Read Timugon Murut KASAUKAN 28 Bible Online

KASAUKAN 28 - Timugon Murut bible

KASAUKAN 28

¹Piawo' boo ri Isak i Jakub, barakato' no am pambilin, kono, “Pai' panangandu' ra ralaa ru Kanaan ti.

²Tampos no, ongoi no ra pagun ru Misopotamia, ra baloi ru aki muno i Bituil, am panangandu' noyo ra sangulun anak ralaa ri Laban kamaman muli.

³Gama' ru mambarakat i Aki Kapuuno' Ondo' Maayo Kaga' Kuasa' no ra paguguatan muno am manaak rirun ra anak masuang, saboi masauk kou ra kinamatuaan ru masuang bansa'!

⁴Gama' ru mambarakat i Aki Kapuuno' rirun am papag muno koson Io nambarakat ri Abragam, am gama' ru okou tatangan ra tana' inayanan mutu, ondo' pinataak noyo ri Aki Kapuuno' ri Abragam i!”

⁵Poongoyo' boo ri Isak i Jakub ra pagun ru Misopotamia, mongoi ri Laban anak ungkuyon ri Bituil, ulun ru Aram, maayo ungkuyon ri Ribika ina' ri Jakub am i Isau.

⁶Nakapandai i Isau ra binarakat ri Isak i Jakub am nopoongoi riso ra pagun ru Misopotamia paguyum ra andu'. Nakapandai io niayuk ra paat ri Isak nambarakat ri Jakub, nanusub i Isak ri Jakub ra kalo manangandu' ra ralaa ru Kanaan.

⁷Nakapandai niayuk i Isau ra ginagaya' ri Jakub ragu ru matuo nano am minongoi io ra Misopotamia.

⁸Nakarati' boo i Isau ra ama' nano kalo maansayan ra ruandu' ru Kanaan.

⁹Ginio ra ongoi i Isau ri Ismail anak ungkuyon ri Abragam, am paguot ra anak ruandu' ri Ismail ondo' ininggalanan i Magalat, boborok ruandu' ri Nibayot.

¹⁰Iruani' ri Jakub bandar Birsyiba am ongoi ra pagun ru Aran.

¹¹Paat tumolop mato ru orou, pakasuku' io ra rondo' intok[54] am pombolong ra giu' no. Luya' io am minulun io ra batu.

¹²Paginupi boo i Jakub, nakito no rondo' tukar giti ra tana' ti am pompor no nakasuku' ra limbowon, am malaikat-malaikat tumuun magaloi ra tukar no.

¹³Bigor TUHAN ra sapapa' ri Jakub[55] am indagu, “Aku noyo TUHAN i Aki Kapuuno' ri Abragam am i Isak. Pataakon Ku rirun am papag muno tana' ra nambalangan muno.

¹⁴Papag muno koson ra kinasuang ru kaau ra tana' ti. Kapilaan nilo wilayah nilo ra ngaangai' tampilon, am mimpuun rirun am papag muno, ngaangai' bansa' ru tana' ti makaapu ra barakat.[56]

¹⁵Karaa' noyo, indanganon am sindungin Tokou ra ati ayuk angayan muno am ibiton Tokou sumaguli' ra pagun ragitio. Kalo iruanin Tokou suku' Ku mabaal ngaangai' atan ondo' binantu' Kuli rirun.”

¹⁶Karat boo i Jakub am indagu, “Soroi TUHAN ragiti! Soroi Io ragiti am kalo nakapandai aku!”

¹⁷Nalaa' io am indagu, “Mapara' boo makalalaa' intok ragitio! Maaru' baloi gitio ri Aki Kapuuno', kulobon garabang umpasan ra suruga'.”

¹⁸Suabon no, rondom i Jakub sukal am alapo' no batu inulunan nali am potolorogo' baalo' ra batu pangkaraan. Uasi' no batu pangkaraan no ra umau jaitun koson patimpokon ri Aki Kapuuno'.

¹⁹Inggalani' no intok raginio Bitil[57] (Galing i ininggalanan intok raginio ra Lus).

²⁰Pagibot boo i Jakub, kono, “Amon ru indanganon am sindungin aku ru TUHAN ra ugar kutu, am aniin No aku ra akanon am bayangon,

²¹suku' ra aku makasaguli' ra matanda' ra baloi ri ama' kuli, Okou noyo i Aki Kapuuno' kuno.

²²Batu pangkaraan ra pinotolorog kutu masauk ra intok sumamba Rirun, am aniin Tokou ra sampiopor intor ra ngaangai' ondo' pataakon Muno raki'.”