Read Timugon Murut KASAUKAN 27 Bible Online

KASAUKAN 27 - Timugon Murut bible

KASAUKAN 27

¹Paat ri Isak matutuo noyo am noolou mato nano, piawo' no anak katuaan nano, i Isau, am indagu riso, “Anak kuno.” Taam i Isau, “Iou, ama'.”

²Indagu i Isak, “Makito mu ra matutuo aku noyo am kalo lair mabuoi matoi aku.

³Alapo' panah am logot muno, ongoi ra limayak am pampalula' ra sanginan kana'.

⁴Ansaki' aku ra akanon maamis koson ra akanon kasuungan kuno, am ibito' raki'. Makaakan aku ra akanon no, barakaton tokou ra aku kalo poyo matoi.”

⁵Kaa' paat ri Isak mindagu ri Isau no, mangintalingo i Ribika. Pakaugar i Isau minongoi pampalula',

⁶indagu i Ribika ri Jakub, “Kakaining ku ri ama' muno minindagu ri Isau koson ragitio,

⁷‘Ibiti' aku kasanginan kana' ondo' lulaan muno am ansaki' aku ra akanon maamis. Makaakan aku ra akanon no, barakaton tokou ra saang ru TUHAN ra aku kalo poyo matoi.’ ”

⁸Kon poyo ri Ribika, “Raino, anak kuno, pangining raki' am baalo' atan ondo' panusuban kuno rirun.

⁹Ongoi ra sampanon ru kambing domba takano, pilio' ruo ngainan anak ru kambing ra moonsoi am ansakon ku ra akanon maamis kasuungan ru ama' muno.

¹⁰Ibiton mu akanon no riso am makaakan io, barakaton no boo okou ra io kalo poyo matoi.”

¹¹Kaa' indagu i Jakub ra ina' nano, “Makapandai kou ra i Isau no makabulu-bulu kaa' kungkung kutu malumis.

¹²Maaru' gumuut i ama' raki' am mapandayan no ra mamparuung aku riso, ginio boo mangkinibit aku ayuk ra pagulasan raki' am sala' ka mambarakat io.”

¹³Taam ina' nano, “Anak kuno, polosoo' noyo ngaangai' ulas pataakon rirun no makatiu' raki', baalo' panusuban kutu rirun, am ongoi alapo' karuo ngainan ra kambing no.”

¹⁴Ongoyo' boo alapo' ri Jakub karuo ngainan kambing no am pataaki' ra ina' nano. Ansako' boo ru ina' nano ra akanon kasuungan ri Isak no.

¹⁵Pagalap boo i Ribika ra bayang moonsoi kaga' ri Isau ondo' binulian ra baloi no, am pabayango' no ri Jakub.

¹⁶Palangkupo' ri Ribika kungkung ru anak kambing no ra longon am ra liog ri Jakub ondo' kolondo' bulu no.

¹⁷Pataaki' no boo ri Jakub akanon maamis no nabaya' ra ruti' ondo' inansak nano.

¹⁸Ongoi boo i Jakub ra intok ru ama' nano am indagu, “Ama'!” Taam ama' nano, “Iou, osoi kou?”

¹⁹Taam i Jakub, “Aku i Isau, anak katuaan muno. Binaal ku noyo ondo' nanusuban muli raki'. Panturung no am akano' kual ru linula' ra inansak kutu, maa' raginio mabarakat mu aku.”

²⁰Indagu i Isak, “Okou anak kuno, ati kulaan kou nakaalap ra mataki'?” Taam i Jakub, “Sabap ra nangindangan TUHAN i Aki Kapuuno' ondo' sambaan muno raki'.”

²¹Indagu i Isak ri Jakub, “Inggaar noyo raki' maa' ginio maguut tokou. Motopot kia okou ti i Isau?”

²²Inggaar i Jakub ra ama' nano. Guuto' no i Jakub am indagu, “Bolos mutu koson ra bolos ri Jakub, kaa' longon mutu koson ra longon ri Isau.”

²³Kalo nauligan ri Isak i Jakub sabap ra makabulu-bulu longon nano koson longon ri Isau. Barakaton noyo raan ri Isak i Jakub,

²⁴lakat poyo mangkuot io, “Motopot kia ra okou ti i Isau?” Taam i Jakub, “Iou, aku no.”

²⁵Indagu boo i Isak, “Ibito' kual no raki'. Makaakan aku, barakaton tokou.” Ibito' ri Jakub kual no am ibito' no niayuk kasanganu wain ra inumon.

²⁶Indagu boo ama' nano riso, “Anak kuno, inggaar poyo am alaki' aku.”

