Read Timugon Murut KASAUKAN 3 Bible Online

KASAUKAN 3 - Timugon Murut bible

KASAUKAN 3

¹Kukuo rondo' bibiag ondo' mapintar kaga' intor ra ngaangai' bibiag ondo' binaal ru TUHAN i Aki Kapuuno'. Pangkuot kukuo no ra ruandu' no, “Motopot kia minindagu i Aki Kapuuno' ra kalo maakan min kinawa' intor ra ngaangai' puun ondo' soroi ra taman ti?”

²Taam ruandu' no, “Maakan mai kawa' intor ra moonong puun ralalom ru taman ti, kaa' ondo' kalo maakan ginio nakaunor ra tatanga' ru taman no.

³Sabap ra nanginggalar i Aki Kapuuno' ramon mangakan ra kawa' intor ra puun no kapoam mangambong; amon baalon mai, matoi akai.”

⁴Taam kukuo no, “Ginio kalo motopot; kalo matoi kau.

⁵Mindagu i Aki Kapuuno' koon raginio sabap nakapandai Io ra amon ru mangakan kau ra kawa' raginio, makapandai kau ra ngaangai' baal; masauk kau koson ri Aki Kapuuno'[10] am makapandai ra atan ayuk ondo' moonsoi am malaat.”[11]

⁶Nakito ru ruandu' no ra puun raginio moonsoi kaga' am kawa' no pana maamis kaga' akanon. Mangkara' io ra mapara' bonsoi amon ru mapintar io. Ginio ra pangupu' io ra kawa' no am akano' no. Io pana nantayar niayuk ra ralaki nano am ralaki nano pana nangakan ra kawa' no.

⁷Pakaakan ilo ra kawa' no, pangkaraan nilo naukab am nalimanan nilo ra nagibabaang ilo. Ginio ra pampikit ilo ra raun ru ara am taubi' nilo inan nilono.

⁸Paat ra mamai', nakaining ilo ra TUHAN i Aki Kapuuno' minugar ra ralalom ru taman am pansibuni ilo ra lolot ru puun-puun am kalo boo makito ilo ru TUHAN.

⁹Kaa' pampiau TUHAN i Aki Kapuuno' ra ungkuyon no, kon Nano, “Ati kou boo?”

¹⁰Taam ungkuyon no, kono, “Nakaining aku nampiau Kou giti ra taman ti; am malaa' aku, ginio ra pansibuni aku sabap nagibabaang aku.”

¹¹“Osoi kia nambala' rirun ra nagibabaang kou?” nangkuot i Aki Kapuuno'. “Inakan min kia kawa' ondo' kalo paakanin Kuli?”

¹²Taam ungkuyon i, “Ruandu' ondo' pinamarangan Mu raki' ti nai nangani' raki' ra kawa' no am akano' ku boo.”

¹³Pangkuot TUHAN i Aki Kapuuno' ra ruandu' no, “Kua guat baalo' mu ginii?” Taam io, “Rinuung aku ru kukuo saboi inakan ku kawa' no.”

¹⁴Indagu boo TUHAN i Aki Kapuuno' ra kukuo no, “Inulas kou sabap ra binaal muno; intor ra ngaangai' bibiag okou ayuk magiba' ra ulas: Intor raino mundus kou ayuk ra mugar am mangakan kou ayuk ra kaau ru tana' saboi ra pupus ru bayag muno.

¹⁵Okou am ruandu' raginio mansisang, papag nano am papag muno magail mantutula'. Papag nano mamabak ra ulu muno am okou maninduk ra tunob nilono.”[12]

¹⁶Indagu TUHAN i Aki Kapuuno' ra ruandu' no, “Janjain Ku pagon paat okou maapang am niayuk maruol ra okou maganak. Kabalu' pana raginio, okou lakat ayuk poyo makaguang lumampit ra ralaki muno, kaa' kumuku' kou riso.”

¹⁷Indagu boo TUHAN i Aki Kapuuno' ra ungkuyon no, “Inining mu ragu ru andu' muno am nangakan ra kawa' ondo' kalo paakanin Kuli rirun. Ginio boo intor ra binaal muno, inulas Ku tana' ti. Okou mingkotog toojo mangandoi saboi ra pupus ru bayag muno maa' raginio tana' ti makaampos ra akanon ondo' maukop ra akanon min.

¹⁸Tana' ti makaampos ra tutuu' am tutuu' makaruui; tutuu' lumayau masauk ra akanon muno.

¹⁹Okou matipatoi mangandoi am rasangon koson mambaal ra tana' ti manangampos saboi sumaguli' kou ra tana' ti sabap intor ra tana' ti okou sinauk. Ginio nai ra okou sinauk intor ra tana' am sumaguli' kou niayuk ra tana'.”

²⁰Inggalani' ri Adam[13] andu' nano i Awa[14] sabap ruandu' raginio noyo masauk ra ina' ru ngaangai' ulun.

²¹Ginio boo ra TUHAN i Aki Kapuuno' nambaal ri Adam am andu' nano ra bayang intor ra kungkung ru bibiag am Io pana nampabayang risilo.

²²Indagu TUHAN i Aki Kapuuno', “Raino ulun no nasauk koson Ritakau am makakapandayan ra baal ondo' moonsoi am niayuk malaat. Ginio boo musiti' inggalarin ulun mangakan ra kawa' intor ra puun ondo' mangani' ra bayag, maa' raginio ulun kalo maayag ra sabubuoi no.”

²³Ginio ra TUHAN i Aki Kapuuno' napaugar ra ulun no intor ra Taman Idin am sinusub No mangandoi ra tana' ondo' intor raginio io binaal.

²⁴Giu' boo ra tampilon sirangon ru Taman no, TUHAN i Aki Kapuuno' napaayan ra kirub[15] am rondo' ilang makaapui ondo' lumibut ra ngaangai' intok koson mantamung ra puun ondo' mangani' ra bayag. Ginio ra kolondo' sangulun pana makasubol am makainggaar ra puun raginio.