Read Timugon Murut KASAUKAN 22 Bible Online

KASAUKAN 22 - Timugon Murut bible

KASAUKAN 22

¹Kukula' buoi ragili, pangkinam i Aki Kapuuno' ri Abragam, kon Nano, “Abragam!” Taam boo i Abragam, “Tuhan, giti aku.”

²Indagu i Aki Kapuuno' riso, “Ibito' anak ungkuyon langkuir muno i Isak, ondo' tagamin muno am ongoi ra tana' Moria. Giu' no makagunung ondo' patuluon Kuno rirun, pataako' anak muno koson taak simbalui Raki'.”

³Paat ra suabon no, rinondom ri Abragam nampalapak ra luton koson ponolob ra taak simbalui am pobongkoso' no ra kaladai nano. Ugar io nabaya' ri Isak am karuo ngaulun ulipon nano ra intok ondo' rinagu ri Aki Kapuuno' riso i.

⁴Paat katalu ra orou, intor ra maalur naimpal noyo ri Abragam intok raginio.

⁵Indagu io boo ra karuo ngaulun ulipon nano, “Tatang kau ayuk ragiti mabaya' ra kaladai ti. Akai magama' mongoi ra giu' no sumamba ra Tuhan. Mopongo raginio sumaguli' akai ramuyun.”

⁶Pasaani' ri Abragam luton ponolob ra taak simbalui no ri Isak, am io galama' magibit ra pais am baa pampaang ra apui. Liliwa' ilo nangkiralan,

⁷indagu i Isak, “Ama'!” Taam i Abragam, “Atan kia lagang?” Pangkuot i Isak, “Nakito tokou nagibit ra pampaang am luton, kaa' ati kia anak domba ondo' simbaluyon?”

⁸Taam i Abragam, “I Aki Kapuuno' galama' momongo ra anak domba no.” Parayus ilo boo ugar.

⁹Pakasaboi ilo ra intok ondo' inaru' ri Aki Kapuuno', pambaal i Abragam ra altar am pantuumo' luton ponolob ra taak simbalui no ra tampak no. Bangkilo' no anak ungkuyon nano am palangano' ra altar no, tampak ru luton ponolob no.

¹⁰Alapo' no boo pais koson mamatoi ra anak nano.

¹¹Kaa' pampiau malaikat ru TUHAN intor ra suruga', “Abragam, Abragam!” Taam i Abragam, “Atan Tuhan, giti aku.”

¹²Indagu malaikat no, “Pai' mu sinduali' kapoam jamari' anak no. Raino nakapandai Aku ra mangurumat am gumagaya' kou Raki', sabap ra kalo inanggal mu koson mapataak ra anak langkuir muno Raki'.”

¹³Pulolowo' boo i Abragam libung no am kakito no sanginan domba gawayan ondo' sangau no nakasangut ra malalaat. Ongoyo' boo alapo' ri Abragam domba no am pataako' ra TUHAN, koson taak simbalui suali ru anak ungkuyon nano.

¹⁴Inggalani' ri Abragam intok raginio ra “TUHAN momongo ra atan ondo' koogot”. Saboi boo raino ulun mindagu ra “Giu' ra tampak ru gunung Nano, TUHAN momongo[45] ra atan ondo' koogot.”[46]

¹⁵Pampiau malaikat ru TUHAN intor ra suruga' no ri Abragam ra kainduo,

¹⁶kono, “Ragu ru TUHAN: Magibot Aku ra inggalan Kuno galama', sabap ra binaal mu gitio am kalo inanggal mu koson mapataak ra anak langkuir muno Raki'.

¹⁷Barakaton Tokou ra tinangga' luluab am kasuangon Ku papag muno koson ra butitin ra limbowon am koson ra kinasuang ru agis ra nagas ru raat. Papag muno makapangala ra pantula' nilo.

¹⁸Ngaangai' bansa' ra tana' ti makibarakat ilo Raki' koson niayuk ra Aku nambarakat ra papag muno, sabap ra ginagaya' mu susuban Kuli.”

¹⁹Saguli' boo i Abragam ra karuo ngaulun ulipon nali, am pabaya' ilo ongoi ra Birsyiba am pamagun i Abragam ra giu' no.

²⁰Kukula' buoi raginio naala' i Abragam ra i Milka andu' ri Nagor, pongkotob ungkuyon nano naganak balu' ngaulun anak ungkuyon;

²¹anak katuaan ininggalanan ri Us; boborok no i Bus, Kimuil ama' ri Aram,

²²Kisid, Gajo, Pildas, Jidlap am i Bituil.

²³I Bituil ti ama' ri Ribika. Ginio noyo balu' ngaulun anak ungkuyon inanak ri Milka ra ralaki nano i Nagor, pongkotob ungkuyon ri Abragam.

²⁴Parulug ri Nagor, i Riuma pana naganak ri Tiba, Gagam, Tagas am i Maakga.