Read Timugon Murut KASAUKAN 26 Bible Online

KASAUKAN 26 - Timugon Murut bible

KASAUKAN 26

¹Giu' ra pagun no, nasauk poyo bitilan, koson nasauk ra paat ri Abragam ragili. Ongoi i Isak ra bandar Girar, tuum ra Raja' Abimilik, raja' ru ulun ru Palistin no.

²Intalang TUHAN riso am indagu, “Pai' ongoi ra pagun ru Misir, ayan ayuk ra pagun tuluon Kuno rirun.

³Ayan no ragiti, alungin am barakaton Tokou. Pataakon Ku titikop ru wilayah ti rirun am papag muno. Suguton Ku atan ondo' binantu' Kuno ri ama' muli i Abragam.

⁴Aniin Tokou ra papag masuang, koson kinasuang ru butitin giu' ra limbowon am pataakon Ku risilo titikop ru wilayah ti. Ngaangai' bansa' ra tana' ti makibarakat Raki' koson ra Aku nambarakat noyo ra papag muno.

⁵Barakaton Tokou, sabap giminagaya' i Abragam Raki' am binaya' no ngaangai' ukum am susuban Kuno.”

⁶Ginio ra ayan boo i Isak giu' ra bandar Girar.

⁷Paat ra mangkuot mamagun ru Girar riso intor ri Ribika, taamon ri Isak ra boborok ruandu' nano. Marara' io mambala' ra i Ribika andu' nano, sabap ra malaa' io potoyon ru ulun koson mangalap ri Ribika ondo' mantalur kaga' no.

⁸Kukula' buoi noyo i Isak minayan ra giu' no, sangarawan raginio ibol Raja' Abimilik ra gigimpalan nano, am kakito no i Isak mangalok-alok ri Ribika.

⁹Piawo' boo ru Raja' Abimilik i Isak am indagu, “Andu' mu i Ribika, kua indagu kou ra boborok ruandu' muno?” Taam i Isak, “Guang ku potoyon aku amon ru mambala' ra io andu' kuno.”

¹⁰Indagu raja' no, “Atan binaal muno ramon? Tutului marulug ru sangulun intor ra ulun kuno andu' muno, mosonsol kou sabap ra sala maino.”

¹¹Pakaraa' ru Raja' Abimilik ngaangai' ulun nano, kono, “Osoi lumaat ri Isak ti kapoam andu' nano, ulun no potoyon.”

¹²Pagitanom i Isak ra sampug ra pagun raginio am bilor raginio niayuk nangkumos io ra maatus kinauli' no intor ra tinanom nano, sabap ra binarakat io ru TUHAN.

¹³Kinalangkaya' ri Isak no riminuang poyo am liminangkaya' io kaga'.

¹⁴Nangusolon boo ulun ru Palistin no riso, sabap ra io masuang ulipon, kambing, domba am sapi'.

¹⁵Pumpuni' boo ru ulun ru Palistin no ngaangai' tulubong ondo' kinali ru ulipon ri Abragam ama' nali, bulintok i Abragam lakat poyo naayag i.

¹⁶Indagu boo i Abimilik ri Isak, “Iruani' pagun maiti, sabap ra makakuasa' kou poyo intor ramon.”

¹⁷Iruani' boo ri Isak pagun raginio am pangkim io ra limayak Girar am ayan ra giu' no ra kukula' buoi.

¹⁸Kalio' saguli' ri Isak tulubong ondo' kinali ra bulintok i Abragam naayag, am ondo' pinumpunan ru ulun ru Palistin ra kakapatoi ri Abragam. Inggalani' ri Isak tulubong-tulubong raginio koson ra pinainggalan ru ama' nali.

¹⁹Paat ra ulipon-ulipon ri Isak mangkali ra tulubong ra limayak raginio, pakakali ilo ra taur ru timug ondo' bubuluak mingkual.

²⁰Kaa' ulun magagalung ru bibiag ra bandar Girar makimansangor ra ulun magagalung ru bibiag ri Isak, konilo, “Akai ra timug ti.” Ginio ra inggalani' ri Isak tulubong raginio “Pansangaran”.

²¹Pangkali poyo ulipon-ulipon ri Isak ra tulubong ra bokon, am pansasangor ilo niayuk intor ra tulubong raginio. Ginio ra inggalani' ri Isak tulubong raginio “Pantulaan”.

²²Banding io intor ra giu' no am pangkali ra tulubong ra bokon poyo. Ragino ti, kolondo' mansasangor. Ginio ra inggalani' ri Isak tulubong no “Kalabusan”. Indagu io, “Raino, nanaak TUHAN ritakau ra kalabusan mayan ra pagun ti, am malabaan takau ragiti.”

²³Ugar i Isak intor ra giu' no am ongoi io ra bandar Birsyiba.

²⁴Rondom raginio minintalang TUHAN riso am indagu, “Aku noyo i Aki Kapuuno' ri Abragam ama' muli. Pai' kalaa', sabap ra sindungin Tokou, barakaton Tokou am kasuangon Ku papag muno, sabap ra ginio noyo bantu' Kuli ri Abragam ulipon Kuli.”

²⁵Pambaal boo i Isak rondo' altar ra giu' no, am samba ra TUHAN. Pangkim i Isak ra giu' no am pangkali ulipon-ulipon nano ra tulubong ra bokon.

²⁶Ratong boo Raja' Abimilik intor ra bandar Girar nabaya' ri Agujat pambilin nano, am i Pikgol tingganai ru saujor nano, koson tumuum ri Isak.

²⁷Indagu boo i Isak risilo, “Kua ratong kau tuum raki'? Sala' kia ka mangasisang kau raki' am paugaro' min aku intor ra pagun mino?”

²⁸Taam ilo, “Raino makapandai akai ra TUHAN manindung rirun, ginio sabap ra guang mai mabantu' takau. Pagibot no,

²⁹koson okou kalo lumaat ramon am koson niayuk akai kalo lumaat rirun. Giminonsoi akai rirun am nopoloso rirun mugar ra kaansayan. Mapandayan toojo ra nambarakat TUHAN no rirun.”

³⁰Pambaal boo i Isak risilo ra rondo' bunsag, am pagagakan am pagiginum ilo.

³¹Suabon no, nokorondom ilo sigagama' nabantu' ondo' makasegel ra ibot. Pintor i Isak risilo am pantuliar ilo koson ra rarangan.

³²Paat ra orou raginio niayuk, ratong ulipon-ulipon ri Isak am pambala' riso ra tulubong ondo' kinali nilono. Konilo, “Nakatuum akai ra timug.”

³³Inggalani' ri Isak tulubong raginio “Pagibatan”. Ginio noyo pupuun ru bandar raginio ininggalanan ra Birsyiba.[52]

³⁴Paat ra umur ri Isau apat ngoopor ngambilor, panangandu' io ruo ngaulun ruandu' ru ulun ru Git, i Judit anak ruandu' ri Biiri am i Basmat anak ruandu' ri Ilon.

³⁵Karuruo ngaulun andu' ri Isau no mapangiluk ra guang ri Isak am i Ribika.