²⁷Inggaar i Jakub mangalok ra ama' nano, pakaalok i Isak ra owou ru bayang nano am pambarakat riso. Indagu i Isak, “Owou maamis ru anak kutu koson owou ru umo ondo' binarakat ru TUHAN.

²⁸Gama' ru manaak i Aki Kapuuno' rirun ra bolobou intor ra limbowon am manaak rirun ra tana' mangalabung! Gama' ru manaak Io rirun ra gandum am niayuk wain ra masuang kaga'.

²⁹Gama' ru mangasauk bansa'-bansa' ra ulipon muno am ulun mangurumat rirun. Gama' ru manguasa' kou ra ngaangai' pabukat muno am papag ru ina' muno mangurumat rirun. Gama' ru mausung ulun ondo' magulas rirun am mabarakat ulun ondo' mambarakat rirun.”

³⁰Kopongo binarakat ri Isak i Jakub, am kakaugar ri Jakub, uli' i Isau, maayo nano intor ra nampalula'.

³¹Nangansak niayuk i Isau ra akanon maamis kasuungan ru ama' nano, ongoyo' no taaki' ra ama' nano, indagu i Isau, “Ama', panturung am akano' kual ondo' inibit kutu rirun, maa' raginio barakaton mu aku boo.”

³²“Osoi kou ti?” kuot ri Isak riso. “Aku i Isau, anak katuaan muno,” taam nano.

³³Tumontol galing ngaangai' inan ri Isak am pangkuot io, “Osoi kia raitii' ni, ondo' nampalula' noyo raki' ra kana', am ondo' nagibit ni? Inakan ku koyoo' ra okou kalo poyo nakaratong, am naanian ku noyo io ra barakat pamupusan kuli am barakat ragili io tatangan ra sabuoi-buoi no.”

³⁴Kaining ngaangai' ginio ri Isau, lakis io pantangi' ra maruol guang am indagu, “Ama'! Anii' aku niayuk ra barakat muno.”

³⁵Taam i Isak, “Minatong boborok muno am namparuung raki'. Ginaau no barakat ondo' sotopot no panganian kuno rirun.”

³⁶Indagu i Isau, “Gitio noyo kainduo ri Jakub mamparuung raki'. Natimpok inggalan nano i Jakub.[53] Ginaau no longgom kuno koson anak katuaan am raino ginaau no poyo barakat kuno. Kolondo' kia boo barakat muno raki'?”

³⁷Taam i Isak, “Napasauk aku noyo riso ra tuan muno am ngaangai' pabukat nano masauk ra ulipon nano. Nangani' aku noyo riso ra gandum am wain. Raino kolondo' atan-atan mabaal kuno rirun, anak kuno.”

³⁸Nyanya'-nyanya' i Isau no makitaak ra ama' nano, “Rondo' ayuk kia barakat muno, ama'? Barakato' aku niayuk, ama'.” Tumalimpuun io poyo pantangi'.

³⁹Indagu boo i Isak riso, “Kolondo' kou ra bolobou intor ra limbowon, am kolondo' kou ra tana' mangalabung.

⁴⁰Maayag kou ra ilang muno, kaa' masauk kou ra ulipon ru boborok muno, kaa' amon ru manggal kou, makalabus kou intor ra kuasa' nano.”

⁴¹Ginio ra masisang i Isau ri Jakub, sabap ra inanian ru ama' nano i Jakub ra barakat i. Migindagu io ra guang nano, “Panguliran ra ama' ku matoi maar noyo, potoyon ku i Jakub no!”

⁴²Kaa' kaining ri Ribika inatangan ri Isau no, piawo' no i Jakub am indagu riso, “Iningo' noyo, maayo muno i Isau nangatang noyo mansuli' am mamatoi rirun.

⁴³Anak kuno, raino baalo' atan ondo' raguon kutu. Tampos noyo am ongoi ra maayo kuli i Laban giu' ra pagun ru Aran.

⁴⁴Ayan noyo riso ra kukula' buoi, saboi lasu' ru guang ru maayo muno masalui,

⁴⁵am lilianin no boo atan ondo' pinamakuan muno riso. Manusub aku boo ra sangulun mongoi pagalap saguli' rirun. Marara' aku maluusan ra karuo ngaulun anak ku ralalom songorou.”

⁴⁶Indagu i Ribika ri Isak, “Nasuraan aku magilong ra karuo ngaulun andu' ri Isau ra bansa' ru bokon no. Amon ru manangandu' niayuk i Jakub ra ruandu' ru bansa' ru Git no, moonsoi poyo matoi aku ayuk.”