagiru' no, am akau pana maayag! Pai' pangkaili ra tinaulian am pai' uog ra limayak no. Pagiru' kano ra kabuluran no maa' raginio kalo matoi kau.”

¹⁸Kaa' taam i Lot, “Anii Tuan, pai' akai pagiruo' ra giu' no.

¹⁹Iou, nangindangan kono toojo pamayag raki', kaa' kabuluran raginio maalur kaga', maaru' lair masunu' aku ru baal makalalaa' no am matoi aku noyo ra kalo poyo makasaboi ra giu' no.

²⁰Ilai', giu' no mokoondo' bandar boborok ondo' mamamaar. Poongoyo' aku ayuk ra giu' no maa' raginio maayag aku.”

²¹Taam malaikat no, “Ba iou, bandar boborok raginio kalo pusoon ku.

²²Ribaki', pagiru' no! Sabap ra kolondo' atan-atan mabaal ku ra okou kalo poyo makasaboi ra giu' no.” Sabap sinabit ri Lot bandar raginio boborok, ginio boo ra ininggalanan bandar no ra Joar.[36]

²³Sumirang mato ru orou paat i Lot nakasaboi ra Joar.

²⁴Pulalii' ru TUHAN napatuun ra rasam makabalirang ondo' makaapui ra bandar Sodom am Gomora.

²⁵Karuruo bandar no pinuso, titikop limayak nabaya' ra mamagun ra giu' no am ngaangai' tutuu' ru tana' raginio.

²⁶Kaa' pangkaili andu' ri Lot ra tinaulian am kaangun io boo ra lugu' ru usi'.

²⁷Suabon no ra iosusuab toojo, naringkaagou i Abragam minongoi ra intok binigaran no ra saang ru TUHAN ragili.

²⁸Impalo' no tampilon ra bandar Sodom am Gomora am niayuk titikop ru limayak no. Makito no binuun ru lisun intor ra tana' no koson ra lisun intor ra rapuan maayo kaga'.

²⁹Kaa' paat ri Aki Kapuuno' namuso ra bandar-bandar raginio am limayak ondo' inayanan ri Lot, nakakara' Io ri Abragam am pangindangan Io ri Lot nagiru'.

³⁰Sabap ra malaa' i Lot mayan ra Joar, banding io ra kabuluran nabaya' ra karuruo ngaulun anak ruandu' nano am ayan ilo ra luang batu.

³¹Indagu anak ruandu' ra katuaan no ra boborok nano, “Matutuo noyo i ama' am titikop ra tana' ti[37] kolondo' sangulun ungkuyon manangandu' rito koson mokoowot ra anak.

³²Ibok, gauko' to i ama' am makarulug to boo riso am makaanak to boo.”

³³Rondom raginio, painumo' nilo ra wain ama' nilono am rulug anak ruandu' ra katuaan no ra ama' nano, kaa' nagauk kaga' ama' nano saboi kalo nakaliman io ra atan binaal nano.

³⁴Paat ra suabon no, indagu anak ruandu' ra katuaan no ra boborok nano, “Rondom i riminulug aku noyo ri ama'! Rondom raiti' gaukon to poyo am okou boo rumulug riso, am sigagama' to boo makaanak intor riso.”

³⁵Ginio ra paat rondom raginio, gauko' nilo i Lot, am rulug boo anak karuo no, kaa' nagauk kaga' i Lot saboi kalo nakaliman io ra atan binaal nano.

³⁶Ginio nai ra kaapang boo karuruo ngaulun anak ruandu' ri Lot sabap ra intor ra ama' nilo galama'.

³⁷Anak ruandu' ra katuaan naganak ra sangulun anak ungkuyon ondo' ininggalanan ri Moab.[38] Io no kinamatuaan ru bansa' ru Moab ra raino ti.

³⁸Anak ruandu' ra karuo naganak ra sangulun anak ungkuyon ondo' ininggalanan ri Bin-Ami.[39] Io no kinamatuaan ru bansa' ru Amon ra raino ti.