Read Timugon Murut KASAUKAN 29 Bible Online

KASAUKAN 29 - Timugon Murut bible

KASAUKAN 29

¹Paginjul poyo i Jakub am ongoi ra pagun tampilon sirangon ru pagun ru Kanaan.

²Pulali' no nakakito ra tulubong ra limayak no, am talu ngantimungan domba nagupu' ra kiing no. Tulubong raginio papainuman ru ulun magagalung no ra domba nilo, am tiningkapan tulubong no ra batu maayo.

³Makatimung ngaangai' domba no ra intok raginio, luiron ru ulun-ulun magagalung batu pinatingkop no am painumon nilo domba-domba. Mopongo raginio luiron nilo patingkopo' saguli'.

⁴Pangkuot boo i Jakub ra ulun-ulun magagalung, “Rangan kau, ati intor minti?” Taam ilo, “Intor akai ra Aran.”

⁵Pangkuot poyo i Jakub, “Nakaulig kau kia ri Laban anak ungkuyon ri Nagor?” Taam ilo, “Iou, nakaulig akai.”

⁶Pangkuot io poyo, “Moonsoi io kia?” Taam ilo, “Moonsoi ayuk. Ilai', ginio i Ragil, anak ruandu' ri Laban no minatong nangayur ra domba ru ama' nano.”

⁷Indagu i Jakub, “Lakat poyo matawang am kalo poyo nasuku' paat ra domba-domba paumposon ra kandang. Kua pai' min painumo' am pongkotopo' saguli'?”

⁸Taam ilo, “Kalo mabaal mai ginio, suku' makatimung ngaangai' domba am maluir mai batu pinatingkop no, am painumon mai boo domba-domba.”

⁹Lakat ayuk poyo i Jakub magindagu risilo, ratong i Ragil nabaya' ra domba ru ama' nano.

¹⁰Pakakito i Jakub ri Ragil nabaya' ra domba ru kamaman nano i Laban, ongoi i Jakub ra tulubong no, luiro' no batu pinatingkop am painumo' no domba-domba.

¹¹Alaki' no boo i Ragil am pantangi' ra naansukan.

¹²Indagu io ri Ragil, “Aku anak ri Ribika, pongkotob ruandu' ru ama' muno.” Pasimbul boo i Ragil uli' ra baloi am pantunung ra ama' nano.

¹³Kaining ri Laban tanou ri Jakub akon nano, pasimbul io rapog riso. Ganggali' no, alaki' no am ibito' no ra baloi. Katunung ri Jakub ngaangai' ondo' nasauk no,

¹⁴indagu i Laban riso, “Sotopot no okou ti raraa' am kual kuno ayuk poyo.” Ayan i Jakub ra giu' no buoi sansila'.

¹⁵Indagu boo i Laban riso, “Kalo moonsoi nangandoi kou raki' am kolondo' taakin kuno rirun sabap ra pabukat tokou. Kula' kia gaji' pakibayarin muno raki'?”

¹⁶Makaanak i Laban ruo ngaulun ruandu', inggalan ru katuaan no i Liya am pupusan no i Ragil.

¹⁷Makamato i Liya ra malaut,[58] kaa' makainan ri Ragil ra moonsoi am mantalur bulos nano.

¹⁸Malaai i Jakub ri Ragil, ginio sabap ra taam io, “Mangandoi aku rirun buoi tulu' ngambilor, amon ru mataak mu anduon ku i Ragil.”

¹⁹Taam i Laban, “Moonsoi poyo paanduin ku i Ragil no rirun ka io anduon ru bokon, ayan noyo raki'.”

²⁰Pangandoi boo i Jakub buoi tulu' ngambilor koson manangandu' ri Ragil, am buoi ru ginio ra pamaguangan ri Jakub koson kukula' ngoorou ayuk sabap ra laai no ri Ragil.

²¹Indagu boo i Jakub ri Laban, “Nakatulu' ngambilor noyo, makitaak aku rirun ra anduon ku i Ragil no.”

²²Pambaal i Laban ra bunsag paguguatan am pampiau ra ngaangai' ulun ru giu' no.

²³Kaa' rondom raginio, sala' ka i Ragil inataran ri Laban ri Jakub, kaa' i Liya, am rulugo' io ri Jakub. (

²⁴Pataako' niayuk ri Laban ulipon ruandu' nano ininggalanan ri Jilpa no ri Liya ra uliponon.)

²⁵Suabon raginio, kalimani' boo ri Jakub ra i Liya rinulug nano. Ongoi io boo ri Laban am indagu, “Kua gitio pinamakuan muno raki'? Nangandoi aku koson manangandu' ri Ragil. Kua ruungo' mu aku?”

²⁶Taam i Laban, “Maya' ra kaulayan ragiti, kalo pasiguluon uoto' boborok no intor ra maayo nano.

²⁷Inaani' polos katuluan ru bunsag paguguatan ti maampus, am pataakon ku niayuk i Ragil no rirun, amon ru masaga' kou mangandoi raki' buoi tulu' ngambilor poyo.”

²⁸Pangiou i Jakub am kaampus bunsag no, pataako' ri Laban anak ruandu' nano i Ragil ri Jakub, masauk ra andu'. (

²⁹Pataako' niayuk ri Laban ulipon ruandu' nano ininggalanan ri Bilga ri Ragil ra uliponon.)

³⁰Rulugo' ri Jakub i Ragil am tagamin no kaga' i Ragil intor ri Liya. Pangandoi io boo ri Laban buoi tulu' ngambilor poyo.

³¹Pakakito TUHAN ra kalo tinagaman toojo i Liya koson ri Ragil, baalo' ru TUHAN no i Liya makapaganak kaa' i Ragil tabanang.

³²Kaapang i Liya am paganak sangulun anak ungkuyon. Kono, “Nakito ru TUHAN no kapaganan kuno, am raino tumogom ralaki kuno raki'.” Inggalani' no boo anak raginio i Rubin.[59]

³³Kaapang poyo i Liya am paganak sangulun anak ungkuyon. Kono, “Pinataak poyo ru TUHAN no anak ragitio sabap norongog No ra kalo tagamin aku toojo.” Inggalani' no boo anak raginio i Simion.[60]

³⁴Kaapang poyo i Liya am paganak poyo sangulun anak ungkuyon. Kono, “Raino, maaru' ralaki kuno lumampit toojo raki' sabap talu noyo anak ungkuyon inanak kutu.” Inggalani' no boo anak raginio i Liwi.[61]

³⁵Kaapang poyo igondo' i Liya am paganak sangulun anak ungkuyon. Kono, “Raino ti, mongompor aku ri Aki Kapuuno'.” Inggalani' no boo anak raginio i Jiuda.[62] Kopongo raginio kalo boo naganak i Liya.